Volg die voorbeeld wat Jesus gestel het
1. Watter voorbeeld het Jesus gestel?
1 Wanneer ons aan die dissipelmaakwerk deelneem, moet ons in gedagte hou dat ons voorbeeld ’n kragtige uitwerking kan hê op diegene wat ons waarneem. Jesus het deur woord en daad onderrig. Diegene wat hom waargeneem het, kon sy ywer sien sowel as sy liefde vir mense, sy sterk begeerte om sy Vader se naam te heilig en sy vasbeslotenheid om sy Vader se wil uit te voer.—1 Pet. 2:21.
2. In watter opsigte kan ons voorbeeld ’n uitwerking hê op diegene wat saam met ons in die bediening werk?
2 In die huis-tot-huis-bediening: Soos met Jesus die geval was, het ons voorbeeld ’n uitwerking op diegene wat saam met ons werk. Nuwer en minder ervare verkondigers wat sien dat ons ywerig aan die bediening deelneem, sal oor die gehalte van hulle aandeel aan die predikingswerk dink. Wanneer hulle sien dat ons vreugdevol is en opregte belangstelling in ander toon, sal dit hulle herinner aan die belangrikheid daarvan om hierdie eienskappe in hulle bediening aan die dag te lê. Wanneer hulle sien dat ons ywerig die Skrif gebruik, herbesoeke doen en Bybelstudies hou, sal hulle beweeg word om dit ook te doen.
3. Hoe kan ons Bybelstudente deur ons voorbeeld opgelei word, en wat sal hulle moontlik leer?
3 Wanneer ons Bybelstudies hou: Ons Bybelstudente sal veral ons gedrag waarneem. Hoewel ons byvoorbeeld aan hulle kan verduidelik hoe belangrik dit is om vir die studie voor te berei deur die tekste na te slaan en sleutelgedagtes te onderstreep, sal hulle oplet of ons voorberei het of nie (Rom. 2:21). As ons betyds is vir ons afspraak om met hulle te studeer, sal hulle nie sommer toelaat dat ander bedrywighede op hulle Bybelstudie inbreuk maak nie. Hulle sal ongetwyfeld ook let op ons selfopofferende gesindheid ter wille van die bediening sowel as ons onwrikbare geloof. Dit is nie verbasend dat studente van diegene wat Jesus se voorbeeld noukeurig volg, dikwels ywerige, produktiewe evangeliedienaars word nie.
4. Wat leer ander uit ons voorbeeld wanneer ons gemeentelike vergaderinge bywoon?
4 Wanneer ons gemeentelike vergaderinge bywoon: Almal wat deel van die Christengemeente uitmaak, het ’n aandeel daaraan om deur middel van hulle voorbeeld by gemeentelike vergaderinge te onderrig. Belangstellendes wat vergaderinge begin bywoon, vind baat by die goeie voorbeeld wat hulle in die gemeente sien. Hulle sal die hartlike broederskap, Christelike eenheid en beskeie kleredrag en persoonsversorging opmerk (Ps. 133:1). Ons voorbeeld van getroue bywoning van gemeentelike vergaderinge en ons openbare bekendmaking van ons geloof wanneer ons daar is, sal ook raakgesien word. ’n Besoeker by een van ons vergaderinge het gesien hoe vinnig ’n dogtertjie ’n teksverwysing in haar Bybel kon kry en hoe aandagtig sy die voorlesing gevolg het. Haar voorbeeld het hom beweeg om te vra dat ’n Bybelstudie met hom gehou word.
5. Waarom moet ons nooit die waarde van ons voorbeeld onderskat nie?
5 Die Skrif spoor ons aan om mekaar se goeie voorbeeld na te volg (Fil. 3:17; Heb. 13:7). Ons moet dus onthou dat ander sal sien as ons die voorbeeld wat Jesus gestel het, noukeurig volg en dat dit ’n goeie invloed op hulle kan hê. Laat ons dan met die oog hierop die woorde in 1 Timoteus 4:16 ter harte neem: “Let voortdurend op jouself en op jou onderrigting.”