Verrig heilige diens met godvrugtige vrees

1 Gedurende die 1988-diensjaar het die Genootskap talle briewe ontvang wat getuig van innige waardering vir die kringbyeenkomsprogram, “Die oortreffende waarde van diens aan Jehovah”. Hierdie briewe het soortgelyke gevoelens uitgespreek as die van die psalmis wat gesê het: “Een dag in u voorhowe is beter as duisend elders” (Ps. 84:10, NW). Ons weet dat julle almal soortgelyke gevoelens het oor ons groot voorreg om Jehovah te dien en dat julle ook by hierdie program baat gevind het.

2 Die nuwe kringbyeenkomsprogram wat in September begin, sal die tema ‘Verrig heilige diens met godvrugtige vrees’ ontwikkel (Hebr. 12:28, NW). Terwyl die wêreld Jehovah op dwase wyse ignoreer en die boodskap van sy Koninkryk verag, verbly ons ons in ons voorreg om heilige diens met godvrugtige vrees te verrig. Waarlik, ’n heilsame vrees van Jehovah is “die begin van wysheid”; dit is “rein” en beweeg ons om sy wil te doen (Ps. 19:10; 111:10, NW). Die kringbyeenkomsprogram vir die 1989-diensjaar sal ons help om in groter mate te besef wat die vrees van Jehovah is en hoe ons dit in ons diens aan hom kan openbaar.

3 Met die verloop van die program sal ons leer hoe godvrugtige vrees ons in ons bediening, in ons vergaderingbywoning en in ons daaglikse lewe moet beinvloed. Daar sal bespreek word hoe noodsaaklik dit is om enige gaping tussen wat ons weet en wat ons doen te oorbrug. Ons moet nie net weet wat om te doen nie maar ook hoe om die dinge wat ons leer toe te pas sodat ons onsself en ander bevoordeel en onse God tot eer strek.

4 Die openbare toespraak se titel is: “Waarom moet ons die ware God vrees?” Maak seker dat jy jou Bybelstudente asook ander belangstellendes uitnooi. Ons almal wil beslis ons sake so reël dat ons dit kan bywoon en ten volle by hierdie uitstekende tweedaagse program kan baat vind. Julle kringopsiener sal julle inlig waar en wanneer julle gemeente se kringbyeenkoms sal wees.