Gebruik onderrigvermoë in die bediening van huis tot huis
1 Jesus was bekend as ’n verkondiger van die goeie nuus (Luk. 8:1). Maar hy is meer dikwels aangespreek en na verwys as ’n leermeester (Matt. 8:19, NW; 9:11, NAV). Die geïnspireerde verslag berig dat “die skare verslae [was] oor sy leer”, en dat “Hy die dorpe rondom deurgegaan en geleer” het.—Matt. 7:28; Mark. 6:6.
2 Die apostels was eweneens onderrigters. Soos dit Paulus se gewoonte was, het hy ‘uit die Skrif met die Jode geredeneer, dit uitgelê en daaruit aangetoon’ wat hy hulle geleer het (Hand. 17:2, 3, NAV). Hy het ’n deeglike getuienis gelewer oor die Koninkryk van God en mense probeer oortuig aangaande Jesus (Hand. 28: 23). Wat kan ons doen om ons onderrigvermoë in die huis-tot-huisbediening te verbeter?
WEES AANPASBAAR
3 Wanneer ons van huis tot huis gaan, kom ons mense teë met sterk uiteenlopende agtergronde en belangstellings. Party bely dat hulle in die Bybel glo, ander nie. Ons moet ons boodskap aanpas by die individuele huisbewoner. Wat het Jesus gedoen toe hy met ’n “wetgeleerde” gepraat het? Die man het vir Jesus gevra: “Meester, wat moet ek doen om die ewige lewe te beërwe?” Jesus het geantwoord: “Wat is in die wet geskrywe? Hoe lees jy?” (Luk. 10:25-28). Hy het in aanmerking geneem dat die man ’n “wetgeleerde” was, en dit het uit sy antwoord geblyk.
4 Toe Paulus in die Areopagus gepreek het, het hy in gedagte gehou dat hy met nie-Jode gepraat het wat min of geen kennis van die Hebreeuse Skrifte of van Jesus Christus gehad het nie. Hy het dinge dienooreenkomstig verduidelik (Hand. 17:22-34). Ons moet eweneens in ag neem met wie ons praat. As ons met ’n kind praat, moet ons dinge verduidelik op ’n vlak wat hy sal verstaan. As ons met iemand praat wat die Bybel lees, moet ons ons by die situasie aanpas, net soos Jesus met die “wetgeleerde” gedoen het. Omdat elke persoon met wie ons praat anders is, sal elke aanbieding wat ons doen waarskynlik effens van ander verskil. Wat kan ons nog doen om bekwame onderrigters in die huis-tot-huisbediening te wees?
.REDENEER MET MENSE
5 Wanneer ’n mens redeneer, beteken dit dat jy die boodskap op so ’n manier aanbied dat jy die huisbewoner help om te verstaan en om tot dieselfde slotsom as ons te kom. Dit vereis dat ons gedagtes deeglik verduidelik, sodat die huisbewoner nie net sal luister nie maar die redelikheid van ons aanbieding sal insien. Hoe kan ons gedagtes doeltreffend verduidelik?
6 Die vraag waarom vra om redes. Elke huisbewoner het die volste reg om te vra waarom ons hom besoek, waarom ons boodskap so dringend is en waarom hy dit moet glo. Vra jouself dus hierdie selfde vrae af wanneer jy vir die huis-tot-huisbediening voorberei. Ons huidige ‘Onderwerp vir gesprekke’ is byvoorbeeld “Staan ons op die drumpel van Armageddon?” Ons kan onsself afvra: Waarom praat ons met die mense oor hierdie onderwerp? Waarom bring God hierdie oorlog? Waarom is ons so seker dat dit sal gebeur? Waarom glo ek die boek Openbaring? En, as ons bykomende tekste gaan gebruik, waarom gaan ek hulle lees?
7 As ons eers die antwoorde op hierdie vrae ken, wil ons dinge op so ’n manier verduidelik dat die huisbewoner sal verstaan. Onthou, Paulus het die Skrif deur middel van “verwysinge” verduidelik.—Hand. 17: 3, NW.
8 Illustrasies en gepaste vrae is baie nuttig. Dit laat mense oor waarhede nadink en help hulle om hartgrondige waardering op te bou. Beklemtoon die sleutelwoorde behoorlik wanneer jy tekste lees. Dit help mense om na te dink oor wat gelees is. Die Skoolhandleiding bevat spesifieke wenke hieroor in studies 10, 15, 25, 31 en 34. Staan tyd daaraan af om daardie wenke na te gaan, en pas hulle toe wanneer jy aan die huis-tot-huisbediening deelneem.
9 Ons verantwoordelikheid om mense alles te leer wat Jesus ons beveel het, behoort ons te beweeg om ernstig na te dink oor hoe noodsaaklik dit is om ,op ons leer te let’ (1 Tim. 4:16). Dit verg tyd en inspanning om die onderrigkuns aan te leer. Paulus het vir Timotheüs gesê dat diegene “wat arbei in woord en leer” “dubbele eer waardig geag word” (1 Tim. 5: 17). Moenie huiwer om die ouere manne en ander bekwame verkondigers om hulp te vra nie. Bid voortdurend dat Jehovah ons sal seën terwyl ons aanhou om ons ‘toe te lê op onderwysing’.—1 Tim. 4:13, NW.