Help kinders om nie ‘die dinge te vergeet’ wat Jehovah gedoen het nie
1 Toe die Israeliete op die drumpel van die Beloofde Land gestaan het, het Jehovah God ouers opdrag gegee om nie ‘die dinge te vergeet’ wat hy gedoen het nie. Maar dit was ook belangrik dat hulle kinders en kindskinders geleer moet word. Daarom het hy ouers beveel om ‘sy woorde aan hulle kinders en kindskinders bekend te maak’. Is dit vandag enigsins anders terwyl ons op die drumpel van ’n veel groter Beloofde Land, God se nuwe wêreld van geregtigheid, staan? Sedert die vrystelling van My boek met Bybelverhale in 1978 was dit ’n wonderlike hulpmiddel om ons ‘kinders en kindskinders’ te leer. Wat ’n wonderlike voorsiening was dit om geestelike eienskappe in die harte en verstande van ons kinders in te skerp.—Deut. 4:9, 10.
HOE ONS DIT KAN AANBIED
2 Gedurende Desember sal ons die Bybelverhale-boek aanbied. Hoe kan ons hierdie puik publikasie goed gebruik? Daar is talle kenmerke wat ouers sowel as kinders geniet. Die groot druk, chronologiese volgorde van belangrike gebeurtenisse in die Bybel, die eenvoudige en direkte benadering van die Bybel, 125 volkleurprente en die kort verhale wat kleurryk vertel word, spreek tot die oog en die hart. Ons kan enige van hierdie kenmerke gebruik om jonk en oud te help. Of jy die Bybelverhale-boek met welslae aanbied, hang egter baie van jou af en hoe jy daaroor voel. Waarom meen jy dat dit waarde het? Vertel ander met oortuiging en geesdrif hoe jy daaroor voel.
3 Ouers, ons spoor julle aan om ’n paar aanbiedinge met julle kinders voor te berei. Pleks van julle kinders net saam met julle te laat loop wanneer julle velddiens doen of hulle net tydskrifte by die deure te laat aanbied, kan julle jul kinders help om ’n eenvoudige aanbieding voor te berei wat op die ‘Onderwerp vir gesprekke’ gebaseer is. Help hulle om hulle eie Bybelstudies te begin en te hou. Hulle sal hulle bediening soveel meer geniet en as ouers sal julle die bevrediging hê om te sien dat julle kinders geestelik vooruitgang maak.
4 Jongmense, ons spoor julle ook aan om ’n spesiale poging aan te wend om ’n eenvoudige aanbieding met die Bybelverhale-boek te oefen en dit dan by julle klasmaats, bure, familielede of besoekende vriende aan te bied. Kies ’n prent soos die een in Verhaal 116. Lees dan Psalm 119:9 van die ‘Onderwerp vir gesprekke’ en wys daarop dat die Bybel al die riglyne voorsien wat ons nodig het om Jehovah op die regte manier te dien.
5 Waar mense besig is, kan ons dalk ’n korter aanbieding gebruik deur die illustrasie in Verhaal 115 te gebruik. Ons kan sê: “Goeiemore. As een van jou bure besoek ek jou kortliks om goeie leesstof vir jongmense te voorsien. Ek het gevind dat hierdie publikasie baie waardevol is om ouers en kinders te help. Dit help hulle om te leer wat God in sy Woord, die Bybel, vir die toekoms belowe het. [Blaai na Verhaal 115; lees laaste sin in paragraaf 1.] Sal jy graag so ’n boek vir jou kinders (kleinkinders) wil hê?”
6 Jy kom dalk iemand teë wat reeds ’n eksemplaar van die Bybelverhale-boek het. Demonstreer gerus hoe die kinders baat kan vind by die publikasie en bied aan om dit saam met hulle en die gesin te studeer. Daar is dalk ook ’n geleentheid om ’n paar ander gepaste Bybelstudiehulpe by die gesin te laat.
7 Hoewel Desember ’n vakansiemaand is, kan ons almal elke geleentheid benut om jongmense te help om tot ’n kennis te kom van wat Jehovah in die verlede gedoen het deur My boek met Bybelverhale teen ’n bydrae van R7,50 aan te bied. Bid tot Jehovah om hulp terwyl ons ons eie kinders help om nie ‘die dinge te vergeet’ wat hy ‘al die dae wat hulle lewe’ gedoen het nie.—Deut. 4:9, 10; Spr. 3: 1, 2.