Internasionale Koninkryksaalbouwerk in sommige Europese lande
1 In onlangse dekades was daar beperkings op die werk van Jehovah se Getuies in ’n aantal Europese lande, waaronder Oos-Europa. In die meeste gevalle was die beperkings baie streng. Dit was moeilik om vergaderinge openlik te hou, en die gebruik van ’n Koninkryksaal was byna onmoontlik. Maar in onlangse jare het “Jehovah . . . iets groots gedoen deur wat hy met ons gedoen het. Ons het vreugdevol geword.”—Ps. 126:3.
2 Van 1983 af is die onderdrukkende greep op Jehovah se Getuies geleidelik verslap. Teen 1989 is Jehovah se Getuies in Pole en Hongarye wetlike erkenning gegee. In 1991 is Jehovah se Getuies in Rusland wetlik geregistreer. Sedertdien het die werk in Rusland en in die voormalige republieke van die Sowjetunie gefloreer. Tussen Maart 1996 en Oktober 1998 het die Bestuursliggaam 359 Koninkryksaallenings goedgekeur van takkantore wat oor die werk in 11 Europese lande toesig hou.
3 Terwyl jy na die foto’s in hierdie byvoegsel kyk, kan jy nadink oor die groot en wonderlike dinge wat Jehovah ten behoewe van sy volk doen (Ps. 136:4). Verbly jou in die wete dat bydraes van die wêreldwye broederskap baie goed gebruik word, in ooreenstemming met wat Jesus gesê het, soos in Johannes 13:35 opgeteken staan: “Hieraan sal almal weet dat julle my dissipels is, as julle liefde onder mekaar het.”
4 Roemenië is een van die Europese lande wat baat vind by die reëling om Koninkryksale in lande met beperkte middele te bou, en 36 Koninkryksale is sedert Julie 2000 daar gebou. Deur ’n standaardbouplan vir feitlik al hulle Koninkryksale te gebruik, het die Oekraïne 61 sale in 2001 gebou en nog 76 in 2002. Met die geldelike bydraes tot die Koninkryksaalfonds is honderde Koninkryksale in Bulgarye, Joego-Slawië, Kroasië, Masedonië, Moldowa en Rusland gebou.
5 In party lande is dit nie maklik om Koninkryksale te bou nie, en dit verg groot inspanning voordat die eintlike bouwerk kan begin. Die proses is dikwels tydrowend. Dit is ook baie duurder om ’n Koninkryksaal in daardie deel van Europa te bou as in baie dele van Afrika of Suid-Amerika. Maar weens die groot vermeerdering in die aantal aanbidders van Jehovah is daar nog honderde Koninkryksale nodig in Europese lande met beperkte middele!
6 Hoe wonderlik is dit tog om so ’n vinnige toename in die bou van hierdie Koninkryksale te sien! ’n Uitstekende getuienis is al gegee in die gebied waar dit gebou is, soos baie ondervindinge toon. In party gebiede is plaaslike owerhede beïndruk deur die Getuies se gewilligheid om bouriglyne te volg.
7 Jesaja het gepas die uitbreiding van ware aanbidding in hierdie tyd voorspel. God het deur die profeet voorspel: “Ek, Jehovah, sal dit op die regte tyd bespoedig” (Jes. 60:22). Die laaste dekade was beslis Jehovah se tyd vir uitbreiding in Oos-Europa. Mag Jehovah voortgaan om sy ryk seën uit te stort op ons pogings om die bouwerk van Koninkryksale in baie lande te help bespoedig terwyl ons aanhou om tot die Koninkryksaalfonds by te dra! Dit sal daartoe lei dat nog baie meer Koninkryksale gebou word in lande met beperkte middele. Dit sal bydra tot die uitbreiding van rein aanbidding in baie lande van Europa en dat ’n groter getuienis “tot aan die einde van die aarde” gegee word.—Hand. 13:47.
[Prente op bladsy 3]
Koninkryksaalkompleks Moskou, Rusland
[Prente op bladsy 4-6]
Nuwe Koninkryksale in Oos-Europa
Stroemica, Masedonië
Daroewar, Kroasië
Bitola, Masedonië
Sokal, Lviv-streek, Oekraïne
Mladost, Bulgarye
Koerdjipskoie, Maikop, Rusland
Bački Petrowac, Joego-Slawië
Plowdiw, Bulgarye
Tloemach, Iwano-Frankofsk-streek, Oekraïne
Rawa-Roeska, Lviv-streek, Oekraïne
Stara Pazowa, Joego-Slawië
Zenica, Bosnië en Herzegowina
Sokal Lviv-streek, Oekraïne
Zjidatsjiwl Lviv-streek, Oekraïne