Hoe om die geleë tyd uit te koop
1 As ons volop het om in Jehovah se diens te doen, hou dit ons besig! (1 Kor. 15:58). Ons besef die belangrikheid daarvan om persoonlik en as ’n gesin te studeer, die Bybel daagliks te lees, vir gemeentelike vergaderinge voor te berei en dit by te woon asook om gereeld aan die veldbediening deel te neem. Opsieners het herdersverantwoordelikhede, en hulle sien om na ander pligte in die gemeente. Party het swaar gesinsverantwoordelikhede of ’n verskeidenheid verpligtinge teenoor ander. Om dit alles behoorlik gedoen te kry, het almal balans en goeie persoonlike organisasie nodig.
2 Stel prioriteite: Of ons daarin gaan slaag om ‘die geleë tyd vir onsself uit te koop’, hang daarvan af of ons onderskeidingsvermoë en goeie oordeel aan die dag lê (Ef. 5:15, 16). Ons moet vasstel wat “die belangriker dinge” is en dit boaan ons lys van prioriteite plaas (Fil. 1:10). Een egpaar het hulle teokratiese huishouding so beskryf: “Ons vul ons lewe met die waarheid . . . Die waarheid is nie ’n deel van ons lewe nie, dit is ons lewe. Al die ander dinge draai daarom.” Dit is noodsaaklik om Jehovah se aanbidding en diens die eerste plek in jou lewe te gee.
3 Herken tydverkwisters: Daar is 168 ure in ’n week, en ons moet die tyd tot ons beskikking verstandig gebruik. Ons moet tydverkwisters herken en dit tot ’n minimum beperk as ons genoeg tyd vir teokratiese bedrywighede wil hê. Een opname het aan die lig gebring dat die gemiddelde volwassene in die Verenigde State meer as 30 uur per week aan TV-kykery bestee! Ander verkwis baie tyd deur wêreldse lektuur te lees. Party vind dalk dat hulle ’n buitensporige hoeveelheid tyd aan sosiale bedrywighede, stokperdjies, ontspanning of die een of ander soort rekenaaraktiwiteit wy. Dit sal dalk nodig wees om ons daaglikse roetine noukeurig te beskou om te bepaal hoe ons ons tyd beter kan gebruik. Wysheid vereis dat ons perke stel aan die tyd wat ons vir onbelangrike bedrywighede inruim.
4 Ontwikkel ’n goeie roetine: Wat ons persoonlike omstandighede ook al is, elkeen van ons kan tyd vir geestelike belange uitkoop. Party het gevind dat dit hulle help om meer uit te rig as hulle elke dag ’n bietjie vroeër opstaan. As dit ons lank neem om by die werk te kom of vir ander te wag, kan ons van daardie tyd gebruik om Bybellees te doen, vir vergaderinge voor te berei of na oudiokassette te luister wat deur die Genootskap voorsien word. Gesinne vind grootliks daarby baat as hulle ’n gereelde, spesifieke tyd opsy sit om saam te studeer. As elke gesinslid betyds vir die gesinstudie is, gee dit almal ’n bietjie ekstra tyd.
5 Met elke dag wat verbygaan, moet dit vir ons duideliker word dat ‘die oorblywende tyd kort is’ (1 Kor. 7:29). Ons lewe hang af van die manier waarop ons die kosbare tyd gebruik wat oor is. Ons sal geseën word as ons die geleë tyd uitkoop sodat ons Koninkryksbelange in die eerste plek kan hou!—Matt. 6:33.