Hoe Christenherders jou dien
DAAR is baie plekke waar ’n mens kan sien hoe herders na ’n kudde omsien. Hulle lei, beskerm en sorg vir die skape. Dit is vir Christen- ouer manne van belang, aangesien hulle werk herdersbedrywighede insluit. Trouens, dit is hulle verantwoordelikheid “om as herders toesig te hou oor die gemeente van God” en ‘op die hele kudde te let’.—Handelinge 20:28.
Hoe kan geestelike herders jou dien as jy ’n lid van die Christengemeente is? En hoe moet jy op hulle pogings ten behoewe van jou reageer? Waarom het die gemeente hulle hulp nodig?
Beskerming waarteen?
In die ou tyd was leeus en ander wilde diere ’n bedreiging vir die kuddes, en hulle het individuele skape aangeval. Herders moes beskerming bied (1 Samuel 17:34, 35). Wel, Satan die Duiwel “loop rond soos ’n brullende leeu en is daarop uit om iemand te verslind” (1 Petrus 5:8). Hy voer nie net woedend oorlog teen Jehovah se aardse organisasie in die geheel nie, maar ook teen elke individuele kneg van God. Wat is Satan se oogmerk? Hy wil Jehovah se volk ontmoedig en hulle selfs verhinder om ‘die gebooie van God te onderhou’ en ‘die werk om van Jesus te getuig’ te doen.—Openbaring 12:17.
Jehovah het die goewermentele herders van eertydse Israel daarvan beskuldig dat hulle sy skape verwaarloos het omdat sy skape as ‘voedsel van al die wilde diere van die veld gedien het’ (Esegiël 34:8). Christen- ouer manne het egter ’n hartgrondige begeerte om diegene in die gemeente te beskerm sodat niemand wegval weens verwaarlosing of weens die invloed van Satan, die wêreld of afvallige “wolwe” nie (Handelinge 20:29, 30). Hoe help die herders al die lede van die kudde om nugter van verstand en waaksaam te wees? Een manier is deur goed voorbereide skriftuurlike toesprake van die Koninkryksaal se verhoog te hou. ’n Ander manier is deur positiewe, bemoedigende gesprekke voor en ná die vergaderinge te voer. Nog ’n doeltreffende manier is deur die “skape” persoonlik by hulle huise te besoek. (Vergelyk Psalm 95:7.) Maar wat is ’n herdersbesoek? Hoe moet so ’n besoek gedoen word? En wie moet besoek word?
Wat is ’n herdersbesoek?
’n Herdersbesoek is nie bloot ’n sosiale besoek waartydens daar oor ditjies en datjies gesels word nie. Een ouer man het gesê: “Die meeste verkondigers geniet dit terdeë om ’n teks saam te lees of om ’n spesifieke Bybelkarakter te bespreek. Die ouer man doen natuurlik nie al die praatwerk nie. Die Koninkryksverkondiger wat besoek word, geniet dit gewoonlik om sy gedagtes oor die Bybel uit te spreek, en dit versterk sy eie geloof. Die ouer man kan dalk ’n Wagtoring of Ontwaak! saamneem om ’n opbouende artikel daaruit te bespreek. Miskien is dit hierdie geestelike bespreking wat ’n herdersbesoek van ’n sosiale besoek onderskei.”
’n Ander ervare ouer man het gesê: “Voor die besoek bestee die ouer man tyd daaraan om na te dink oor die verkondiger wat hy gaan besoek. Wat sal die verkondiger opbou? Opregte lof maak ’n noodsaaklike deel van herdersbesoeke uit, aangesien dit ’n mens versterk om te volhard.” Ja, ’n herdersbesoek is meer as net ’n vriendskaplike kuiertjie wat enigiemand in die gemeente kan doen.
Waarom besoek ’n herder jou?
Wanneer ’n ouer man ’n huisgesin besoek, is hy voorbereid om medegelowiges aan te moedig en hulle te help om standvastig in die geloof te wees (Romeine 1:11). Hoe reageer jy dus wanneer een of twee ouer manne sê hulle wil jou kom besoek? Een reisende opsiener het gesê: “As herdersbesoeke net gedoen word wanneer iets verkeerd is, sal die aanvanklike reaksie op die voorgestelde besoek dalk wees: ‘Wat het ek verkeerd gedoen?’” Liefdevolle geestelike herders volg Jehovah na, wat vir die psalmis gesorg het en altyd ‘sy siel verkwik het’, veral in tye van benoudheid en wanneer daar ’n spesiale behoefte was.—Psalm 23:1-4.
Die doel van ’n herdersbesoek is ‘om op te bou, nie om af te breek nie’ (2 Korintiërs 13:10). Wat veral bemoedigend is, is woorde van waardering vir die volharding, ywer en getroue werk van die persoon wat besoek word. Een ouer man het gesê: “Dit is nie goed om tydens ’n herdersbesoek die indruk te skep dat ’n mens met die doel gekom het om probleme te ontdek en te bespreek nie. Dit mag wees dat die verkondiger self oor die een of ander spesifieke probleem wil praat. En as ’n skaap sukkel of hom van die res van die kudde afsonder, moet die ouer man iets doen om te help.”
Christenherders sal ongetwyfeld spesiale sorg aan enigiemand wil verleen wat soos diegene is wat in die volgende woorde beskryf word: “Die wat verlore is, sal Ek [Jehovah] soek, en wat weggedryf is, sal Ek terugbring, en wat gewond is, sal Ek verbind, en die siekes sal Ek versterk” (Esegiël 34:16). Ja, skape moet dalk gesoek, teruggebring, verbind of versterk word. Israel se herders het hierdie verantwoordelikhede verwaarloos. Hierdie werk vereis dat ’n herder elke skaap goed leer ken en na hulle behoeftes omsien. Dit behoort basies vandag ’n kenmerkende deel van elke herdersbesoek te wees.
Gesonde skape het sorg nodig
Moet ons tot die gevolgtrekking kom dat hedendaagse geestelike herders nie aan gesonde skape spesiale aandag hoef te gee nie? Wel, wanneer ’n letterlike skaap in die moeilikheid beland, is dit baie makliker om dit te help as dit vertroue in die herder het. Een handboek sê dat “skape van nature sku vir mense is, en dat dit nie altyd maklik is om hulle vertroue te wen nie”. Dieselfde boek stel onder andere hierdie basiese riglyn voor om die vertroue van skape te wen: “Praat gereeld met die diere. Hulle raak gewoond aan die stem, en dit stel hulle gerus. Besoek gereeld die skape in die weiveld.”—Alles für das Schaf. Handbuch für die artgerechte Haltung (Alles vir die skaap. Handboek oor hoe om hulle behoorlik te versorg.)
Persoonlike kontak is derhalwe noodsaaklik vir ’n vertrouensverhouding tussen die herder en die skape. Dieselfde geld vir die Christengemeente. ’n Ouer man het gesê: “As ’n mens in die gemeente bekend staan as ’n ouer man wat die skape gereeld besoek, is dit makliker om iemand te besoek wat probleme het.” Geestelike herders moet derhalwe nie die skape net by die Koninkryksaal probeer voed en versorg nie. Ouer manne moet sover as wat omstandighede dit toelaat die skape leer ken deur herdersbesoeke by hulle huise te doen. Een Christen onthou hoe hy, toe hy nog ’n nuut aangestelde ouer man was, deur die presiderende opsiener gebel en gevra is om ’n broer te gaan besoek en te vertroos wat so pas sy dogter in ’n tragiese motorongeluk verloor het. Die ouer man erken: “Ek het verskriklik gevoel, want ek het die broer nog nooit besoek nie en het nie eens geweet waar hy woon nie! Dit was ’n verligting toe ’n ervare ouer man aangebied het om saam met my te gaan.” Ja, ouer manne help mekaar tydens herdersbesoeke.
’n Bedieningskneg, wat na die “voortreflike werk” van ’n opsiener streef, kan ’n ouer man help om vir sekere herdersbesoeke voor te berei en kan hom vergesel wanneer hy hierdie besoeke gaan doen (1 Timoteus 3:1, 13). Hoe waardeer ’n bedieningskneg dit tog om te sien hoe ’n ouer man die skape tydens herdersbesoeke dien! Ouer manne en bedieningsknegte kom dus nader aan almal in die gemeente en sodoende word die bande van Christelike liefde en eenheid versterk.—Kolossense 3:14.
Sit tyd opsy vir herdersbesoeke
Toe een liggaam van ouer manne herdersbesoeke aan die inisiatief van die Gemeentelike Boekstudiehouers oorgelaat het, is al die verkondigers in party groepe binne ses maande besoek, terwyl niemand in ander groepe besoek is nie. Dit het een ouer man beweeg om te sê: “Dit lyk asof party ouer manne die inisiatief neem en baie herderswerk doen, terwyl ander die aanmoediging van hulle mede- ouer manne nodig het om dit te doen.” Party liggame van ouer manne tref dus reëlings vir die herders om al die verkondigers binne ’n bepaalde tydperk te besoek.
’n Ouer man of enige ander verkondiger kan natuurlik iemand in die gemeente besoek sonder om vir spesiale reëlings te wag. Voordat een ouer man ’n herdersbesoek doen, bel hy en sê: “Ek besoek een gesin elke maand. Kan ek julle die een of ander tyd volgende maand so ’n uurtjie of wat kom besoek? Wanneer sal dit julle pas?”
Die seëninge van herdersbesoeke
Namate die druk van hierdie goddelose stelsel aanhou toeneem, hou bemoedigende besoeke deur simpatieke herders al hoe meer voordele in. Wanneer die hele kudde bemoediging en hulp deur middel van herdersbesoeke ontvang, voel al die skape veilig en geborge.
Aangaande ’n gemeente waarin al die Koninkryksverkondigers gereeld deur herders besoek is, is daar gesê: “Die verkondigers het baie positief oor die herdersbesoeke geraak. Dit was niks ongewoons vir ’n verkondiger om een van die ouer manne te nader en te vra wanneer hy hulle weer gaan kom besoek nie, aangesien hy of sy die opbouende bespreking tydens die vorige besoek geniet het. Herdersbesoeke was een faktor wat gehelp het om die gees van die gemeente te verbeter.” Ander verslae toon dat die gemeente in liefde, eenheid en hartlikheid kan toeneem wanneer herders liefdevol op hierdie manier dien. Wat ’n seën!
Christenherders doen besoeke om die geestelike welsyn van die skape te bevorder. Ouer manne wil hulle medegelowiges aanmoedig en versterk. As ’n ernstige probleem wat raad vereis tydens ’n besoek aan die lig kom, sal dit dalk beter wees om reëlings te tref om dit op ’n ander geleentheid te bespreek, veral as die ouer man van ’n bedieningskneg vergesel is. In alle geval, dit sal gepas wees om die herdersbesoek met ’n gebed af te sluit.
Wil ’n geestelike herder jou in die nabye toekoms by jou huis kom besoek? Indien wel, kan jy met blye afwagting uitsien na die aanmoediging wat op jou wag. Hy kom om jou te dien en te versterk in jou voorneme om op die pad te bly wat na die ewige lewe lei.—Matteus 7:13, 14.
[Venster op bladsy 26]
Wenke vir herdersbesoeke
◻ Maak ’n afspraak: Dit is gewoonlik goed om ’n afspraak te maak. As die ouer man beplan om ’n ernstige probleem te bespreek, sal dit gepas wees om die verkondiger vooraf hiervan in kennis te stel.
◻ Voorbereiding: Neem die persoon se geaardheid en omstandighede in ag. Betuig opregte lof. Stel dit jou ten doel om ’n aanmoedigende, geloofversterkende “geestelike gawe” met hulle te deel.—Romeine 1:11, 12.
◻ Wie om saam te neem: ’n Ander ouer man of ’n bekwame bedieningskneg.
◻ Tydens die besoek: Die ouer man moet ontspanne, liefdevol, positief en aanpasbaar wees. Doen navraag oor die gesin, hulle welstand, ensovoorts. Luister aandagtig. As ’n ernstige probleem aan die lig kom, sal dit dalk beter wees om reëlings vir ’n spesiale herdersbesoek te tref.
◻ Duur van die besoek: Hou by die tyd waarop julle besluit het, en gaan terwyl jou gasheer nog die besoek geniet.
◻ Om die besoek af te sluit: ’n Gebed is gepas en word werklik waardeer.—Filippense 4:6, 7.
[Prent op bladsy 24]
Christenherders bied geestelike beskerming
[Prente op bladsy 26]
Herdersbesoeke bied gulde geleenthede vir geestelike aanmoediging