Dankbaar vir God se barmhartigheid
1 Voordat die apostel Paulus ’n Christen geword het, het hy die verspreiding van die Christelike godsdiens hewig teëgestaan. Maar omdat hy in onkunde gehandel het, is barmhartigheid aan hom betoon. Jehovah het sy onverdiende goedhartigheid bewys en aan Paulus ’n predikingstoewysing gegee. Hy het daardie toewysing waardeer (Hand. 26:9-18; 1 Tim. 1:12-14). Dankbaarheid vir Jehovah se barmhartigheid het Paulus beweeg om hom in te span om sy bediening uit te voer.—2 Kor. 12:15.
2 Ons is ook ooreenkomstig God se barmhartigheid ’n bediening gegee (2 Kor. 4:1). Soos Paulus kan ons ons waardering toon vir die barmhartigheid wat aan ons bewys is, deur ons in te span om ander te help om geestelik te vorder. Een manier waarop ons dit kan doen, is deur Bybelstudies te begin en te hou.
3 Begin Bybelstudies: ’n Manier waarop ons Bybelstudies kan begin, is deur ’n tydskrifroete op te bou. Deur diegene op ons roete gereeld te besoek, kom ons agter watter dinge hulle kwel. Mettertyd kan ’n artikel in een van die tydskrifte gebruik word om tot ’n Bybelstudie in die Vereis-brosjure oor te gaan. Tydens daaropvolgende besoeke sal ons dalk besprekings uit die Vereis-brosjure kan voortsit wanneer ons tydskrifte by die huisbewoner laat.
4 Span jou biddend in: Gebed tesame met ywerige inspanning sal ons predikingswerk verbeter. ’n Pioniersuster wat een Bybelstudie gehad het, het Jehovah in gebed gevra om haar met meer studies te seën. Sy het ook in ooreenstemming met haar gebede opgetree. Sy het haar bediening ondersoek en besef dat sy nie Bybelstudies aanbied wanneer sy herbesoeke doen nie. Sy het dit begin doen en het kort voor lank nog twee studies gehad.
5 Hoe bevoorreg is ons tog om ’n aandeel te hê aan die werk om “die goeie nuus van die onverdiende goedhartigheid van God” te verkondig! (Hand. 20:24). Mag dankbaarheid vir God se barmhartigheid ons beweeg om ander ywerig te help om by Jehovah se onverdiende goedhartigheid baat te vind.