Wat leer ander deur jou dop te hou?
1. Wat het Jesus se dissipels geleer deur hom dop te hou?
1 Jesus het gesê: “Kom saam met my onder my juk en leer by my” (Matt. 11:29, vtn. in NW). Dit is duidelik dat hy ander geleer het deur ’n goeie voorbeeld te stel, en nie net deur sy woorde nie. Dink aan wat die dissipels geleer het deur Jesus dop te hou. Hy was saggeaard, vriendelik en liefdevol (Matt. 8:1-3; Mark. 6:30-34). Hy was werklik nederig (Joh. 13:2-5). Terwyl die dissipels saam met Jesus aan die bediening deelgeneem het, het hulle gesien dat hy ’n onvermoeide werker is wat ander op bekwame wyse die waarheid leer (Luk. 8:1; 21:37, 38). Watter invloed het ons op ander deur wie ons in die bediening dopgehou word?
2. Hoe laat ons goeie gedrag in die bediening ’n gunstige indruk by huisbewoners?
2 Huisbewoners: Ons beskeie kleredrag, goeie maniere en opregte persoonlike belangstelling in mense kan ’n kragtige uitwerking op huisbewoners hê (2 Kor. 6:3; Fil. 1:27). Hulle sien dat ons dikwels die Bybel gebruik. Ander is beïndruk omdat ons eerbiedig luister wanneer hulle praat. Moet nooit onderskat in watter mate ’n goeie voorbeeld in hierdie opsig mense tot die Koninkryksboodskap kan aantrek nie.
3. Watter goeie invloed kan ons op ons broers hê?
3 Ons broers: Dink ook aan die goeie invloed wat ons op ons broers kan hê. Ons ywer vir die bediening is aansteeklik. Soos yster deur yster geslyp word, word ander deur ons goed voorbereide aanbieding aangespoor om hulle vaardigheid in die evangelisasiewerk te verbeter (Spr. 27:17). Die feit dat ons pligsgetrou ’n juiste verslag hou van mense wat belangstelling toon en dan so gou moontlik teruggaan, help om ander te beweeg om dit ook te doen. Ons sal ’n heilsame invloed op medewerkers hê deur ons bediening ten volle uit te voer.—2 Tim. 4:5.
4. Waarom moet ons van tyd tot tyd ons voorbeeld ontleed?
4 Ontleed gerus van tyd tot tyd wat jy doen en sê en watter uitwerking jou voorbeeld op ander het. Ons goeie voorbeeld sal Jehovah behaag en ons in staat stel om soos die apostel Paulus te sê: “Word navolgers van my, net soos ek dit van Christus is.”—1 Kor. 11:1.