Hoe kan jy stry teen negatiewe gevoelens?

WORSTEL jy ooit met negatiewe gevoelens? Met wie is dit nie die geval nie? Ons tye word gekenmerk deur ekonomiese ontberinge, wydverspreide gewelddadigheid en ongebreidelde ongeregtigheid. Dit is nie verbasend dat tallose mense deur oorweldigende hartseer, oordrewe skuldgevoelens en gevoelens van waardeloosheid geteister word nie.

Sulke gevoelens kan gevaarlik wees. Dit kan ons selfvertroue ondermyn, ons redeneervermoë belemmer en ons ons vreugde ontneem. Die Bybel sê: “Was jy mismoedig in die dag van benoudheid? Jou krag sal gering wees” (Spreuke 24:10). Ons het ons krag, ons energie, nodig om in hierdie wêreld vol probleme staande te bly. Dit is dus noodsaaklik om negatiewe gevoelens te beheers.a

Die Bybel voorsien kragtige verdedigingsmiddele teen negatiewe gevoelens. Jehovah God, die Skepper en die Onderhouer van alle lewe, wil nie hê dat jy deur wanhoop oorweldig moet word nie (Psalm 36:9). Kom ons kyk dus na drie maniere waarop sy Woord ons kan help om teen negatiewe gevoelens te stry.

Wees bewus van God se belangstelling in jou

Party mense voel dat God te besig is met ander sake om aan hulle persoonlike gevoelens aandag te skenk. Voel jy so? Die Bybel verseker ons in werklikheid dat ons Skepper in ons gevoelens belangstel. Die psalmis het gesê: “Jehovah is naby die gebrokenes van hart; en die verbryseldes van gees red hy” (Psalm 34:18). Hoe vertroostend is dit tog om te weet dat die almagtige Soewerein naby ons is wanneer ons in benoudheid verkeer!

God is nie ongevoelig of afsydig nie. Die Bybel sê: “God is liefde” (1 Johannes 4:8). Hy het mense lief en het empatie met dié wat ly. Toe die Israeliete byvoorbeeld sowat 3 500 jaar gelede in slawerny in Egipte was, het hy gesê: “Ek het ongetwyfeld die ellende gesien van my volk wat in Egipte is, en ek het hulle geroep gehoor oor dié wat hulle dryf om te werk; want ek weet goed watter pyn hulle ly. En ek daal neer om hulle . . . te verlos.”—Eksodus 3:7, 8.

God ken ons emosionele samestelling goed, want “ons is deur hom gemaak, nie deur onsself nie” (Psalm 100:3). Selfs wanneer ons voel dat ander mense ons nie verstaan nie, kan ons dus seker wees dat God verstaan. God se Woord sê: “God sien nie soos die mens sien nie, want die mens sien wat vir die oë sigbaar is; maar Jehovah sien wat die hart is” (1 Samuel 16:7). Selfs ons diepste gevoelens is nie vir God verborge nie.

Jehovah is weliswaar ook bewus van ons foute en tekortkominge. Maar ons kan dankbaar wees dat ons liefdevolle Maker vergewensgesind is. Die geïnspireerde Bybelskrywer Dawid het gesê: “Soos ’n vader barmhartigheid aan sy kinders bewys, het Jehovah barmhartigheid bewys aan dié wat hom vrees. Want hy weet goed hoe ons gevorm is, gedagtig dat ons stof is” (Psalm 103:13, 14). Die manier waarop God ons sien, is dalk nie soos ons onsself sien nie. Hy soek die goeie en slaan nie ag op die slegte nie, solank ons oor ons sondes berou het.—Psalm 139:1-3, 23, 24.

Wanneer ons deur gevoelens van waardeloosheid geteister word, moet ons dus vasbeslote wees om daarteen te stry. Ons moet onthou hoe God ons sien!—1 Johannes 3:20.

Kweek ’n hegte vriendskap met God aan

Hoe strek dit ons tot voordeel as ons onsself sien soos God ons sien? Dit sal vir ons makliker wees om die volgende stap te doen om negatiewe gevoelens te bowe te kom—om ’n hegte vriendskap met God op te bou. Is dit werklik moontlik?

As ’n liefdevolle Vader is Jehovah God gretig om ons te help om ’n hegte vriendskap met hom aan te kweek. Die Bybel spoor ons aan: “Kom nader aan God, en hy sal nader aan julle kom” (Jakobus 4:8). Hier is ’n verstommende waarheid: Al is ons swak en sondig, kan ons ’n innige persoonlike vriendskap met die Soewerein van die heelal opbou.

God het hom in die Bybel geopenbaar sodat ons hom as ’n persoon kan leer ken. Deur die Bybel gereeld te lees, kan ons van God se innemende eienskappe leer.b Wanneer ons oor hierdie kennis peins, sal ons voel hoe ons al hoe nader aan Jehovah kom. Ons sal duideliker sien watter soort persoon hy werklik is—’n liefdevolle, medelydende Vader.

As ons diep nadink oor wat ons in die Bybel lees, help dit ons nog verder. Ons kom nader aan ons hemelse Vader deur sy gedagtes in ons verstand en hart in te neem en toe te laat dat dit ons teregwys, vertroos en rig. Ons moet dit veral doen wanneer ons worstel met gedagtes en gevoelens wat ons kwel of verontrus. Die psalmis het dit soos volg gestel: “Toe ek met baie onrus in my binneste sit, het u vertroosting my tot rus gebring” (Psalm 94:19, Nuwe Afrikaanse Bybelvertaling). God se Woord kan baie vertroostend wees. As ons sy boodskap van waarheid nederig aanvaar, sal ons moontlik vind dat ons negatiewe gevoelens vervang word deur die vertroosting en die vrede wat net God kan voorsien. Sodoende vertroos Jehovah ons soos ’n liefdevolle vader miskien ’n kind sal troos wat seergekry het of ontsteld is.

Nog ’n sleutel om God se vriend te word, is om gereeld met hom te praat. Die Bybel verseker ons “dat [God] ons hoor, ongeag wat ons volgens sy wil vra” (1 Johannes 5:14). Watter vrese of bekommernisse ons ook al het, ons kan tot God bid en sy hulp vra. As ons ons hart voor God uitstort, verkry ons gemoedsrus. Die apostel Paulus het geskryf: “Laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.

As jy ’n program van Bybellees, bepeinsing en persoonlike gebed volg, sal jy ongetwyfeld vind dat jy ’n hegte band met jou hemelse Vader smee. Hierdie band is ’n kragtige wapen teen negatiewe gevoelens. Wat anders kan help?

Fokus op ’n vaste hoop vir die toekoms

Selfs wanneer ons ons in die allermoeilikste omstandighede bevind, kan ons ons gedagtes op goeie dinge toespits. Hoe so? God gee ons ’n vaste hoop vir die toekoms. Die apostel Petrus het hierdie wonderlike hoop in die volgende woorde opgesom: “Daar is nuwe hemele en ’n nuwe aarde wat ons volgens [God se] belofte verwag, en daarin sal regverdigheid woon” (2 Petrus 3:13). Wat beteken dit?

Die uitdrukking “nuwe hemele” verwys in werklikheid na ’n regering—God se hemelse Koninkryk in die hande van Jesus Christus. “Nuwe aarde” verwys na ’n nuwe mensegemeenskap hier op die aarde wat God se goedkeuring sal geniet. Onder die heerskappy van die “nuwe hemele” sal die nuwe aardse gemeenskap vry wees van al die dinge wat negatiewe gevoelens veroorsaak. Aangaande getroue mense wat dan sal lewe, verseker die Bybel ons dat God “elke traan van hulle oë [sal] afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie”.—Openbaring 21:4.

Jy sal sekerlik saamstem dat dit wonderlike, bemoedigende gedagtes is. Daarom noem die Bybel die toekomsverwagtinge wat God ware Christene bied, “die gelukkige hoop” (Titus 2:13). As ons ons gedagtes toespits op God se beloftes vir die mensdom se toekoms—en op die redes waarom hierdie beloftes betroubaar en seker is—verdryf ons negatiewe gedagtes.—Filippense 4:8.

Die Bybel vergelyk ons hoop op redding met ’n helm (1 Tessalonisense 5:8). In die ou tyd sou ’n soldaat dit nie gewaag het om sonder sy helm te gaan veg nie. Hy het geweet dat dit baie houe sou versag en baie projektiele sou laat wegskram sonder dat dit hom beseer. Soos ’n helm die kop beskerm, beskerm hoop die verstand. As ons voortdurend dink aan dinge wat ons met hoop vervul, kan dit ons teen negatiewe, angswekkende, pessimistiese denke beskerm.

Dit is dus moontlik om teen negatiewe gevoelens te stry. Jy kan dit doen! Dink na oor hoe God jou beskou, kom nader aan hom en fokus op jou hoop vir die toekoms. Dan kan jy seker wees dat jy die tyd sal beleef wanneer negatiewe gevoelens vir ewig tot die verlede sal behoort!—Psalm 37:29.

[Voetnote]

[Lokteks op bladsy 19]

“Ek weet goed watter pyn hulle ly.”—EKSODUS 3:7, 8

[Lokteks op bladsy 20]

“Toe ek met baie onrus in my binneste sit, het u vertroosting my tot rus gebring.”—PSALM 94:19, NUWE AFRIKAANSE BYBELVERTALING

[Lokteks op bladsy 21]

“Die vrede van God wat alle denke te bowe gaan, sal julle harte en julle verstandelike vermoëns . . . bewaak.”—FILIPPENSE 4:7

[Venster/Prent op bladsy 20, 21]

Vertroostende tekste oor Jehovah God

“Jehovah, ’n barmhartige en genadige God, wat nie gou toornig word nie en oorvloedig is in liefderyke goedhartigheid en waarheid.”—EKSODUS 34:6.

“Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is.”—2 KRONIEKE 16:9.

“Jehovah is naby die gebrokenes van hart; en die verbryseldes van gees red hy.”—PSALM 34:18.

“U, o Jehovah, is goed en vergewensgesind.”—PSALM 86:5.

“Jehovah is goed vir almal, en sy barmhartighede is oor al sy werke.”—PSALM 145:9.

“Ek, Jehovah jou God, gryp jou regterhand vas, ek wat vir jou sê: ‘Moenie bang wees nie. Ek sal jou help.’”—JESAJA 41:13.

“Mag. . . die Vader van tere barmhartighede en die God van alle vertroosting, geloof word.”—2 KORINTIËRS 1:3.

“Ons sal ons hart voor hom gerusstel met betrekking tot alles waarin ons hart ons veroordeel, want God is groter as ons hart en weet alles.”—1 JOHANNES 3:19, 20.

[Venster/Prente op bladsy 22]

Hulle stry met welslae teen negatiewe gevoelens

“My pa is ’n alkoholis, en hy het vir my baie lyding veroorsaak. Ek word al vandat ek kan onthou, deur gevoelens van waardeloosheid geteister. Maar toe ek die Bybel saam met een van Jehovah se Getuies begin studeer het, het ek van die belofte van ewige lewe op die aarde geleer. Hierdie hoop het my verstand en hart met vreugde vervul. Bybellees het ’n gereelde aspek van my lewe geword. Ek het altyd die Bybel byderhand. Wanneer ek deur negatiewe gevoelens oorweldig word, tel ek dit op en lees ek vertroostende tekste. Wanneer ek van God se innemende eienskappe lees, verseker dit my van hoe kosbaar ek in sy oë is.”—Kátia, ’n 33-jarige vrou.c

“Ek was verslaaf aan alkohol, dagga, kokaïen en crack-kokaïen en het gom gesnuif. Omdat ek byna alles verloor het, het ek ’n bedelaar geword. Maar nadat ek ’n Bybelstudie met Jehovah se Getuies aanvaar het, het ek my lewe heeltemal verander. Ek het God as ’n Persoon leer ken. Al moet ek nog steeds teen skuldgevoelens en gevoelens van waardeloosheid stry, het ek geleer om op God se barmhartigheid en liefderyke goedhartigheid te vertrou. Ek is seker dat God sal aanhou om my die krag te gee om my negatiewe gevoelens te bowe te kom. Om die waarheid uit die Bybel te leer, is die beste ding wat al ooit met my gebeur het.”—Renato, ’n 37-jarige man.

“Al vandat ek klein is, vergelyk ek my met my ouer broer. Ek het altyd minderwaardig gevoel. Ek voel nog steeds baie onseker van myself en twyfel aan my vermoëns. Maar ek is vasbeslote om hierdie stryd te wen. Ek bid onophoudelik tot Jehovah, en hy help my om my minderwaardigheidsgevoel te oorkom. Dit is hartverblydend om te weet dat God werklik vir my lief is en vir my omgee!”—Roberta, ’n 45-jarige vrou.

[Voetnoot]