Eenvoudige en doeltreffende herbesoeke
1 Doen jy gereeld herbesoeke of vind jy dit gewoonlik moeilik omdat jy nie weet wat om te sê nie? Daar is geen rede om skrikkerig te wees nie. Drie dinge sal jou help om ’n suksesvolle herbesoek te doen: (1) goeie voorbereiding; (2) die vermoë om een of twee punte oor ’n paar eenvoudige Bybelonderwerpe te bespreek en (3) die bereidwilligheid om na die huisbewoner se siening te luister.
2 Wanneer jy vir die herbesoek voorberei, kan jy aan ’n gepaste onderwerp dink om met die huisbewoner te bespreek. Is hy ’n skolier of student? Baie skoliere of studente sal hierdie maand ekstra tyd hê om Bybelonderwerpe te bespreek wanneer hulle ’n blaaskansie van hulle studies geniet. Jy sal waarskynlik vind dat party bereid is om na die Koninkryksboodskap te luister. Het jy aan die einde van jou vorige besoek ’n vraag geopper, of het die huisbewoner belangstelling in ’n spesifieke onderwerp getoon? Gaan jou aantekeninge na en gebruik die Redenering-boek om die inligting te kry wat jy sal nodig hê om ’n doeltreffende herbesoek te doen. Wanneer jy die besoek doen, wees hartlik en vriendelik. Groet die huisbewoner op sy naam.
3 As jy Die Wagtoring en die Ontwaak! by die huisbewoner gelaat het, kan jy jou herbesoek op een of twee eenvoudige punte baseer wat jy uit ’n tydskrif gekies het. As jy tydens die eerste besoek ’n traktaat by die huisbewoner gelaat het, kan jy oor die traktaat self praat of die gesprek voortsit deur die aandag op ’n gepaste punt in ’n tydskrif of ’n brosjure te vestig.
4 As jy “A Peaceful New World—Will It Come?” by die huisbewoner gelaat het, kan jy eenvoudig sê:
◼ “Tydens my vorige besoek het ons oor God se belofte van ’n vreedsame nuwe wêreld gepraat. Soos ons gesien het, sal beter toestande deur middel van God se Koninkryk kom. Wat dink jy word van ons verwag om ’n deel van daardie vreedsame nuwe wêreld te wees?” Laat die huisbewoner antwoord en lees dan die gedagte in Psalm 37:9, 11, 29.
5 As jy “Watter hoop vir afgestorwe dierbares?” by die huisbewoner gelaat het, kan hierdie kort opmerkings tot ’n bespreking lei:
◼ “Aan die einde van ons vorige bespreking het ek ’n traktaat met die titel Watter hoop vir afgestorwe dierbares? by jou gelaat. Die derde paragraaf stel ’n paar interessante vrae: ‘Waarom sterf mense? Waar is die dode? En hoe kan ons seker wees dat hulle weer kan lewe?’ Die volgende tussenhofie met die titel ‘Die dood, en wat gebeur wanneer ons sterf’, beantwoord elke vraag. Ek het hier ’n ekstra eksemplaar van die traktaat. Let op wat dit in die vierde paragraaf sê.” Lees dan die paragraaf, asook die twee tekste, terwyl die huisbewoner saam met jou volg en vra die huisbewoner sy mening. Luister aandagtig na wat hy sê en reageer dienooreenkomstig.
6 Gedurende die bespreking sal die huisbewoner dalk ’n aantal menings lug wat nie reg is nie. Dit is nie nodig om van alles wat hy sê ’n geskilpunt te maak nie. Bly eerder by die onderwerp onder bespreking. Enige onskriftuurlike idees wat hy dalk het, kan gedurende toekomstige herbesoeke reggestel word.
7 Doen alles in jou vermoë om gedurende April alle belangstelling met eenvoudige en doeltreffende herbesoeke aan te kweek.