April—’n Tyd om ywerig vir voortreflike werke te wees!
1 Wanneer ’n orkaan nader aan ’n bewoonde gebied beweeg, ontstaan daar ’n dringende behoefte om mense van die naderende gevaar te waarsku. Hoe nader die orkaan beweeg, hoe dringender moet die waarskuwings wees. Waarom? Want lewens is op die spel! Sommige het dalk nie vroeëre waarskuwings gehoor nie. Ander het dit dalk gehoor, maar het nie daarop gereageer nie. Dieselfde geld vir die Goddelike waarskuwing wat ons opgedra is om te verkondig voor die “stormwind” van God se geregverdigde woede alle spore van hierdie goddelose wêreld wegwaai (Spr. 10:25). Die ewige lewe van miljarde mense is op die spel! Die waarskuwing moet gegee word. Ons moet “ywerig vir voortreflike werke” wees.—Tit. 2:11-14.
2 Jehovah se knegte word al dekades lank beweeg om die Gedenkmaalseisoen ’n tyd van spesiale ywer in die bediening te maak. In 1939 het die Voorligter, die voorloper van Ons Koninkryksbediening, hierdie aansporing gegee: “Met lente, en aangename weer, voor die deur kan ons verwag dat die [gemeentelike] verkondigers hulle ure in die velddiens sal verdubbel en dat die pioniers se tyd aansienlik meer sal wees. April het vyf Sondae. Daar is ook vyf Saterdae. Maak elke Saterdag en Sondag gedurende April . . . ’n tyd vir spesiale getuieniswerk.” Dit was ’n ambisieuse doelwit wat 60 jaar gelede vir die broers gestel is! April het vanjaar, net soos in 1939, vyf volle naweke. Wat beplan jy vir hierdie maand? Wat het jy op jou kalender vir April 2000 aangebring? Tref gerus reëlings om gedurende hierdie spesiale maand van ekstra geestelike bedrywigheid saam met die res van Jehovah se volk ’n betekenisvolle deelname aan voortreflike werke te hê.
3 Wat ons hoop om te bereik: Die belangrikste dag van die jaar 2000 val in hierdie maand. Dit is 19 April, die herdenking van Jesus se dood. Kom ons wend ’n spesiale poging aan om soveel mense moontlik na die Gedenkmaal te nooi. Soos ons verlede maand voorgestel het, moet julle ’n lys maak van almal wat moontlik na die Gedenkmaal toe sal kom en seker maak dat julle niemand vergeet het nie. Diegene wat genooi word, moet enige onaktiewe verkondigers insluit, asook Bybelstudente, herbesoeke, diegene wat vantevore gestudeer het, werksmaats, skoolmaats, bure, familie en ander kennisse. Het diegene wat teenwoordig wil wees vervoer? Indien nie, kan jy op liefdevolle wyse hulp verleen? Op die aand van die Gedenkmaal sal ons almal die voorreg hê om diegene wat teenwoordig is welkom te laat voel. Ná die Gedenkmaal kan ons verdere geestelike hulp aan hierdie belangstellendes verleen.
4 ‘Ywer vir voortreflike werke’ gedurende die dae voor en ná die Gedenkmaal is ’n goeie manier om vir Jehovah te wys dat ons alles wat hy al vir ons gedoen het opreg waardeer. Baie van ons sal ons aandeel aan die evangelisasiewerk kan vergroot. As jy aan die hulppionierdiens deelneem, sal jy jou bes wil doen om 50 uur of meer in die bediening deur te bring (Matt. 5:37). Hou streng by die rooster wat jy in die begin van die maand opgestel het (Pred. 3:1; 1 Kor. 14:40). Mag die res van ons doen wat ons kan om al die pioniers te ondersteun, deur hulle te bemoedig en deur saam met hulle in die velddiens te werk. (Vergelyk 2 Konings 10:15, 16.) As ons ywerig gedurende April saai, kan ons groot vreugde en ’n seëning van Jehovah verwag (Mal. 3:10). Miskien kan dit as ’n trapklip dien vir voortgesette hulppionierdiens of om gewone pionierdiens te doen. Mag die geestelike momentum wat ons in April opbou na die daaropvolgende maande oorgedra word terwyl ons voortgaan om gereelde Koninkryksverkondigers te wees.
5 Duisende van Jehovah se knegte sal ongetwyfeld hierdie maand nog tuisbybelstudies begin. Sal jy graag een wil begin? Bid spesifiek vir ’n studie en tree dan in ooreenstemming met jou gebede op. Jy kan daarvan seker wees dat Jehovah dit sal waardeer as jy hom nederig vra om jou te help om iemand wat opreg van hart is te vind.—1 Joh. 3:22.
6 Hier is ’n beproefde benadering wat al met welslae gebruik is om gesprekke te begin. Jy begin deur te vra: “Dink jy dat al die geweld in openbare skole die gevolg is van demoniese bedrywighede of is dit as gevolg van ’n gebrek aan ouerlike leiding?” Wag vir ’n antwoord. As die persoon “demoniese bedrywighede” sê, kan jy Openbaring 12:9, 12 lees en verduidelik hoe die Duiwel tot al die probleme in die wêreld bydra. Maak dan die Vereis-brosjure oop by les 4 en vra hom of hy al ooit gewonder het waar die Duiwel vandaan kom. Lees en bespreek dan die eerste twee paragrawe. As die persoon “’n gebrek aan ouerlike leiding” kies as die rede vir geweld in die skole, kan jy 2 Timoteus 3:1-3 lees en die eienskappe uitlig wat klaarblyklik tot hierdie probleem bydra. Maak dan die Vereis-brosjure oop by les 8, lees paragraaf 5 en sit die gesprek voort. As jy ’n afspraak kan maak om terug te gaan, het jy dalk ’n goeie kans om ’n gereelde Bybelstudie met die persoon te hou. Gedurende ’n latere besoek kan jy hom vra of hy van enigiemand anders weet wat sal belangstel in die dinge wat hy leer.
7 Nog ’n manier om gedurende April “ywerig vir voortreflike werke” te wees, is om aan verskillende aspekte van die predikingswerk deel te neem. Het jy dit al oorweeg om in ’n park of in ’n parkeerterrein te getuig? By ’n bushalte of ’n stasie? Of wil jy dalk per telefoon, op straat of in sakegebied probeer getuig? Waarom probeer jy nie om dit hierdie maand te doen nie? Jehovah sal jou help om die nodige vrymoedigheid bymekaar te skraap (Hand. 4:31; 1 Tess. 2:2b). Dalk kan jy reël om saam met ’n pionier of ’n verkondiger te werk wat ervare is in hierdie fasette van die bediening.
8 Enigeen wat graag meer in die bediening wil doen, moet probeer om aan informele getuieniswerk deel te neem. ’n Mens hoef dikwels net ’n vriendelike gesprek met iemand aan te knoop. Meld eenvoudig ’n onderwerp waarin mense oor die algemeen belangstel deur miskien die benadering te gebruik wat in paragraaf 6 genoem word. Probeer om goed gebruik te maak van selfs ’n klein bietjie tyd wat andersins verlore sou gegaan het. Ons gooi nie sente weg net omdat dit nie ’n volle rand is nie. Jy kan gerus vyf minute, tien minute of ’n kwartier nuttig gebruik deur informeel te getuig.
9 ’n Tyd om na te dink: Dink terug aan die kragtige punte wat verlede jaar in die drama by die “God se profetiese woord”-streekbyeenkoms gemaak is. Die drama met die tema Toon waardering vir ons geestelike erfenis het ons ernstig laat nadink oor die verskil tussen Jakob en Esau. Esau het gesê dat hy soos Jakob in geestelike dinge belangstel, maar Esau se werke het dit nie getoon nie (Gen. 25:29-34). Wat ’n kragtige waarskuwing is dit vir ons! Laat ons, soos Jakob, gereed wees om te worstel, ons kragtig in te span, vir Jehovah se seën (Gen. 32:24-29). Kom ons gebruik April en al die daaropvolgende maande om ons ywer te hernieu, terwyl ons nooit ons wonderlike geestelike erfenis ligtelik opneem nie.
10 “Naby is die groot dag van die HERE, naby en baie haastig” (Sef. 1:14). Die goeie nuus van die Koninkryk moet verkondig word. Lewens is op die spel! Mag hierdie maand ’n besonder geseënde maand wees vir al Jehovah se knegte terwyl ons eendragtig toon dat ons “ywerig vir voortreflike werke” is.
[Venster op bladsy 4]
Gedenkmaalherinneringe
Die Gedenkmaalviering val vanjaar op Woensdag, 19 April. Die ouer manne moet aan die volgende sake aandag skenk:
◼ Wanneer julle op ’n tyd vir die vergadering besluit, moet julle seker maak dat die embleme eers ná sononder omgestuur sal word.
◼ Almal, met inbegrip van die spreker, moet in kennis gestel word van presies wanneer en waar die viering gehou sal word.
◼ Die regte soort brood en wyn moet verkry en voorberei word.—Sien Die Wagtoring van 15 Februarie 1985, bladsy 19.
◼ Borde, glase en ’n geskikte tafel en tafeldoek moet vooraf na die saal gebring en reggesit word.
◼ Die Koninkryksaal of ander vergaderplek moet voor die tyd deeglik skoongemaak word.
◼ Saalwagters en bedieners moet vooraf gekies en oor hulle pligte en die regte prosedure ingelig word.
◼ Reëlings moet getref word om die embleme aan enige van die gesalfdes te bedien wat siek is en nie teenwoordig kan wees nie.
◼ Wanneer meer as een gemeente dieselfde Koninkryksaal gaan gebruik, moet daar goeie samewerking tussen gemeentes wees om ’n onnodige samedromming in die voorportaal of ingang, op openbare sypaadjies en in die parkeerterrein te vermy.