Gebruik die Index om geestelik te groei
1 Vanaf 1930 tot 1985 het die Genootskap ’n oorvloedige verskeidenheid Bybelstudiehulpe voorsien wat saam ’n unieke biblioteek van onontbeerlike inligting uitmaak. Hierdie geestelike voedsel is progressief as “voedsel op tyd” voorsien om opregte mense te help om ‘toe te neem in die kennis van onse Here en Saligmaker, Jesus Christus’ (Matt. 24:45; 2 Pet. 3: 18). Nou het ons die Watch Tower Publications Index 1930-1985 wat dit betreklik maklik vir ons maak om spesifieke inligting te kry. Dit kan ons grootliks help in ons pogings om verder geestelike vooruitgang te maak.—Spr. 4:18; 9:9.
2 As ons weet hoe om die Index te gebruik, sal dit makliker wees om die nodige informasie te vind vir die voorbereiding van toesprake, velddiensaanbiedinge, projekte en opstelle, of om vrae wat met ons Christengeloof verband hou te beantwoord. Dit kan van onskatbare waarde wees in ons persoonlike en gesinstudie, in voorbereiding vir Christenvergaderinge, en om die goeie nuus aan ander te verkondig en hulle te onderrig (Kol. 4:6). Ons moet vertroud raak met die verskillende eienskappe daarvan.
EIENSKAPPE
3 ’n Nuttige verandering in hierdie nuwe Index is dat gereelde rubrieke van Die Wagtoring en Ontwaak! aangegee word onder hulle eie titels, soos “Vrae van lesers”, “Jongmense vra ...” en “Die Bybelse beskouing”. Besprekingspunte van “Vraebus” uit Ons Koninkryksbediening word afsonderlik onder daardie hofie aangegee. Op hierdie manier kan spesifieke inligting maklik bekom word om in die spesifieke behoeftes van ouers, opsieners en verkondigers te voorsien, of om persoonlike Bybelstudie en navorsing te vergemaklik.
4 Nog ’n puik eienskap van hierdie Index is die afdeling onder “Dates”, met die tussenhofies “B.C.E”, “C.E.” en “Clarification of Beliefs”. Die teksregister met verwysings na Aid to Bible Understanding is ook hersien sodat net die verwysings wat betekenisvolle verduidelikings oor die vermelde verse verskaf, gegee word.
5 Die Index help ons om die progressiewe ontwikkeling van ons begrip van baie tekste en Bybelonderwerpe te waardeer. (Kyk bladsy 5, paragraaf 6 van Index.) Die informasie wat in hierdie indeks oor die woord “porneia” opgeneem is, illustreer dit goed. Onder “meaning of word” verskyn die jongste verwysings, soos met alle tussenhofies, eerste. Verdere inligting oor die onderwerp kan onder ander tussenhofies soos “Scriptural ground for divorce” en “sexual practices within marriage not” gevind word.—Kyk Index, bladsy 669.
WAARDEVOLLE INSTRUMENT
6 Spreuke 2:4, 5 spoor ons aan om na kennis van God te soek net soos ons na ’n verborge skat sal soek. Ons moet Jehovah se woorde en wette ondersoek en na wysheid, onderskeidingsvermoë en insig soek. Hierdie soeke verg inspanning en volharding. Dit vereis dat ons baie diep moet delf. Wat ’n nuttige instrument waarmee ons dit kan doen, het “die getroue en verstandige dienskneg”-klas tog aan ons verskaf! Laat ons die Index ten beste benut.