Saadjies moet natgegooi word om te kan groei
1. Wat moet natgegooi word om te kan groei?
1 Saadjies wat in ’n tuin geplant word, moet natgegooi word om te kan groei. Dieselfde geld vir die saadjies van waarheid wat in die harte van mense in ons gebied geplant word (1 Kor. 3:6). Ons moet herbesoeke doen en hierdie figuurlike saadjies met behulp van God se Woord natgooi as ons wil hê dat hulle moet wortelskiet, groei en floreer.
2. Hoe kan ons die grondslag vir die volgende besoek lê?
2 Vra ’n vraag: Wanneer jy jou aanbieding voorberei, kan jy ook ’n gedagteprikkelende vraag voorberei wat jy tydens die herbesoek kan beantwoord. Vra die vraag aan die einde van die eerste gesprek, en tref definitiewe reëlings om terug te gaan. Baie vind dit nuttig om iets uit die Leer Bybel-boek te kies wat hulle in staat sal stel om ’n Bybelstudie te demonstreer.
3. Watter inligting kan ingesluit word wanneer jy ’n aantekening van belangstellendes maak?
3 Hou ’n rekord: Onmiddellik ná die eerste besoek moet jy die tyd neem om aantekeninge te maak. Skryf die persoon se naam en adres neer. Dit is ook goed om ’n aantekening te maak van die datum en tyd wanneer jy met hom gepraat het, waaroor julle gesels het en watter lektuur, indien enige, jy by hom gelaat het. Het hy gesê dat hy aan ’n sekere godsdiens behoort? Het hy ’n gesin? Het hy melding gemaak van sy belangstellings en bekommernisse? Sulke inligting sal jou help om toekomstige gesprekke dienooreenkomstig aan te pas. Skryf ook neer wanneer jy gereël het om terug te gaan en watter vraag jy sal beantwoord.
4. Waarom moet ons volhard wanneer dit daarby kom om belangstelling op te volg?
4 Volhard: Satan sal nie ophou probeer om ‘die woord weg te neem’ wat in ’n persoon se hart geplant is nie (Mark. 4:14, 15). Daarom moet jy nie tou opgooi as jy dit moeilik vind om die belangstellende weer tuis te vind nie. Kan jy vir hom ’n brief skryf of ’n nota by die deur laat? Een pionier het ’n studie by die deur met ’n vrou begin, maar sy kon haar nie weer tuis vind nie en het dus vir haar ’n brief geskryf. Toe die suster haar uiteindelik tuis gevind het, het die vrou gesê hoe diep sy geraak is deur die persoonlike belangstelling wat in haar getoon is. Terwyl ons die saadjies van waarheid natgooi, kan ons die vreugde smaak om te sien hoe hulle ontkiem, tot volwassenheid groei en “vrug dra: dertig- en sestig- en honderdvoudig”.—Mark. 4:20.