Gebruik jou tyd wyslik
1 Ons begeerte om Jehovah te behaag, beweeg ons om geestelike bedrywighede die middelpunt van ons lewe te maak. Sy Woord leer ons om ‘aan te hou om eers die koninkryk te soek’ en om “seker [te] maak van die belangriker dinge” (Matt. 6:33; Fil. 1:10). Hoe kan ons die tyd vir Koninkryksbelange uitkoop en minder belangrike bedrywighede op hulle plek hou?—Ef. 5:15-17.
2 Stel Koninkryksbedrywighede eerste: Stel ’n rooster op sodat jy nie al jou tyd aan onbelangrike strewes bestee nie. Party begin elke maand deur spesifieke tye vir die veldbediening op hulle kalender aan te dui. Dan maak hulle seker dat ander sake nie daardie planne in die wiele ry nie. Dieselfde kan gedoen word om tyd vir vergaderinge, persoonlike studie en byeenkomste uit te koop. Baie het ’n daaglikse rooster wat met Bybellees begin of eindig. Sit ’n spesifieke tyd opsy vir elke belangrike bedrywigheid, en moenie toelaat dat ander dinge onnodig daarop inbreuk maak nie.—Pred. 3:1; 1 Kor. 14:40.
3 Beperk die mate waarin jy die wêreld gebruik: In party lande is sport, vermaak, ontspanning, stokperdjies en ander bedrywighede geredelik beskikbaar. Baie bestee ’n buitensporige hoeveelheid tyd daaraan om televisie te kyk of die rekenaar te gebruik. Maar wanneer te veel tyd bestee word aan stokperdjies en nuwe toestelle wat deur hierdie wêreld aangebied word, sal dit ongetwyfeld tot teleurstelling lei (1 Joh. 2:15-17). Die Skrif spoor ons gevolglik aan om nie die wêreld ten volle te gebruik nie (1 Kor. 7:31). Deur hierdie wyse raad te volg, kan jy vir Jehovah wys dat sy aanbidding die eerste plek in jou lewe inneem.—Matt. 6:19-21.
4 Die oorblywende tyd vir hierdie teenswoordige stelsel word min. Diegene wat Koninkryksbelange eerste stel, sal gelukkig wees en sal God se guns geniet (Spr. 8:32-35; Jak. 1:25). Laat ons dus hierdie kosbare bate, ons tyd, wyslik gebruik.