Die belangrikste gebeurtenis in die mensegeskiedenis
1 Jesus het in opdrag van sy Vader na die aarde toe gekom om te getuig van die waarheid wat ons na die ewige lewe sal lei (Joh. 18:37). Sy getrouheid tot die dood het Jehovah tot eer gestrek, God se naam geheilig en ’n losprys voorsien (Joh. 17:4,6). Dít is wat Jesus se dood die belangrikste gebeurtenis in die hele mensegeskiedenis gemaak het.
2 Sedert die skepping van Adam was daar slegs twee volmaakte manne wat op hierdie aarde gelewe het. Adam was in staat om wonderlike seëninge vir sy ongebore nakomelinge mee te bring. In plaas daarvan het hy weens selfsug in opstand gekom en veroorsaak dat hulle tot ’n ellendige bestaan gedoem is wat op die dood sou uitloop. Toe Jesus gekom het, het hy volmaakte lojaliteit en gehoorsaamheid aan die dag gelê en aan almal wat geloof beoefen die geleentheid gebied om die ewige lewe te verkry.—Joh. 3:16; Rom. 5:12.
3 Geen ander gebeurtenis kan met Jesus se offerdood gelykgestel word nie. Dit het die verloop van die mensegeskiedenis verander. Op grond daarvan kan miljarde mense uit die dood opgewek word. Dit het die grondslag gelê vir ’n ewige Koninkryk wat ’n einde aan goddeloosheid sal maak en die aarde in ’n paradys sal omskep. Dit sal uiteindelik die hele mensdom van alle vorme van onderdrukking en slawerny bevry.—Ps. 37:11; Hand. 24:15; Rom. 8:21,22.
4 Dit alles help ons om te besef waarom Jesus sy dissipels opdrag gegee het om sy dood elke jaar met die viering van die Gedenkmaal te herdenk (Luk. 22:19). Aangesien ons die belangrikheid daarvan besef, sien ons daarna uit om ná sononder op Vrydag, 14 April, met die gemeentes van Jehovah se Getuies regoor die wêreld byeen te kom. Dit sal goed wees om voor daardie tyd as ’n gesin die Bybelverslae te lees van Jesus se laaste dae op aarde en hoe hy moedig standpunt vir die waarheid ingeneem het. (Aanbevole Skrifgedeeltes verskyn op ons Kalender vir 1995, 9-14 April.) Hy het vir ons ’n voorbeeld van toegewydheid aan ons Skepper gestel (1Pet. 2:21). Laat ons ons uiterste bes doen om ons vriende en familie, sowel as Bybelstudente en ander belangstellendes, na hierdie belangrike vergadering te nooi. Verduidelik vooraf wat sal plaasvind en wat die betekenis van die embleme is.—1 Kor. 11:23-26.
5 Die ouer manne moet lank vooruit beplan om seker te maak dat die Koninkryksaal netjies en skoon is. Reëlings moet getref word dat iemand na die embleme omsien. Die bediening van die embleme moet goed georganiseerd wees. Nuttige wenke oor hoe ons respek vir die Here se Aandmaal kan toon, is in Die Wagtoring van 15 Februarie 1985, bladsy 19, gegee. Dit sal heel gepas wees as die gemeente meer velddiensbedrywighede het gedurende die paar dae voor die viering sowel as ’n paar dae daarna.
6 Verlede jaar was daar wêreldwyd altesaam 12 288 917 wat die herdenking van hierdie belangrike gebeurtenis bygewoon het. Aangesien dit die belangrikste dag op ons kalender is, behoort ons almal teenwoordig te wees.