Ons aandeel in teokratiese onderdanigheid
1 Teokratiese onderdanigheid is ’n sleutelfaktor in die groei en geestelike vooruitgang van ’n gemeente. Paulus het dit in Hebreërs 13:17 beklemtoon: “Wees gehoorsaam aan julle voorgangers en onderdanig, want hulle waak vir julle siele as diegene wat rekenskap moet gee.” Dit toon dat die geestelike welsyn van die gemeente as ’n geheel, asook van individue, afhang van ons bereidwilligheid om ten nouste met die ouere manne saam te werk terwyl hulle hulle verantwoordelikhede as herders van die kudde nakom.
2 Paulus het dit verder beklemtoon met hierdie beroep: “Ons vra julle, broeders, erken die wat onder julle arbei en julle voorgangers in die Here is en julle vermaan; en bewys hulle in liefde die hoogste agting ter wille van hulle werk” (1 Thess. 5:12, 13). Ons toon hierdie agting deur nie net eerbiedig teenoor die ouere manne te wees nie, maar, nog belangriker, deur alles in ons vermoë te doen om hulle te help om hulle werk te verrig.
DIE WERK VAN OUERE MANNE
3 Beskou ’n paar van die verantwoordelikhede wat aan die ouere manne toegewys is. Buiten onderrigting by vergaderinge neem hulle ook die leiding in die veldbediening (1 Pet. 5: 2, 3). Daar moet na korrespondensie met die Genootskap en ander nodige sake omgesien word. (Vergelyk Handelinge 6:1-6.) Hulle sien om na die geestelike welsyn van diegene wat Probleme het, en help hulle om enigiets te vermy wat hulle verhouding met Jehovah in die gevaar kan stel (Joh. 10:11, 15). Daar word dus van hulle vereis om baie tyd te bestee aan sake rakende die Koninkrykswerk.
DRA JOU EIE PAK
4 Aangesien ons almal onvolmaak is, gee ons mekaar soms aanstoot, wat gespanne verhoudinge veroorsaak. Maar geringe persoonlike geskille moet gou en privaat opgelos word (Kol. 3:12-14; omAF bl. 139-40). As jy daarvan oortuig is dat iemand in die gemeente hom skuldig gemaak het aan ’n ernstige sonde teen jou, moet jy jou nie haas om die opsieners, of iemand anders, te versoek om ten behoewe van jou tussenbei te kom nie. Jy moet, soos Jesus vermaan het, privaat met die persoon gaan praat teen wie jy ’n klag het (Matt. 18:15,16; omAF bl. 142, par. 2, 3). As jy nie die saak kan oplos nie, en dit aan die ouere manne oorgegee word om te ondersoek en daaroor te beslis, moet jy die probleem aan hulle oorlaat en op Jehovah vertrou dat dit opgelos sal word.
5 Ons kan die ouere manne baie help deur Skriftuurlike beginsels te volg wat ons aanspoor om beskeie en kuis te wees en om ywerig na ons gesinsverantwoordelikhede om te sien (omAF bl. 63-4; Tit. 2:2-5). Ons kleredrag, persoonsversorging en dekorum moet getuig van die waardigheid wat pas by die aanbidding van Jehovah by sy huis (Pred. 4:17; 1 Tim. 2:9, 10; Gal. 6:4, 5). Ons pligsgetroue pogings op hierdie gebiede sal help om ’n gesonde gees in die gemeente te bewaar.
6 Die ouere manne is besorg oor die stiptelike, ordelike hantering van gemeentelike sake. Hulle stel dit hoog op prys wanneer ons gereeld velddiens doen, ons rapporte stiptelik ingee, en ons toewysings in die Teokratiese Bedieningskool nakom. Dit help ook wanneer ons ons ontoegekende gebied deeglik dek en ons aandeel daarin stiptelik rapporteer. Nog ’n goeie manier waarop ons die ouere manne kan help, is as ons ons deel doen om die Koninkryksaal skoon en in stand te hou. —Neh. 10:39.
HELP ANDER
7 Dit is vir die ouere manne van die allergrootste belang om die gemeente geestelik sterk en bedrywig te hou (1 Thess. 2:7, 8). Ons kan persoonlik daartoe bydra om ander te help deur ‘die kleinmoediges te bemoedig, die swakkes te ondersteun’ (1 Thess. 5: 14). Ons ywer vir die predikingswerk spoor ander aan om meer te doen. ’n Lewendige belangstelling in ons broers help om die gemeentes sterk te hou.—Filip. 2:4.
8 Hoewel die ouere manne dus toegewys is om toesig te hou oor die kudde, moet elkeen sy deel bydra om “die groei van die liggaam [te] bevorder vir sy eie opbouing in liefde” (Ef. 4:16; Spr. 11:14). As ons besef watter belangrike rol teokratiese onderdanigheid in die geestelike groei van die gemeente speel, sal ons die ouere manne ‘dubbele eer waardig ag’ en hulle heelhartig ondersteun terwyl hulle toesig hou oor die kudde van God.—1 Tim. 5:17.