Ouer manne—Sal julle “die moeë siel verkwik”?

Angela,a ’n suster in haar 30’s, is ’n bietjie senuweeagtig. Sy wag vir die ouer manne. Wat gaan hulle vir haar sê? Sy het wel van ’n paar vergaderinge weggebly, maar nadat sy die hele dag lank vir bejaarde mense gewerk het, is sy uitgeput. Sy het nie net met haar daaglikse probleme te kampe nie, maar is ook baie bekommerd oor haar ma se gesondheid.

Hoe sou jy hierdie “moeë siel” aanmoedig as jy Angela sou besoek? (Jer. 31:25). Hoe sal jy in die eerste plek voorberei om ’n verkwikkende herdersbesoek te doen?

DINK AAN JOU BROERS SE OMSTANDIGHEDE

Ons almal raak van tyd tot tyd moeg as gevolg van ons sekulêre werk of teokratiese verantwoordelikhede. Die profeet Daniël het byvoorbeeld “uitgeput gevoel” toe hy ’n visioen ontvang het wat hy nie kon verstaan nie (Dan. 8:27). Hy is gehelp toe die engel Gabriël aan hom verskyn het. God se boodskapper het aan Daniël begrip gegee, hom verseker dat Jehovah sy gebede gehoor het en vir hom gesê dat hy nog steeds “’n besonder geliefde man” was (Dan. 9:21-23). By ’n latere geleentheid het die goedgekose woorde van ’n ander engel die vermoeide profeet versterk.—Dan. 10:19.

Voordat jy ’n medegelowige besoek wat dalk moeg of mismoedig is, moet jy eweneens tyd neem om oor sy omstandighede na te dink. Met watter probleme het hy te kampe? Hoe put hierdie probleme hom miskien uit? Watter goeie eienskappe openbaar hy? “Ek konsentreer op my broers se sterk punte”, sê Richard, wat al meer as 20 jaar ’n ouer man is. “As ek voor die besoek goed oor hulle omstandighede nadink”, voeg hy by, “is dit vir my makliker om maniere te vind om aanmoediging te gee wat by hulle spesifieke behoeftes pas.” As nog ’n ouer man die besoek saam met jou gaan doen, kan julle die broer se situasie gerus saam bespreek.

STEL JULLE BROERS OP HULLE GEMAK

Jy sal waarskynlik saamstem dat mense dikwels verleë voel om oor hulle persoonlike gevoelens te praat. Ter toeligting: Jou broer sal dit dalk moeilik vind om openhartig te gesels wanneer ouer manne hom besoek. Hoe kan jy dan die ys breek? Jou opregte glimlag en ’n paar gerusstellende woorde kan ’n goeie uitwerking hê. Michael, wat al meer as 40 jaar ’n ouer man is, begin sy besoeke dikwels met woorde soos: “Weet jy, een van die lekkerste voorregte van ’n ouer man is om die broers in hulle huise te besoek en hulle beter te leer ken. Daarom het ek daarna uitgesien om jou vandag te kom besoek.”

Jy kan vroeg in die besoek ’n hartgrondige gebed doen. Die apostel Paulus het tereg sy broers se geloof, liefde en volharding in sy gebede gemeld (1 Tess. 1:2, 3). Deur te sê hoe jy oor jou broer se goeie eienskappe voel, berei jy in werklikheid jou hart en syne voor om ’n opbouende gesprek te hê. Jou woorde kan ook ’n kalmerende uitwerking hê. “Ons almal vergeet soms van die goeie wat ons doen”, sê Ray, ’n ervare ouer man. “Wanneer iemand ons dan daaraan herinner, is dit verkwikkend vir ons siel.”

DEEL ’N GEESTELIKE GAWE MEE

Soos Paulus, kan jy iemand ’n “geestelike gawe” meedeel deur ’n skriftuurlike gedagte te bespreek, al is dit net uit een vers (Rom. 1:11). ’n Broer wat terneergedruk is, kan byvoorbeeld waardeloos voel, soos die psalmis wat hom vergelyk het met ’n uitgedroogde “leersak in die rook” (Ps. 119:83, 176). Nadat jy hierdie uitdrukking kortliks verduidelik het, kan jy jou vertroue uitspreek dat jou broer God se gebooie ‘nie vergeet het nie’.

En sal die illustrasie oor die verlore dragma dalk ’n suster se hart raak wat van die gemeente weggedryf het of haar ywer verloor het? (Luk. 15:8-10). Die verlore muntstuk was moontlik deel van ’n kosbare halssnoer wat uit baie silwermuntstukke bestaan het. ’n Bespreking van hierdie illustrasie kan haar help om te sien dat sy ’n waardevolle deel is van die Christengemeente. Nadat julle dit bespreek het, kan jy beklemtoon hoeveel Jehovah vir haar as een van sy skapies omgee.

Ons medegelowiges geniet dit gewoonlik om oor die Bybel te praat. Moet dus nie al die praatwerk doen nie! Jy kan ’n vers lees wat op hulle situasie van toepassing is, en dan die aandag vestig op ’n sleutelwoord of -frase en hulle vra om daaroor kommentaar te lewer. Nadat ’n ouer man 2 Korintiërs 4:16 gelees het, kan hy byvoorbeeld vra: “Het jy al self gesien op watter maniere Jehovah jou vernuwe?” So ’n benadering kan ware “wedersydse aanmoediging” tot gevolg hê.—Rom. 1:12.

Jy kan ook ’n medegelowige verkwik deur ’n Bybelkarakter te bespreek met wie hy of sy hom of haar kan vereenselwig. Iemand wat wanhopig voel, sal hom of haar moontlik kan vereenselwig met karakters soos Hanna of Epafroditus, wat soms terneergedruk gevoel het, maar nog steeds in God se oë kosbaar was (1 Sam. 1:9-11, 20; Fil. 2:25-30). Bespreek gerus ’n paar goeie Bybelvoorbeelde wanneer dit gepas is.

HOU AAN OM BELANGSTELLING TE TOON

Jy kan jou opregte besorgdheid oor jou broers en susters toon deur ná die besoek aan te hou om belangstelling in hulle te toon (Hand. 15:36). Aan die einde van die besoek sal jy dit dalk prakties vind om ’n afspraak te maak om saam in die bediening te werk. Wanneer Bernard, ’n ervare ouer man, weer gesels met ’n broer of suster wat hy onlangs besoek het, sal hy moontlik op taktvolle wyse verwys na raad wat gegee is deur te vra: “Sê vir my, het dinge goed uitgewerk?” Deur sulke persoonlike belangstelling te toon, sal jy kan bepaal of enige verdere hulp nodig is.

Dit is nou meer as ooit tevore noodsaaklik dat ons broers en susters voel dat daar na hulle omgesien word, dat hulle verstaan word en dat hulle geliefd is (1 Tess. 5:11). Voordat jy ’n herdersbesoek doen, moet jy dus tyd neem om oor jou broer se situasie na te dink. Maak dit ’n saak van gebed. Kies gepaste tekste. Dan sal jy die regte woorde vind om “die moeë siel” te verkwik!