Werp al julle sorge op Jehovah

1, 2. (a) Waarom moet ons nie verbaas wees as ons sorge het of angstig voel nie? (Sien prent aan begin van artikel.) (b) Wat sal ons in hierdie artikel bespreek?

ONS lewe in baie moeilike tye. Satan die Duiwel is woedend en “loop rond soos ’n brullende leeu en is daarop uit om iemand te verslind” (1 Pet. 5:8; Op. 12:17). Dit is dus nie verbasend dat ons as God se knegte ook soms sorge het of angstig voel nie. Selfs godvresende knegte van Jehovah in die verlede, soos koning Dawid, was soms angstig (Ps. 13:2). En die apostel Paulus was ‘besorg oor al die gemeentes’ (2 Kor. 11:28). Maar wat kan ons doen wanneer ons voel dat sorge ons oorweldig?

² Ons liefdevolle hemelse Vader het sy knegte in die verlede gehelp en hy kan ons ook vandag met ons sorge of angstigheid help. Die Bybel spoor ons aan: “[Werp] al julle sorge op hom . . . , want hy sorg vir julle” (1 Pet. 5:7). Maar hoe kan jy jou sorge op hom werp? Kom ons kyk na vier maniere waarop jy dit kan doen—deur opregte gebed, deur God se Woord te lees en daaroor te peins, deur Jehovah te vra vir sy heilige gees en deur met iemand te praat wat jy vertrou. Terwyl ons hierdie vier maniere bespreek, moet jy let op spesifieke punte wat jy kan toepas.

“WERP JOU LAS OP JEHOVAH”

3. Hoe kan jy ‘jou las op Jehovah werp’?

³ Die eerste ding wat ons kan doen, is om opreg tot Jehovah te bid. Wanneer jy voor situasies te staan kom wat jou onrustig, angstig of besorg laat voel, moet jy jou hart voor jou liefdevolle hemelse Vader uitstort. Die psalmis Dawid het Jehovah gesmeek: “Luister tog, o God, na my gebed.” Toe het hy in dieselfde psalm gesê: “Werp jou las op Jehovah, en hy sal jou onderskraag” (Ps. 55:1, 22). Nadat jy alles in jou vermoë gedoen het om ’n probleem op te los, moet jy dit in Jehovah se hande los. Opregte gebed sal baie meer help as om jou te bekommer. Maar hoe kan gebed jou help om nie oorweldig te word deur verontrustende gedagtes en angstigheid nie?—Ps. 94:18, 19.

4. Waarom is gebed baie belangrik wanneer ons angstig is?

⁴ Lees Filippense 4:6, 7. Hoe reageer Jehovah as ons volhard in opregte en innige gebed? Hy kan ons help om nie oorweldig te voel deur negatiewe gedagtes en gevoelens nie, want hy gee ons innerlike kalmte. Baie het dit al ondervind. God het hulle gehelp om nie angstig en besorg te voel nie, maar om eerder die vrede en kalmte te geniet wat alle denke te bowe gaan. Jy kan dit ook ondervind. “Die vrede van God” kan jou dus help om enige uitdaging te bowe te kom. Jy kan ten volle op Jehovah se liefdevolle belofte vertrou: “Moenie bang wees nie, want ek is met jou. Moenie rondkyk nie, want ek is jou God. Ek sal jou versterk. Ek sal jou werklik help.”—Jes. 41:10.

GOD SE WOORD GEE INNERLIKE VREDE

5. Hoe kan God se Woord ons help om innerlike vrede te verkry?

⁵ Die tweede manier waarop ons innerlike vrede kan verkry, is om Bybeltekste te lees en daaroor te peins. Waarom is dit belangrik? Die Bybel bevat praktiese raad wat jou kan help om angstigheid te vermy, te verminder of te hanteer. Onthou dat God se Woord nuttig en verkwikkend is omdat dit die Skepper se wysheid bevat. Wanneer jy—enige tyd van die dag of nag—nadink oor God se gedagtes en hoe jy die Bybel se praktiese raad kan gebruik, sal jy daardeur versterk word. Jehovah het getoon watter voordele dit inhou om sy Woord te lees. Dit kan ’n mens help om “moedig en sterk” te wees en om nie te “sidder of verskrik” te wees nie.—Jos. 1:7-9.

6. Watter positiewe uitwerking kan Jesus se woorde op jou hê?

⁶ In God se Woord vind ons Jesus se gerusstellende woorde. Sy woorde en leringe het ander verkwik. Hy het die swakkes versterk en die terneergedruktes vertroos, en dit het mense na hom toe aangetrek. (Lees Matteus 11:28-30.) Hy het ander se geestelike, emosionele en fisiese behoeftes liefdevol in ag geneem (Mark. 6:30-32). Jesus se belofte om sy volgelinge te help, is vandag nog van toepassing. Hy sal jou help net soos hy die apostels gehelp het. Jy hoef nie letterlik by Jesus te wees om sy hulp te ontvang nie. As hemelse Koning het Jesus nog steeds empatie met ons. Wanneer jy angstig is, kan hy jou dus liefdevol “te hulp kom”. Ja, Jesus kan jou help wanneer jy sorge het, en hy kan jou hart met hoop en moed vul.—Heb. 2:17, 18; 4:16.

DIE VRUG VAN GOD SE GEES

7. Hoe sal jy daarby baat vind as jy God vir heilige gees vra?

⁷ Jesus het belowe dat ons hemelse Vader beslis heilige gees sal gee aan dié wat Hom vra (Luk. 11:10-13). Dit beteken dat jy ’n derde en kragtige hulpmiddel het om angstigheid te verlig—die vrug van die gees. Die positiewe eienskappe wat deur God se werkende krag voortgebring word, is deel van die persoonlikheid van die almagtige God. (Lees Galasiërs 5:22, 23; Kol. 3:10.) Wanneer jy die vrug van die gees aankweek, sal jou verhouding met ander verbeter. Gevolglik sal baie minder situasies ontstaan wat angstigheid kan veroorsaak. Kom ons kyk kortliks hoe die vrug van die gees jou sal help.

8-12. Hoe kan die vrug van God se gees jou help om stresvolle situasies te hanteer of te vermy?

⁸ “Liefde, vreugde, vrede.” Wanneer jy respekvol teenoor ander probeer wees, sal jy waarskynlik vind dat jy negatiewe emosies beter kan beheers. Hoe so? As jy broederliefde, tere geneentheid en eer aan ander betoon, sal jy situasies vermy wat angstigheid kan veroorsaak.—Rom. 12:10.

⁹ “Lankmoedigheid, goedhartigheid, goedheid.” Die Bybel sê: “Word goedhartig teenoor mekaar, vol tere medelye, en vergewe mekaar vryelik” (Ef. 4:32). As jy hierdie raad toepas, bevorder dit vreedsame verhoudings en kan dit keer dat situasies ontstaan wat angstigheid veroorsaak. Jy sal ook situasies wat weens menslike onvolmaaktheid ontstaan, beter kan hanteer.

¹⁰ “Geloof.” Bekommernis oor geld en materiële besittings, veroorsaak dikwels angstigheid (Spr. 18:11). Sterk geloof in Jehovah se liefdevolle sorg kan jou help om sulke bekommernisse die hoof te bied of te vermy. Hoe so? Jy kan baie sorge vermy as jy ag gee op die apostel Paulus se geïnspireerde raad om “tevrede [te wees] met die teenwoordige dinge”. Paulus voeg by: “Want [God] het gesê: ‘Ek sal jou hoegenaamd nie verlaat of jou ooit versaak nie.’ Daarom kan ons goeie moed hou en sê: ‘Jehovah is my helper; ek sal nie bang wees nie. Wat kan die mens aan my doen?’”—Heb. 13:5, 6.

¹¹ “Sagmoedigheid, selfbeheersing.” Dink aan watter voordele dit inhou om hierdie eienskappe te openbaar. Jy sal nie dinge doen of sê wat situasies laat ontstaan wat vir jou angstigheid kan veroorsaak nie. En jy sal daarby baat vind as jy “kwaadwillige bitterheid en toorn en gramskap en geskreeu en smadende taal” vermy.—Ef. 4:31.

¹² ’n Mens moet natuurlik nederig wees om jou te onderwerp aan “die magtige hand van God” en om “al [jou] sorge op hom [te] werp” (1 Pet. 5:6, 7). Maar as jy nederigheid aankweek, sal jy God se guns en ondersteuning geniet (Miga 6:8). Jy sal besef dat jy beperkings het—fisies, verstandelik en emosioneel—en dit sal jou help om eerder op God as op jouself te vertrou en om angstigheid te verminder.

‘MOET JULLE NOOIT KWEL NIE’

13. Wat het Jesus bedoel toe hy gesê het: ‘Moet julle nooit kwel nie’?

¹³ In Matteus 6:34 (lees) vind ons Jesus se wyse raad: ‘Moet julle nooit kwel nie.’ Ons dink miskien dat dit moeilik is om hierdie raad toe te pas. Wat het Jesus bedoel toe hy gesê het: ‘Moet julle nooit kwel nie’? Hy het natuurlik nie bedoel dat ’n kneg van God nooit angstig sal wees nie. Ons het reeds gesien dat Dawid en Paulus soms bekommerd was of angstig gevoel het. Jesus het sy dissipels egter gehelp om te besef dat onnodige, of oormatige, angstigheid nie probleme oplos nie. Elke dag het sy eie uitdagings, en daarom moet Christene nie bekommernisse oor die verlede of die toekoms by hulle daaglikse sorge voeg nie. Hoe kan Jesus se raad jou help om oormatige angstigheid te verminder?

14. Wat kan jy doen as jy angstigheid ervaar weens sondes van die verlede?

¹⁴ Party mense ervaar angstigheid weens sondes van die verlede. Hulle voel dalk nog steeds skuldig oor iets wat hulle verkeerd gedoen het, selfs al was dit baie jare gelede. Koning Dawid het soms gevoel dat sy ‘oortredings soos ’n swaar vrag is’. Hy het erken: “Ek het my begin kwel oor my sonde” (Ps. 38:3, 4, 8, 18). Wat het Dawid in hierdie situasie gedoen? Hy het op Jehovah se genade en vergifnis vertrou. Hy was oortuig dat Jehovah sy sonde vergewe het.—Lees Psalm 32:1-3, 5.

15. (a) Wat kan jy doen as jy angstig is weens jou huidige situasie? (b) Wat kan jy doen om angstigheid te verminder? (Sien die venster “Praktiese maniere om angstigheid te verminder”.)

¹⁵ Soms voel jy dalk angstig oor jou huidige situasie. Toe Dawid byvoorbeeld Psalm 55 geskryf het, was sy lewe in gevaar (Ps. 55:2-5). Maar hy het nie toegelaat dat angstigheid sy vertroue in Jehovah ondermyn nie. Dawid het vurig gebid oor sy probleme, maar hy het ook geweet dat hy iets moet doen omtrent die oorsaak van sy angstigheid (2 Sam. 15:30-34). Ons kan by Dawid leer. In plaas daarvan om toe te laat dat angstigheid jou oorweldig, moet jy doen wat jy kan om die probleem op te los en sake dan in Jehovah se hande laat.

16. Hoe kan die betekenis van God se naam jou vertroue in hom versterk?

¹⁶ As ’n Christen hom bekommer oor probleme wat in die toekoms kan ontstaan, lei dit dikwels tot onnodige angstigheid. Jy moet jou dus nie bekommer of angstig wees oor dinge wat nog nie plaasgevind het nie. Waarom nie? Want dinge is dikwels nie so erg soos wat ons dink dit sal wees nie. En onthou dat die God op wie jy al jou sorge kan werp, enige situasie kan beheer. Daar word gemeen dat God se naam “Hy laat word” beteken (Eks. 3:14). Dit verseker ons dat God heeltemal in staat is om al die beloftes te vervul wat hy aan sy knegte gemaak het. Jy kan seker wees dat God sy getroue knegte kan beloon en kan help om minder angstig te voel oor die verlede, die hede en die toekoms.

PRAAT MET IEMAND WAT JY VERTROU

17, 18. Hoe kan goeie kommunikasie jou help om angstigheid te hanteer?

¹⁷ Die vierde manier waarop jy angstigheid kan verminder, is om met iemand te praat wat jy vertrou. ’n Huweliksmaat, ’n hegte vriend of ’n gemeentelike ouer man sal jou moontlik kan help om ’n gebalanseerde beskouing van jou probleme te verkry. “Angstige besorgdheid in die hart van ’n man sal dit laat neerbuig, maar die goeie woord maak dit bly” (Spr. 12:25). Openlike en eerlike kommunikasie kan jou help om realisties te wees oor jou bekommernisse en te sien wat jy daaromtrent kan doen. Die Bybel sê: “Planne misluk waar daar geen vertroulike gesprekke is nie, maar in die veelheid van raadgewers kom iets tot stand.”—Spr. 15:22.

¹⁸ Jehovah help Christene ook deur middel van weeklikse gemeentelike vergaderinge om sorge of angstigheid te verlig. Daar kan jy assosieer met medegelowiges wat vir jou omgee en wat mekaar wil aanmoedig (Heb. 10:24, 25). Hierdie “wedersydse aanmoediging” sal jou geestelik versterk en dit makliker maak om angstigheid te hanteer.—Rom. 1:12.

JOU VERHOUDING MET GOD—DIE GROOTSTE BRON VAN KRAG

19. Waarom kan jy seker wees dat jou verhouding met God vir jou ’n bron van krag sal wees?

¹⁹ Kyk hoe ’n gemeentelike ouer man in Kanada geleer het dat dit belangrik is om sy sorge op Jehovah te werp. Hy het ’n stresvolle werk as ’n onderwyser en ’n voorligter. Hy ly ook aan ’n angsversteuring. Wat het hierdie broer gehelp? Hy verduidelik: “Ek werk hard om my verhouding met Jehovah te versterk, en dit is wat my die meeste krag gee om emosionele probleme te verwerk. Die ondersteuning van ware vriende en geestelike broers is baie belangrik. Ek praat openlik met my vrou oor my gevoelens. Mede- ouer manne en ons kringopsiener het my baie gehelp om dinge in perspektief te sien. Ek het ook mediese hulp gekry, my rooster verander en tyd opsygesit om te ontspan en oefening te doen. Met verloop van tyd het ek gevoel dat ek weer in beheer is. Dinge wat ek nie kan beheer nie, laat ek in Jehovah se hande.”

20. (a) Hoe kan ons ons sorge op God werp? (b) Wat sal ons in die volgende artikel bespreek?

²⁰ In hierdie artikel het ons bespreek hoe belangrik dit is om ons sorge op God te werp deur uit die hart tot hom te bid, deur sy Woord te lees en daaroor te peins. Ons het ook bespreek dat dit belangrik is om die vrug van sy gees aan te kweek, met iemand te praat wat ons vertrou en met ons broers en susters te assosieer. Die volgende artikel sal bespreek hoe Jehovah ons versterk deur ons die hoop op ’n beloning te gee.—Heb. 11:6.