Vraebus
◼ Hoe lank moet ’n tuisbybelstudie gehou word, noudat ons die boek Kennis wat tot die ewige lewe lei het?
Ons Koninkryksbediening vir September 1993 het aanbeveel dat ’n tuisbybelstudie met nuwe belangstellendes gehou moet word totdat twee boeke bestudeer is. Noudat ons die Kennis-boek het, lyk dit raadsaam om hierdie prosedure te wysig, soos uiteengesit op bladsye 13 en 14 van Die Wagtoring van 15 Januarie 1996.
Die Kennis-boek is bedoel om diegene te help “wat die regte gesindheid vir die ewige lewe” het om te leer wat hulle moet weet ten einde hulle aan Jehovah toe te wy en hulle te laat doop (Hand. 13:48). Nadat hierdie nuwe publikasie voltooi is, behoort dit derhalwe nie nodig te wees om ’n tweede boek met dieselfde student te studeer nie. Namate jou Bybelstudente die waarheid begin aanneem, kan jy hulle in toenemende mate aanspoor om hulle kennis uit te brei deur vergaderinge van Jehovah se Getuies by te woon asook deur die Bybel en verskeie Christelike publikasies te lees.
Dit kan nuttig wees om deeglik vertroud te wees met die vrae op bladsye 175 tot 218 van die boek Georganiseer om ons bediening te vervul. Hoewel jy nie na hierdie vrae moet verwys of hulle saam met die Bybelstudent moet hersien nie, sal dit goed wees om punte in die Kennis-boek te beklemtoon wat die student in staat sal stel om te toon dat hy ’n behoorlike begrip van basiese Bybelwaarhede het wanneer die ouer manne die vrae met doopkandidate deurgaan.
Dit is nie nodig om die inligting in die Kennis-boek aan te vul deur ekstra materiaal of bykomende argumente in te bring om Bybelleringe te ondersteun of valse leerstellings te weerlê nie. Dit sal net die studie oor ’n langer tydperk laat strek. Daar word eerder gehoop dat die boek redelik vinnig gedek sal word, dalk in sowat ses maande. Dit beklemtoon die nodigheid daarvan dat ons die materiaal voor die tyd deeglik moet bestudeer sodat ons dit duidelik en bondig kan aanbied. Die student moet ook aangespoor word om voor die tyd te studeer, die teksverwysings na te slaan en duidelik te probeer onderskei wat die boek in elke hoofstuk leer.
Die Wagtoring het die nodigheid daarvan beklemtoon dat Jehovah se Getuies ’n groter aantal doeltreffende Bybelstudies oor ’n korter tydperk moet hou. (Sien Jesaja 60:22.) Die doeltreffende gebruik van die Kennis-boek kan nuwelinge help om die kennis te verkry wat tot die ewige lewe lei en daarvolgens op te tree.—Joh. 17:3.