Hoe om die ‘God se liefde’-boek te gebruik om Bybelstudies te hou
1. Wat is die doel van die ‘God se liefde’-boek?
1 Hoe bly was ons tog om die nuwe boek ‘Hou julle in God se liefde’ by ons “Gerig deur God se gees”-streekbyeenkoms te ontvang! Soos aangekondig is, is hierdie publikasie saamgestel om ons te help om Jehovah se gedragstandaarde te leer ken en lief te kry, nie om basiese Bybelleerstellings aan ander te leer nie. Ons sal nie hierdie boek van deur tot deur aanbied nie.
2. Hoe sal hierdie publikasie gebruik word, en met wie sal dit gestudeer word?
2 Hierdie boek sal as die tweede publikasie met Bybelstudente gestudeer word nadat hulle die Leer Bybel-boek voltooi het. Hou in gedagte dat mense nie ewe vinnig geestelike vooruitgang maak nie. Elke studie moet gehou word teen ’n pas wat gemaklik is vir die student. Maak seker dat die student die materiaal wat bespreek word, goed verstaan. In die meeste gevalle moet hierdie boek nie gebruik word om Bybelstudies te begin met mense wat dalk in die verlede al ’n hele paar boeke gestudeer het, maar nie gemeentelike vergaderinge bywoon en klaarblyklik nie daarin belangstel om hulle lewe in ooreenstemming te bring met die Bybelwaarhede wat hulle geleer is nie.
3. Wat moet ons doen as ons tans ’n studie in die Aanbid God-boek hou?
3 As jy tans ’n studie in die Aanbid God-boek hou en met die laaste paar hoofstukke besig is, kan jy besluit om daardie publikasie te voltooi en die student aan te spoor om die ‘God se liefde’-boek op sy eie te lees. Andersins sal dit die beste wees om na die nuwe boek oor te gaan en voor te begin. Soos in die geval van die Leer Bybel-boek, hoef die onderwerpe in die aanhangsel nie bespreek te word nie.
4. Wat moet ons doen as ons student gedoop word voordat hy die Leer Bybel-boek en die ‘God se liefde’-boek voltooi het?
4 As ’n student gedoop word voordat hy die twee boeke voltooi het, moet die studie voortgesit word totdat die ‘God se liefde’-boek voltooi is. Al is die student gedoop, kan jy die tyd, die herbesoek en die studie rapporteer. ’n Verkondiger wat saam met jou gaan en aan die studie deelneem, kan ook die tyd tel.
5. Hoe kan die ‘God se liefde’-boek gebruik word om verkondigers te help wat al ’n tyd lank nie aan die bediening deelneem nie?
5 As ’n lid van die Gemeentelike Dienskomitee jou aanwys om ’n Bybelstudie te hou met iemand wat onbedrywig geword het in die predikingswerk, sal hy jou dalk vra om spesifieke hoofstukke in die ‘God se liefde’-boek te bespreek. Hierdie studies hoef nie oor ’n lang tydperk gehou te word nie. Wat ’n uitmuntende voorsiening is hierdie nuwe boek tog, wat saamgestel is om ons te help om “in God se liefde” te bly!—Jud. 21.