Pas op dat niemand julle gevange neem nie!

1. Hoe probeer Satan volgens Kolossense 2:4, 8 om ons denke gevange te neem?

SATAN wil hê dat ons ons rug op Jehovah moet draai. Om sy doelwit te bereik probeer hy ons denke beïnvloed, om ons verstand in werklikheid gevange te neem en ons aan hom gehoorsaam te maak. Hy probeer ons bedrieg of oortuig om hom te volg deur ons begeertes as ’n strik te gebruik. – Lees Kolossense 2:4, 8. 

2-3. (a) Hoekom moet ons ag slaan op die waarskuwing in Kolossense 2:8? (b) Wat sal ons in hierdie artikel bespreek?

² Is ons werklik in gevaar om deur Satan mislei te word? Ja, ons is! Onthou dat Paulus nie die waarskuwing in Kolossense 2:8 vir ongelowiges geskryf het nie. Hy het dit geskryf vir Christene wat met heilige gees gesalf is (Kol. 1:2, 5). Daardie Christene was destyds in gevaar, en vandag is ons in selfs groter gevaar (1 Kor. 10:12). Hoekom? Satan is na die aarde neergegooi en hy is daarop uit om God se lojale knegte te mislei (Op. 12:9, 12, 17). En ons lewe gedurende ’n tyd dat goddelose mense en bedrieërs “voortgaan van kwaad tot erger”. – 2 Tim. 3:1, 13.

³ In hierdie artikel sal ons bespreek hoe Satan “leë bedrog” gebruik om ons denke te probeer beïnvloed. Ons sal drie van sy “sette”, of planne, identifiseer (Ef. 6:11). In die volgende artikel sal ons bespreek hoe om enige negatiewe uitwerking teë te werk wat sy taktieke dalk op ons denke gehad het. Maar kom ons bespreek eerstens wat ons kan leer uit die manier hoe Satan die Israeliete mislei het nadat hulle die Beloofde Land binnegegaan het.

IN DIE VERSOEKING OM AFGODEDIENS TE BEOEFEN

4-6. Watter veranderinge moes die Israeliete volgens Deuteronomium 11:10-15 in die Beloofde Land maak ten opsigte van hulle boerderymetodes?

⁴ Satan het die Israeliete op ’n baie slinkse manier versoek om afgodediens te beoefen. Hoe het hy dit gedoen? Hy het geweet dat hulle kos nodig gehad het en hy het hierdie behoefte teen hulle gebruik. Toe die Israeliete die Beloofde Land binnegegaan het, moes hulle die manier verander waarop hulle kos gekweek het. Terwyl die Israeliete in Egipte was, het hulle die landerye natgemaak met water wat uit die Nyl gekom het. Maar in die Beloofde Land was daar nie ’n groot rivier waaruit water gekry kon word om landerye nat te maak nie; hulle was afhanklik van seisoenale reën en van dou om die plantegroei nat te maak. (Lees Deuteronomium 11:10-15; Jes. 18:4, 5.) Daarom moes die Israeliete nuwe boerderymetodes aanleer. Dit sou nie maklik wees nie omdat die meeste mense wat enige ondervinding in boerdery gehad het, in die woestyn gesterf het.

⁵ Jehovah het aan sy volk verduidelik dat hulle omstandighede verander het. Toe het hy die volgende waarskuwing bygevoeg, wat aanvanklik dalk lyk asof dit niks met landbou te doen het nie: “Let op julleself sodat julle hart nie verlok word en julle afwyk en ander gode aanbid en julle voor hulle neerbuig nie” (Deut. 11:16, 17). Hoekom het Jehovah hulle teen afgodediens gewaarsku terwyl hy met hulle oor nuwe boerderymetodes gepraat het?

⁶ Jehovah het geweet dat die Israeliete in die versoeking sou kom om die plaaslike boerderymetodes van die heidense mense rondom hulle aan te leer. Die Israeliete se bure het natuurlik baie meer ondervinding as hulle gehad, en God se volk kon nuttige vaardighede by hulle leer, maar daar was ’n gevaar. Omdat daardie Kanaänitiese boere Baälaanbidding beoefen het, is hulle denke daardeur beïnvloed. Hulle het Baäl beskou as die eienaar van die lug en die een wat reën gee. Jehovah wou nie hê dat sy volk deur sulke valse leringe bedrieg moes word nie. Maar die Israeliete het oor en oor gekies om Baäl te aanbid (Num. 25:3, 5; Rigt. 2:13; 1 Kon. 18:18). Let nou op hoe Satan dit reggekry het om die Israeliete gevange te neem.

DRIE TAKTIEKE WAT SATAN GEBRUIK HET OM DIE ISRAELIETE GEVANGE TE NEEM

7. Hoe is die Israeliete se geloof getoets toe hulle die Beloofde Land binnegegaan het?

⁷ Satan se eerste taktiek was om ’n normale begeerte na reën om die landerye nat te maak, as ’n strik te gebruik. Dit het elke jaar vanaf laat April tot September baie min in die Beloofde Land gereën. Lewe en ’n suksesvolle oes het afgehang van die reën wat gewoonlik omtrent Oktober begin het. Satan het die Israeliete bedrieg deur hulle te laat dink dat hulle die gebruike van hulle heidense bure moes volg as hulle voorspoedig wou wees. Daardie bure het geglo dat hulle sekere rituele moes uitvoer sodat hulle gode dit sou laat reën. Dié wat nie geloof in Jehovah gehad het nie, het geglo dat dít die enigste manier was om ’n lang droogte te voorkom, en daarom het hulle heidense rituele uitgevoer om die valse god Baäl te eer.

8. Wat is ’n tweede taktiek wat Satan gebruik het? Verduidelik.

⁸ Satan het ’n tweede taktiek gebruik om die Israeliete te vang. Hy het onsedelike begeertes as ’n strik gebruik. Die heidense nasies het hulle gode aanbid deur walglike onsedelike dade te doen. Hierdie onsedelike vorm van aanbidding het vroulike sowel as manlike tempelprostitusie ingesluit. Homoseksualiteit en ander vorme van seksuele onsedelikheid is nie net verdra nie, maar dit het normaal geword! (Deut. 23:17, 18; 1 Kon. 14:24). Die heidene het geglo dat hierdie rituele hulle gode aangespoor het om die land vrugbaar te maak. Baie Israeliete het gehou van die heidene se seksueel onsedelike rituele en het toegelaat dat hulle mislei word om valse gode te aanbid. In werklikheid is hulle deur Satan gevange geneem.

9. Hoe het Satan volgens Hosea 2:16, 17 die Israeliete se beskouing van Jehovah beïnvloed?

⁹ Satan het ’n derde taktiek gebruik. Hy het die Israeliete se beskouing van Jehovah beïnvloed. In die profeet Jeremia se dag het Jehovah gesê dat die valse profete Sy volk sover gekry het om Sy naam te vergeet as gevolg van Baäl (Jer. 23:27). God se volk het blykbaar opgehou om Jehovah se naam te gebruik en het dit vervang met die naam Baäl, wat “eienaar” of “meester” beteken. Dit sou veroorsaak dat die Israeliete nie meer die verskil tussen Jehovah en Baäl duidelik sou kon sien nie, wat dit vir hulle makliker sou maak om die rituele van Baälaanbidding te meng met hulle aanbidding van Jehovah. – Lees Hosea 2:16, 17.

DIE TAKTIEKE WAT SATAN VANDAG GEBRUIK

10. Watter taktieke gebruik Satan vandag?

¹⁰ Satan gebruik vandag dieselfde taktieke. Hy neem mense gevange deur hulle natuurlike begeertes as ’n strik te gebruik, seksuele onsedelikheid te bevorder en mense se beskouing van Jehovah te beïnvloed. Kom ons bespreek eers die laaste taktiek.

11. Hoe het Satan mense se beskouing van Jehovah beïnvloed?

¹¹ Satan beïnvloed mense se beskouing van Jehovah. Ná die dood van Jesus se apostels het party wat gesê het dat hulle Christene is, valse leringe begin versprei (Hand. 20:29, 30; 2 Tess. 2:3). Hierdie afvalliges het die identiteit van die enigste ware God onduidelik begin maak. Byvoorbeeld, hulle het opgehou om God se naam in hulle kopieë van die Bybel te gebruik en het dit vervang met titels soos “Here”. Deur God se naam te verwyder en dit te vervang met “Here”, het hulle dit vir mense wat die Bybel lees, moeilik gemaak om te sien hoe Jehovah anders is as die ander “here” wat in die Bybel genoem word (1 Kor. 8:5). Hulle het dieselfde woord, “Here”, vir Jehovah en vir Jesus gebruik, wat dit moeilik maak om te verstaan dat Jehovah en sy Seun verskillende persone met verskillende posisies is (Joh. 17:3). Hierdie verwarring het bygedra tot die ontstaan van die Drie-eenheidsleer – ’n leerstelling wat glad nie in die Bybel voorkom nie. As gevolg hiervan glo baie mense dat dit onmoontlik is om God te ken. Wat ’n leuen! – Hand. 17:27.

12. Wat word deur valse godsdiens bevorder, en met watter gevolg, soos in Romeine 1:28-31 verduidelik word?

¹² Satan gebruik onsedelike begeertes as ’n strik. In die dae van eertydse Israel het Satan valse godsdiens gebruik om onsedelikheid te bevorder. Vandag doen hy dieselfde. Valse godsdiens verdra onsedelike gedrag en bevorder dit selfs. Gevolglik is baie mense wat sê dat hulle God dien, nie meer gehoorsaam aan sy duidelike sedelike standaarde nie. Die apostel Paulus beskryf in sy brief aan die Romeine wat die gevolg hiervan is. (Lees Romeine 1:28-31.) Alle vorme van seksuele onsedelikheid, insluitende homoseksualiteit, is deel van “die dinge . . . wat nie gepas is nie” (Rom. 1:24-27, 32; Op. 2:20). Dit is so belangrik dat ons die Bybel se duidelike leringe gehoorsaam!

13. Wat is nog ’n taktiek wat Satan gebruik?

¹³ Satan gebruik natuurlike begeertes as ’n strik. Ons het ’n natuurlike begeerte om vaardighede aan te leer wat ons kan help om vir onsself en ons gesin te sorg (1 Tim. 5:8). Dikwels kan ons hierdie vaardighede leer deur skool te gaan en goeie studente te wees. Maar ons moet versigtig wees. Die onderwysstelsel in baie lande leer studente nie net praktiese vaardighede nie, maar ook die filosofieë van mense. Studente word aangespoor om God se bestaan te bevraagteken en om geen respek vir die Bybel te hê nie. Daar word vir hulle gesê dat die teorie van evolusie die enigste intelligente verduideliking is vir die oorsprong van die lewe (Rom. 1:21-23). Sulke leringe stem nie ooreen met “die wysheid van God” nie. – 1 Kor. 1:19-21; 3:18-20.

14. Wat word deur die filosofieë van mense bevorder?

¹⁴ Die filosofieë van mense ignoreer of weerspreek Jehovah se regverdige standaarde. Dit bevorder nie die vrug van God se gees nie, maar eerder “die werke van die vlees” (Gal. 5:19-23). Dit spoor mense aan om trots en arrogant te wees, en die gevolg is dat mense “liefhebbers van hulleself” word (2 Tim. 3:2-4). Hierdie eienskappe is die teenoorgestelde van die sagmoedige, nederige gees wat God se knegte aangespoor word om te hê (2 Sam. 22:28). Party Christene wat universiteit toe gegaan het, se verstande is deur menslike denke eerder as deur God se denke gevorm. Kom ons kyk na net een voorbeeld van wat kan gebeur.

15-16. Wat leer jy uit die ondervinding van een suster?

¹⁵ ’n Suster wat al meer as 15 jaar in die voltydse diens is, sê: “As ’n gedoopte Getuie het ek gehoor van en gelees oor die gevare wat dit inhou om universiteit toe te gaan, maar ek het my nie aan sulke waarskuwings gesteur nie. Ek het gedink dat die raad nie op my van toepassing is nie.” Watter uitdagings het sy gehad? Sy erken: “My studiekursusse het so baie van my tyd en energie gevat dat ek nie meer lank en rustig met Jehovah in gebed kon praat nie, en ek was te moeg om Bybelbesprekings met ander te hou en te moeg om goed vir vergaderinge voor te berei. Maar die oomblik toe ek besef dat hoër onderwys my so besig hou dat dit my verhouding met Jehovah benadeel, het ek geweet dat ek moes ophou. En ek het.”

¹⁶ Watter uitwerking het hoër onderwys op hierdie suster se denke gehad? Sy sê: “Ek is skaam om te erken dat die opvoeding wat ek gekry het, my geleer het om krities teenoor ander te wees, veral teenoor my broers en susters, om te veel van hulle te verwag en om my van hulle af te sonder. Dit het my lank geneem om hierdie lesse af te leer. Daardie tyd in my lewe het vir my gewys presies hoe gevaarlik dit is om die waarskuwings te ignoreer wat ons hemelse Vader deur sy organisasie aan ons gee. Jehovah het my beter geken as wat ek myself geken het. As ek maar net geluister het!”

17. (a) Wat moet ons vasbeslote wees om te doen? (b) Wat sal ons in die volgende artikel bespreek?

¹⁷ Wees vasbeslote om nooit ’n gevangene te word van “die filosofie en leë bedrog” van Satan se wêreld nie. Hou aan om te waak teen Satan en sy taktieke (1 Kor. 3:18; 2 Kor. 2:11). Moet nooit toelaat dat hy jou beskouing van Jehovah beïnvloed nie. Volg Jehovah se hoë sedelike standaarde. En moenie toelaat dat Satan jou mislei om Jehovah se raad te ignoreer nie. Maar sê nou jy kom agter dat jy reeds deur die denke van hierdie wêreld beïnvloed is? Die volgende artikel sal bespreek hoe God se Woord ons kan help om selfs “sterk verskanste” denke en gewoontes af te breek. – 2 Kor. 10:4, 5.