Kom nader aan God
’n “Hoorder van die gebed”
VERHOOR Jehovah God werklik die opregte gebede van toegewyde aanbidders? Die Bybelverslag oor ’n redelik onbekende man met die naam Jabes toon dat Jehovah inderdaad die “Hoorder van die gebed” is (Psalm 65:2). Hierdie kort verslag word gevind op ’n skynbaar onwaarskynlike plek—in die geslagslyste aan die begin van die boek Eerste Kronieke. Kom ons ondersoek 1 Kronieke 4:9, 10.
Alles wat ons omtrent Jabes weet, word in hierdie twee verse gevind. Volgens vers 9 het sy moeder “hom Jabes genoem en gesê: ‘Ek het met pyn aan hom geboorte gegee.’”a Waarom het sy hierdie naam gekies? Het sy met meer as die gewone geboortepyne aan hierdie seun geboorte gegee? Was sy dalk ’n weduwee, wat die feit betreur het dat haar man nie daar is om hulle baba in die wêreld te verwelkom nie? Die Bybel sê nie. Maar hierdie moeder sou eendag rede hê om baie trots op dié seun te wees. Jabes se broers was moontlik regskape mans, maar “Jabes was meer geëerd as sy broers”.
Jabes was ’n man van gebed. Hy het sy gebed begin deur God te smeek om hom te seën. Toe het hy drie versoeke gedoen wat bewys lewer van ’n hart vol geloof.
Eerstens het Jabes God gesmeek en gesê: ‘Vergroot my gebied’ (vers 10). Hierdie eerbare man was nie ’n grondrower wat begeer het wat aan sy medemens behoort nie. Sy opregte versoek het moontlik meer te doen gehad met mense as met grond. Hy het dalk gevra dat sy gebied op ’n vreedsame wyse vergroot word sodat daar meer plek vir aanbidders van die ware God sou wees.b
Tweedens het Jabes gesmeek dat God se “hand” met hom moet wees. God se simboliese hand is sy toegepaste krag, wat hy gebruik om sy aanbidders te help (1 Kronieke 29:12). Om die versoeke van sy hart te ontvang, het Jabes vertrou op die God wie se hand nie kort is teenoor dié wat geloof in hom stel nie.—Jesaja 59:1.
Derdens het Jabes tot Jehovah gebid: “[Bewaar] my werklik van rampspoed . . . , sodat dit my nie tref nie.” Die uitdrukking “sodat dit my nie tref nie” gee moontlik te kenne dat Jabes gebid het, nie om rampspoed vry te spring nie, maar om nie deur die gevolge van boosheid bedroef of oorweldig te word nie.
Jabes se gebed het sy besorgdheid oor ware aanbidding en sy geloof en vertroue in die Hoorder van die gebed geopenbaar. Hoe het Jehovah gereageer? Hierdie kort verslag sluit af met die woorde: “En God het teweeggebring wat hy gevra het.”
Die Hoorder van die gebed het nie verander nie. Hy skep behae in die gebede van aanbidders. Almal wat geloof en vertroue in hom stel, kan daarvan seker wees “dat hy ons hoor, ongeag wat ons volgens sy wil vra”.—1 Johannes 5:14.
[Voetnote]
a Die naam Jabes is afgelei van ’n grondwoord wat “pyn” kan beteken.
b Die Targoems, Joodse parafrases van die Heilige Geskrifte, gee Jabes se woorde soos volg weer: “Seën my met kinders, en brei my grense uit met dissipels.”