Vreugdevol verenig met Jehovah en sy Seun
Die belangrikste gebeurtenis van die jaar gaan op 28 Maart gevier word
1 Deur die Here se Aandmaal ná sononder op 28 Maart 2002 te vier, toon ons dat ons in vreugdevolle eenheid met Jehovah God en Jesus Christus is. Op hierdie baie spesiale geleentheid sal die oorblyfsel van gesalfde Christene die spesiale “deelgenootskap” geniet wat hulle met ander Koninkrykserfgename, met die Vader en met sy Seun het (1 Joh. 1:3; Ef. 1:11, 12). Miljoene “ander skape” sal nadink oor hulle wonderlike voorreg om met Jehovah en sy Seun verenig te wees, om met hulle een van hart en siel te wees wat die uitvoering van God se werk betref!—Joh. 10:16.
2 Werk saam in ’n hegte verhouding: Jehovah en Jesus was nog altyd in vreugdevolle eenheid met mekaar. Voor die skepping van die mens het hulle eeue lank noue omgang geniet (Miga 5:2). ’n Innige band van tere geneentheid het dus tussen die twee van hulle ontwikkel. As die verpersoonliking van wysheid kon hierdie eersgebore Seun in sy voormenslike bestaan sê: “Ek het die een geword vir wie [Jehovah] dag na dag besonder lief was, terwyl ek die hele tyd voor hom verheug was” (Spr. 8:30). Die feit dat God se Seun tallose eeue lank intiem met die Bron van liefde omgegaan het, het ’n diepgaande uitwerking op hom gehad!—1 Joh. 4:8.
3 Met die oog op die mensdom se behoefte aan verlossing het Jehovah sy enigverwekte Seun, wat besonder lief was vir mense, gekies om die losprysoffer te voorsien, wat ons enigste hoop is (Spr. 8:31). Net soos Jehovah en sy Seun verenig is in die uitvoering van een voorneme, bly ons verenig met hulle en met mekaar deur bande van innige liefde, terwyl ons God se wil vreugdevol doen.
4 Hoe ons innige waardering kan toon: Deur die Gedenkmaal by te woon en aandagtig en eerbiedig te luister, kan ons ons opregte waardering toon vir Jehovah se liefde sowel as sy Seun se offerande vir ons. Die aandag sal gevestig word op Jesus se liefdevolle voorbeeld, sy getrouheid tot die dood om die losprys te voorsien en sy heerskappy as Koning van God se opgerigte Koninkryk, sowel as die seëninge wat die Koninkryk vir die mensdom sal meebring. Ons sal ook daaraan herinner word dat ons voortdurend ons geloof moet openbaar en ywerig in ooreenstemming met Jehovah se wil as “medewerkers in die waarheid” moet werk.—3 Joh. 8; Jak. 2:17.
5 Help ander om ook daar te wees: Die liggaam van ouer manne moet ’n spesiale poging aanwend om alle onbedrywige Getuies in die gebied aan te moedig om die herdenking van Christus se dood by te woon (Matt. 18:12, 13). Maak ’n lys van diegene wat besoek moet word, sodat niemand oor die hoof gesien word nie en almal persoonlik genooi word.
6 Weet jy van ander wat dalk na die Gedenkmaal sal kom? Neem die inisiatief om hulle waardering vir hierdie geleentheid op te bou. Nooi hulle hartlik uit en laat hulle welkom voel. Laat ons alles in ons vermoë doen om al ons Bybelstudente en ander belangstellendes, sowel as familielede en kennisse, na hierdie belangrikste gebeurtenis van die jaar te nooi. Die voordele van die losprys bly beskikbaar vir almal wat leer van “die oortreffende waarde van die kennis van Christus Jesus” (Fil. 3:8). Diegene wat geloof in Christus se offerande beoefen, kan die vaste hoop op die ewige lewe verkry.—Joh. 3:16.
7 Die positiewe uitwerking wat die Gedenkmaal op opregtes kan hê, moet nooit onderskat word nie. Twee jaar gelede, op die eilandstaat Papoea-Nieu-Guinee, het 11 belangstellendes 17 uur lank in ’n klein bootjie op ’n onstuimige see gevaar om dit by te woon. Waarom? Hulle het gesê: “Ons wou die herdenking van Christus se dood saam met medeaanbidders van Jehovah vier; daarom was dit alles beslis die moeite werd.” Dink aan die ywer wat daardie belangstellendes getoon het en aan hulle waardering vir die feit dat hulle vreugdevol met Jehovah, sy Seun en die Christenbroederskap verenig kon wees!
8 Bied ’n Bybelstudie vir alle belangstellendes aan. Moedig hulle aan om gemeentelike vergaderinge gereeld by te woon en om ander te vertel van die waarhede wat hulle leer. Help hulle om ‘in die lig te wandel’ en om ‘die waarheid te beoefen’ deur Bybelbeginsels in hulle lewe toe te pas (1 Joh. 1:6, 7). Help hulle om ’n hegte verhouding met Jehovah op te bou en om ’n groter waardering te verkry vir die voorreg om sy wil eensgesind te doen.
9 Wat ’n wonderlike voorreg is dit tog om vreugdevol verenig te wees ‘in een gees en met een siel sy aan sy vir die geloof van die goeie nuus te stry’! (Fil. 1:27, 28). Ons kan uitsien na die aangename omgang wat ons saam by die Gedenkmaal op 28 Maart gaan geniet, ewig dankbaar teenoor Jehovah en sy Seun!—Luk. 22:19.