Spreek die waarheid met jou naaste
1 Een van die twee grootste gebooie is: “Jy moet jou naaste liefhê soos jouself” (Matt. 22:39). Sulke liefde sal ons beweeg om die beste ding wat ons het—die waarheid wat ons in God se Woord gevind het—aan ons naaste mee te deel. Aangesien Die Wagtoring en Ontwaak! uitwei oor die Bybel se boodskap van waarheid, is die verspreiding van hierdie tydskrifte gedurende Mei een manier waarop ons ‘die waarheid met ons naaste kan spreek’.—Ef. 4:25.
2 Die “Ontwaak!” van 22 April moet gebruik word totdat jou voorraad op is. Jy kan jou aanbieding begin deur te vra:
◼ “Wat sou jy dink van ’n wêreld sonder oorlog? [Wag vir ’n antwoord.] Het jy geweet dat die wêreld se godsdienste eintlik oorloë en slagting bevorder? [Wag vir ’n antwoord.] Let op wat die ware aanbidders van God volgens die Bybel in skerp teenstelling hiermee sal doen.” Lees Jesaja 2:2-4 boaan bladsy 4 van die tydskrif, en lees dan die eerste paragraaf op bladsy 10 onder die onderhofie “’n Beroep op liefhebbers van vrede”. Hierna kan jy vra: “Weet jy hoe God dit gaan doen? Die antwoord is in hierdie tydskrif. Ek sal graag hierdie twee tydskrifte by jou wil laat teen ’n bydrae van R2,00.”
3 Wanneer jy “Die Wagtoring” van 15 Mei aanbied, kan jy na ’n onlangse gebeurtenis in die nuus verwys wat mense onveilig laat voel het en dan vra:
◼ “Wat dink jy is nodig om ons in hierdie lewe werklik veilig te laat voel? [Wag vir ’n antwoord.] Is dit in alle eerlikheid realisties om op mense te vertrou om die probleme op te los waarmee die mensdom te kampe het? [Wag vir ’n antwoord; lees dan Psalm 146:3.] Die psalmis gee ons vervolgens rede om optimisties te wees oor die toekoms. [Lees Psalm 146:5, 6.] Hierdie artikel, ‘Ware veiligheid—nou en vir ewig’, verduidelik waarom ons op Jehovah God kan vertrou om beter toestande op die aarde te bewerkstellig.” Bied aan om ’n stel tydskrifte te laat en terug te keer om te bespreek hoe dit moontlik is om nou reeds ’n veilige lewe te geniet.
4 Die voorbladartikels van die “Ontwaak!” van 22 Mei behoort die belangstelling van mense in die huis-tot-huis- en sakegebied te wek. Jy kan dit aanbied deur te sê:
◼ “Baie vroue het al die nagmerrie van seksuele teistering by die werksplek ondervind. Die situasie het so ernstig geword dat howe begin het om oortreders te straf en slagoffers te vergoed. As ’n diens aan die gemeenskap het ons hierdie verslag gepubliseer, wat die algemene mites omtrent die saak uit die weg ruim. Dit bevat ook praktiese gedagtes vir vroue en vir mans oor hoe hulle hulleself kan beskerm sodat hulle nie ’n slagoffer van seksuele teistering word of self van molestering beskuldig word nie. Sal jy graag hierdie nommer van die Ontwaak! wil lees? [Wag vir ’n antwoord.] Ons laat ons tydskrifte teen ’n klein bydrae van R2,00.”
5 As jy ’n kort aanbieding verkies, kan jy dalk sê:
◼ “Baie mense meen dat die meeste van vandag se gewilde tydskrifte te veel kommersialisme, seks of geweld bevat. [Wys Die Wagtoring en Ontwaak!] Ons versprei hierdie heilsame tydskrifte wat op die Bybel gebaseer is. Hulle is baie opvoedkundig en leer ons om God te aanbid, ons naaste lief te hê en onberispelike gedrag te handhaaf. As jy hierdie soort leesstof verkies, weet ek dat jy sal geniet wat jy in hierdie tydskrifte lees.”
6 As ons ywerig die waarheid met ons naaste spreek, kan ons aan baie mense groot vreugde bring.—Hand. 8:4, 8.