Kontak met die geesteryk

GOD die Almagtige het sekere verantwoordelikhede aan ander geesskepsele toevertrou. Hy het byvoorbeeld heerskappy oor die aarde in Jesus Christus se hande geplaas, en hy het getroue engele aangestel om die verkondiging van die goeie nuus te help rig (Openbaring 14:6). Maar gebede is anders. Hy het nie die verantwoordelikheid om na gebede te luister, aan enigiemand gedelegeer nie. Ons gebede word tereg net tot God self gerig.

Jehovah is die “Hoorder van die gebed” (Psalm 65:2). Hy luister na ons gebede, en hy verhoor dit. Aangaande gebed het die apostel Johannes aan ander knegte van Jehovah geskryf: “[God] hoor [ons], ongeag wat ons volgens sy wil vra. En as ons weet dat hy ons hoor met betrekking tot wat ons ook al vra, weet ons dat ons die dinge gaan kry wat ons gevra het, aangesien ons dit van hom gevra het.”—1 Johannes 5:14, 15.

Die getroue engele wil nie hê dat ons hulle moet aanroep of tot hulle moet bid nie. Hulle verstaan en werk in ooreenstemming met God se reëling vir gebed, waarby hulle soms regstreeks betrokke is. Hoe? Wel, toe die profeet Daniël tot Jehovah oor die verwoesting van Jerusalem gebid het, het God Daniël se gebed verhoor deur die engel Gabriël met ’n bemoedigende boodskap te stuur.—Daniël 9:3, 20-22.

Boodskappe van die dooies?

Moet ons in aanraking probeer kom met dié wat gesterf het? Baie stories handel oor gesprekke wat mense na bewering met die geeste van die dooies gehad het. ’n Geestemedium het byvoorbeeld met ’n vrou in Ierland in aanraking gekom en gesê dat sy die vorige nag ’n gesprek met die vrou se man, Fred, gehad het. Maar Fred is ’n paar weke vroeër oorlede. Die medium het verder vertel wat “Fred” gesê het, dinge wat sy vrou gemeen het net sy van weet. Hoe maklik sou dit tog vir haar gewees het om tot die slotsom te kom dat Fred in die geestewêreld lewe en deur die vreemdeling met haar in aanraking probeer kom. Maar hierdie slotsom sou bots met wat die Bybel uitdruklik oor die toestand van die dooies sê.—Sien venster hieronder.

Hoe kan sulke stories dan verklaar word? Een manier waarop die demone mense probeer bedrieg, is deur hulle as die dooies voor te doen, in hierdie geval, Fred. Die oogmerk? Om mense af te keer van wat die Bybel leer en om geloof en vertroue in Jehovah te ondermyn. Satan en die demone mislei mense onteenseglik “met allerhande kragtige werke en leuenagtige tekens en voortekens en met allerhande onregverdige bedrog vir dié wat vergaan”.—2 Tessalonisense 2:9, 10.

Daar is weliswaar geestemediums en dié wat hulle besoek wat werklik glo dat hulle met dooies in aanraking kom. Maar as hulle hoegenaamd met iemand in aanraking kom, is dit in werklikheid met geeste wat in verset teen Jehovah is. Net so is daar diegene wat glo dat hulle God aanbid, maar wat hulle misgis. Die apostel Paulus is geïnspireer om die ernstige waarskuwing op te teken dat “die nasies die dinge wat hulle offer, aan demone offer en nie aan God nie”.—1 Korintiërs 10:20, 21.

Aangesien ons weet dat ons tot die Opperwese kan bid, wat ons liefhet en vir ons omgee, waarom sal ons dan tot enigiemand anders wil bid? Die Bybel gee immers hierdie versekering: “Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is.”—2 Kronieke 16:9.

[Lokteks op bladsy 9]

Aangesien ons weet dat ons tot die Opperwese kan bid, wat ons liefhet en vir ons omgee, waarom sal ons dan tot enigiemand anders wil bid?

[Venster/Prent op bladsy 8, 9]

Feit en fiksie

FEIT: SATAN IS ’N WERKLIKE PERSOON

“Satan self hou aan om hom in ’n engel van lig te verander.”—2 Korintiërs 11:14.

“Bly nugter van verstand, wees waaksaam. Julle teenstander, die Duiwel, loop rond soos ’n brullende leeu en is daarop uit om iemand te verslind.”—1 Petrus 5:8.

“Hy wat sonde beoefen, het sy oorsprong by die Duiwel, want die Duiwel sondig al van die begin af.”—1 Johannes 3:8.

“Onderwerp julle dan aan God; maar staan die Duiwel teë, en hy sal van julle af wegvlug.”—Jakobus 4:7.

“Die Duiwel . . . was ’n mensemoordenaar toe hy begin het, en hy het nie in die waarheid vasgestaan nie, omdat daar geen waarheid in hom is nie. Wanneer hy die leuen spreek, spreek hy ooreenkomstig sy eie geaardheid, want hy is ’n leuenaar en die vader van die leuen.”—Johannes 8:44.

FIKSIE: NÁ DIE DOOD GAAN ALMAL NA DIE GEESTERYK

“In die sweet van jou aangesig sal jy brood eet totdat jy na die grond terugkeer, want daaruit is jy geneem. Want stof is jy en tot stof sal jy terugkeer.”—Genesis 3:19.

“Die lewendes is daarvan bewus dat hulle sal sterf; maar wat die dooies betref, hulle is bewus van hoegenaamd niks.”—Prediker 9:5.

“Alles wat jou hand vind om te doen, doen dit met jou mag, want daar is geen werk of beplanning of kennis of wysheid in Sjeool [die graf], die plek waarheen jy gaan nie.”—Prediker 9:10.

“Sy gees gaan uit, hy keer terug na sy grond; op daardie dag vergaan sy gedagtes.”—Psalm 146:4.

FEIT: GETROUE ENGELE GEE VIR ONS OM

“Die engel van Jehovah slaan kamp op rondom dié wat hom vrees, en hy red hulle.”—Psalm 34:7; 91:11.

“Is hulle [engele] nie almal geeste vir openbare diens, wat uitgestuur word om te dien ten behoewe van dié wat redding gaan beërf nie?”—Hebreërs 1:14.

“Ek het ’n ander engel in die middel van die hemel sien vlieg, en hy het ewige goeie nuus gehad om as blye tyding bekend te maak aan dié wat op die aarde woon, en aan elke nasie en stam en taal en volk, en hy het met ’n harde stem gesê: ‘Vrees God en gee hom heerlikheid.’”—Openbaring 14:6, 7.

FIKSIE: JESUS IS GELYK AAN GOD

“Ek wil hê dat julle moet weet dat die Christus die hoof is van elke man; en die man is die hoof van die vrou; en God is die hoof van die Christus.”—1 Korintiërs 11:3.

“Wanneer alles aan hom onderwerp is, dan sal die Seun self hom ook onderwerp aan die Een wat alles aan hom onderwerp het, sodat God alles vir elkeen kan wees.”—1 Korintiërs 15:28.

“Voorwaar, voorwaar, ek sê vir julle: Die Seun kan hoegenaamd niks op eie inisiatief doen nie, maar net wat hy die Vader sien doen.”—Johannes 5:19.