“Onmoontlik!”—Wat beteken dit?

DIE Titanic, wat in 1912 te water gelaat is, was die grootste en weelderigste passasierskip van sy tyd. Weens die moderne wetenskaplike ontwerp daarvan het mense gedink dat dit “onsinkbaar” is. Wat daarmee gebeur het, is natuurlik geskiedenis. Op sy nooiensvaart het dit teen ’n ysberg in die Noord-Atlantiese Oseaan gebots en met sowat 1 500 van sy passasiers gesink. Die skip wat glo onsinkbaar was, het binne net ’n paar uur in die donker dieptes van die oseaan verdwyn.

Die woord “onmoontlik” kan ’n paar dinge beteken. Ons beskryf iets dalk as onmoontlik wanneer ons dink dat ons dit nie sal kan verduur, doen of verstaan nie. Baie van vandag se tegnologiese prestasies is vroeër as onmoontlik beskou omdat mense dit destyds nie kon doen of selfs omdat mense hulle dit nie kon voorstel nie. Om ’n man op die maan te sit, ’n voertuig na Mars te stuur en dit van die aarde af te beheer, die menslike genetiese kode te karteer en na ’n nuusgebeurtenis te kyk terwyl dit aan die ander kant van die stad of wêreld plaasvind—dit is vandag alles werklikhede wat dalk net 50 jaar gelede as onmoontlik beskou is. Die saak is goed opgesom deur die voormalige Amerikaanse president, Ronald Reagan, toe hy ’n groep toonaangewende figure op verskillende gebiede van die wetenskap toegespreek het: “Julle is aan die voorpunt van die tegnologie en het reeds die onmoontlikhede van gister die alledaagse werklikhede van vandag gemaak.”

Met al die verstommende ontwikkelinge in gedagte het professor John Brobeck gesê: “’n Wetenskaplike kan nie meer in alle eerlikheid sê dat iets onmoontlik is nie. Hy kan slegs sê dat dit onwaarskynlik is. Maar wat hy moontlik wel kan sê, is dat dit onmoontlik is om iets aan die hand van ons huidige kennis te verklaar.” As iets vir ons onmoontlik lyk, het die professor bygevoeg, “is daar een ding wat ons nie buite rekening moet laat nie, naamlik ’n onbekende bron van energie in ons biologiese en fisiologiese wetenskappe. In die Skrif word hierdie bron van energie die krag van God genoem.”

By God is alles moontlik

Lank voordat professor Brobeck hierdie opmerking gemaak het, het Jesus van Nasaret, wat al beskryf is as die grootste mens wat nog geleef het, gesê: “Die dinge wat onmoontlik is by mense, is moontlik by God” (Lukas 18:27). God se heilige gees is die sterkste krag in die heelal. Dit kan nie met behulp van tegnologiese middele gemeet word nie. Die heilige gees kan ons in staat stel om dinge te doen wat in ons eie krag onmoontlik is.

As mense bevind ons ons dikwels in situasies wat ons dink onmoontlik is om deur te kom. Byvoorbeeld, ons staan dalk ’n geliefde aan die dood af of ons gesinslewe word moontlik so stresvol dat dit voel asof ons nie kan voortgaan nie. Miskien het ons lewensweg ons in volslae wanhoop gedompel en lyk dit of daar geen uitweg is nie. Ons voel hulpeloos en desperaat. Wat kan ons doen?

Die Bybel sê dat iemand wat geloof in die Almagtige het en vir Sy heilige gees bid terwyl hy alles in sy vermoë doen om God se goedkeuring weg te dra, hulp kan ontvang om oënskynlik onoorkomelike struikelblokke te oorkom. Let op Jesus se gerusstellende woorde: “Voorwaar, ek sê vir julle dat elkeen wat vir hierdie berg sê: ‘Word opgelig en in die see gegooi’, en in sy hart nie twyfel nie, maar glo dat wat hy sê, sal gebeur, vir hom sal dit so wees” (Markus 11:23). Geen situasie is onmoontlik om te verduur of die hoof te bied as ons toelaat dat die krag van God se Woord en sy gees ’n uitwerking op ons lewe het nie.

Kyk na die voorbeeld van ’n man wat 38 jaar lank getroud was en wie se vrou aan kanker gesterf het. Hy was verpletter. Hy het gedink dat sy situasie onmoontlik is om te verduur. Daar was tye dat hy eerder wou sterf as om sonder haar te lewe. Hy het gesê dat dit gevoel het asof hy deur ’n vallei van diep skaduwee gaan. Wanneer hy terugkyk, is hy van mening dat sy diep emosionele gebede en daaglikse Bybellees asook sy opregte pogings om die leiding van God se gees te vind, hom gehelp het om ’n situasie te oorkom wat hy gedink het onmoontlik is om te verduur.

’n Egpaar se huwelik was besig om te verbrokkel. Die man was gewelddadig en het talle slegte gewoontes gehad. Vir sy vrou het die lewe onmoontlik gelyk. Sy het probeer selfmoord pleeg. Toe het haar man die Bybel saam met Jehovah se Getuies begin studeer. Wat hy geleer het, het hom gehelp om sy slegte gewoontes te oorkom en sy kwaai humeur te beteuel. Sy vrou was verstom oor die “onmoontlike” veranderinge wat hy aangebring het.

’n Ander man sê dat sy lewe van dwelmmisbruik en onsedelikheid hom in die dieptes van wanhoop gedompel het. “Ek het al my waardigheid verloor”, sê hy. Hy het ernstig tot God gebid: “Here, ek weet dat u bestaan. Help my asseblief!” Sy gebed het tot ’n studie van die Bybel saam met Jehovah se Getuies gelei, wat ongelooflike veranderinge in sy lewe tot gevolg gehad het. “Ek is al dikwels geteister deur skuldgevoelens en ’n lae selfbeeld”, sê hy. “Ek was soms baie neerslagtig. Maar God se Woord het my gehelp om teen hierdie verontrustende gevoelens te stry. Gedurende slapelose nagte het ek die Skrifgedeeltes wat ek geleer het, vir myself opgesê. Hierdie verstandelike reiniging is baie nuttig.” Hy is nou ’n gelukkig getroude man. Hy en sy vrou is baie besig daarmee om ander te help om vertroue in die krag van God se Woord te hê. As ’n jong man met baie probleme, sou hy dit onmoontlik gevind het om hom sy huidige lewe voor te stel.

Hierdie ondervindinge toon dat God se Woord inderdaad kragtig is en dat sy heilige gees “onmoontlike” dinge in ons lewe kan vermag. Maar jy sê dalk: “Dit verg geloof!” Ja, dis waar. Trouens, die Bybel sê: “Sonder geloof is dit onmoontlik om vir [God] welbehaaglik te wees” (Hebreërs 11:6). Maar dink so daaraan: ’n Goeie vriend, dalk ’n bankbestuurder of iemand in ’n gesagsposisie, sê vir jou: “Moenie bekommerd wees nie. As jy ooit iets nodig het, kan jy net na my toe kom.” Jy sal ongetwyfeld vertroos word deur so ’n belofte. Maar ongelukkig laat mense ons dikwels in die steek. Dalk beland jou vriend in ’n situasie wat dit vir hom onmoontlik maak om sy welmenende belofte na te kom. As jou vriend sou sterf, sal al sy gewilligheid en vermoë om jou te help tot niet gaan. Aan die ander kant kan niks wat met mense gebeur God hoegenaamd beperk nie. Die Bybel verseker ons: “Niks is onmoontlik by God nie.”—Lukas 1:37, The Jerusalem Bible.

“Glo jy dit?”

Daar is talle gebeurtenisse in die Bybel opgeteken wat bewys dat hierdie laaste verklaring waar is. Kom ons kyk na ’n paar voorbeelde.

’n Negentigjarige vrou met die naam Sara het gelag toe sy hoor dat sy aan ’n seun geboorte sou skenk, maar die bestaan van die Israelitiese volk bewys dat dit wel gebeur het. ’n Man is deur ’n groot vis ingesluk, hy het die drie dae lange ondervinding oorleef en kon later sy eie verhaal opteken. Sy naam was Jona. Lukas, ’n dokter wat geweet het wat die verskil is tussen bewusteloosheid en die dood, het geskryf hoe ’n jong man, Eutigus, uit die venster van ’n bovertrek geval en gesterf het, maar toe weer lewend gemaak is. Dit is nie fabels nie. ’n Noukeurige ondersoek van elkeen van hierdie verslae sal die geloofwaardigheid daarvan bevestig.—Genesis 18:10-14; 21:1, 2; Jona 1:17; 2:1, 10; Handelinge 20:9-12.

Jesus het die volgende verstommende woorde aan sy vriendin Marta gerig: “Elkeen wat lewe en geloof in my beoefen, sal nóóit sterf nie.” Jesus het toe, nadat hy hierdie oënskynlik onmoontlike belofte gemaak het, ’n betekenisvolle vraag gevra: “Glo jy dit?” Dit is vandag nog ’n geldige vraag waaroor ons diep moet nadink.—Johannes 11:26.

Ewige lewe op aarde—Onmoontlik?

Die skrywers van ’n verslag oor die regsimplikasies van ’n lang lewensduur het die volgende opmerking gemaak: “Ons sal dalk in die nabye toekoms baie langer kan lewe as wat ons tans lewe—moontlik vir ewig.” The New Encyclopædia Britannica verduidelik dat die dood nie deur sellulêre agteruitgang, slytasie of ander prosesse veroorsaak word nie, maar blykbaar eerder deur die een of ander onbekende faktor wat veroorsaak dat liggaamlike prosesse nie behoorlik funksioneer nie of afskakel.a Dit sê: “Dit is moontlik dat veroudering by mense eintlik veroorsaak word deur die agteruitgang van die beheermeganismes wat nodig is vir ’n komplekse proses.”

Hoewel die voorafgaande interessant is, gee die Bybel ons ’n baie beter rede om te glo dat ons wel vir ewig kan lewe, beter as enigiets wat die logika en die wetenskap ons kan bied. Ons Skepper, Jehovah God, die Bron van lewe, belowe dat hy “die dood vir ewig [sal] verswelg” (Psalm 36:9; Jesaja 25:8). Glo jy dit? Hierdie belofte kom van Jehovah, en dit is vir hom onmoontlik om te lieg.—Titus 1:2.

[Voetnoot]

[Lokteks op bladsy 27]

“Die onmoontlikhede van gister [het] die alledaagse werklikhede van vandag [geword].”—RONALD REAGAN

[Lokteks op bladsy 28]

Tot wie wend jy jou wanneer die lewe onmoontlik lyk?

[Foto-erkenning op bladsy 27]

NASA photo