Bied die Goeie Nuus Aan—Op straat en in sakegebied
1 “Ons God [het] ons die moed gegee om sy evangelie aan julle te verkondig” (1 Thess. 2:2, NAV). Hierdie woorde van die apostel Paulus herinner ons daaraan dat dit moed verg om die goeie nuus te verkondig. Dit is veral met talle die geval wanneer hulle die goeie nuus op straat en vir sakemense aanbied.
2 Een reisende opsiener het gesê: “Baie broers en susters, selfs party wat al baie jare in die waarheid is, het nog nie straatwerk gedoen nie.” As jy in ’n stad woon en nog nie aan hierdie aspek van die diens deelgeneem het nie, kan jy gerus nou die inisiatief neem en die vreugde en seëninge van straatwerk smaak. Straatwerk moet egter reg gedoen word ten einde suksesvol en aangenaam te wees.—Vergelyk Spreuke 22:29.
NADER MENSE OP STRAAT
3 Dit is oor die algemeen baie doeltreffender om mense te nader as om net op een plek te staan of die tydskrifte te loop en vertoon. Aangesien die doel van straatwerk is dat jy met mense oor die goeie nuus praat, moet jy ’n gebied kies waar daar heelwat voetgangers is. Een pionierbroer wat gereeld 400 tot 500 tydskrifte per maand versprei, werk naby winkels en banke wat Vrydae en Saterdae baie besig is. Gebruik ’n inleiding wat dadelik mense se aandag sal trek wanneer jy hulle nader. Maar lê goeie oordeel aan die dag sodat jy niemand bang- of skrikmaak nie. Wees positief en vriendelik en loop saam met die persoon wanneer dit gepas is.
4 Kies die spesifieke artikels in Die Wagtoring of Ontwaak! waarop jy die aandag gaan vestig voordat jy straatwerk doen. Dink aan interessante vrae wat jy aan mense kan stel. ’n Suster het in straatwerk vir ’n man wat verbygeloop het, gevra: “Het u al ooit gewonder waarom daar so baie gelowe is?” Hy het net aangehou loop. Sy het gou, dog vriendelik, voortgegaan: “Dit is ’n goeie vraag, nie waar nie?” Die man het gaan staan en gesê: “Ja, dit is.” Hy het omgedraai, teruggekom en die tydskrifte geneem. Haar kort, direkte vrae het resultate gelewer.
IN SAKEGEBIED
5 Sakegebied bied ’n uitstekende geleentheid om mense te bereik wat ons gewoonlik nie tuis vind nie. Verslae toon egter dat baie min verkondigers in sakegebied werk. Dit is moontlik weens ’n gebrek aan ondervinding dat baie geneig is om hierdie werk te vermy. Is dit ’n gebied waarin jy moed bymekaar moet skraap?
6 Die Genootskap het deur die jare heen praktiese wenke gegee rakende die dekking van sakegebied: Wees netjies geklee; besoek ondernemings wanneer dit stil is; nader die bestuurder; wees bondig en saaklik. (Kyk Ons Koninkryksbediening vir September 1984.) Stel gerus hierdie wenke op die proef indien jy dit nog nie probeer het nie.
7 Het julle gemeente sakegebied? Nader die diensopsiener as jy nog nie van winkel tot winkel gewerk het nie en dit graag wil doen. Hy kan reël dat ’n ervare broer of suster saam met jou gaan. Oefensessies is nuttig. As jy voorbereid is en jou aanbieding duidelik in gedagte het, sal dit jou die vertroue en selfversekerheid gee wat jy nodig het om sukses in sakegebied te behaal. Bid om Jehovah se seën op jou werk.
8 Ons kan seker wees dat Jehovah ons pligsgetroue pogings om mense met sy lewensreddende boodskap te bereik, sal seën. Dit is dringend dat ’n deeglike getuienis gelewer word. Aangesien dit dikwels moeilik is om mense tuis te vind, moet ons van geleenthede gebruik maak om op straat en in sakegebiede met mense te praat. Hoewel straatwerk en getuieniswerk in sakegebied miskien vir ons ’n uitdaging bied, kan ons sukses behaal as ons die moed bymekaarskraap om die evangelie van God te verkondig.