Die Wagtoring en die Ontwaak!—tydskrifte vir ons kritieke tye!
1 Ter vervulling van Bybelprofesieë vind daar wêreldskokkende gebeure plaas! Wanneer ons nadink oor wat in die wêreld om ons en ook in die teokratiese organisasie plaasvind, besef ons hoe dringend dit is dat ons “die goeie nuus” van die Koninkryk verkondig (Mark. 13:10). Dit spoor ons aan om gedurende April ywerig in ons bediening te wees.
2 Die belangrikheid van ons boodskap word beklemtoon deur die spesiale werk wat ons hierdie maand sal onderneem. Ons sien gretig uit na die vrystelling van die Koninkryksnuus wat ons gedurende April en Mei sal versprei. Om ons entoesiasme vir hierdie werk te wek sowel as belangstelling in ons gebied te kweek, sal Die Wagtoring en die Ontwaak! tydige artikels bevat wat die aandag vestig op die profetiese betekenis van ontstellende wêreldgebeure. Die aanbod vir April is ’n intekening op Die Wagtoring. Party wil moontlik ’n intekening op Die Wagtoring sowel as die Ontwaak! aanbied. Hoe kan ons ’n aanbieding voorberei wat belangstelling in die tydskrifte sal wek?
3 Jy sal waarskynlik ’n doeltreffende aanbieding kan uitwerk deur hierdie basiese stappe te volg: (1) Kies ’n artikel in een van die tydskrifte wat jy meen by mense in jou gemeenskap byval sal vind. (2) Kies ’n stelling of ’n teksaanhaling in hierdie artikel wat jy dink die belangstelling van die huisbewoner sal wek. (3) Berei ’n kort aanbieding voor wat ’n vriendelike groet insluit, sowel as ’n vraag of stelling wat ’n interessante skriftuurlike gedagte na vore bring en ’n opregte uitnodiging om die intekening te neem. Soos jy kan sien, is dit heel eenvoudig en glad nie ingewikkeld nie. Miskien kan jy en ’n ander verkondiger wat jou in die bediening vergesel saam ’n aanbieding voorberei.
4 Aangesien die “Ontwaak!”van 22 April die vraag opper: “Is hierdie die laaste dae?” kan jy die inligting onder die opskrif “Laaste dae” op bladsy 12 van die “Redenering”-boek hersien. Jy kan begin deur te sê:
◼ “Ons besoek u om die betekenis te bespreek van die stormagtige gebeure wat om ons plaasvind. Let op wat hierdie artikel sê...”
5 “Die Wagtoring” van 1April opper die vraag: “Godsdiens—’n Onderwerp wat taboe is?” Wanneer jy die tydskrif aanbied, kan jy sê:
◼ “Daar word dikwels gesê dat godsdiens ’n onderwerp is wat nie bespreek moet word nie omdat mense daaroor stry. Wat dink jy daarvan?” Verwys dan na ’n stelling in die artikel.
6 Jy gebruik moontlik “Die Wagtoring” van 15 April met die artikel “Kan godsdienswaarheid gevind word?” Jy sal dalk ’n goeie reaksie op die volgende inleiding kry:
◼ “Omdat daar vandag so baie gelowe is, wonder party mense of godsdienswaarheid gevind kan word. Hierdie artikel toon hoe ek en jy ’n bevredigende antwoord op hierdie vraag kan kry. ...”
7 Voordat jy in die predikingswerk uitgaan, kan jy gerus jou aanbieding met ’n ander verkondiger oefen om daarmee vertroud te raak. Julle sal mekaar heel waarskynlik nuttige wenke kan gee wat jou bekwamer sal maak en groter vertroue sal gee.
8 Namate die einde van hierdie stelsel nader kom, moet ons ons pas versnel om opregtes van hart te help om uit Babilon die Grote te vlug (Op. 18:4). Die Wagtoring en die Ontwaak! speel ’n belangrike rol in hierdie werk wat nooit herhaal sal word nie. Ons is dankbaar dat Jehovah hierdie uitstekende instrumente vir ons gebruik voorsien het!