Gebruik ’n benadering wat werk
1. Wat kan ons leer uit die verskillende benaderings wat vroeë Christene gebruik het?
1 Vroeë Christene het die goeie nuus aan mense van uiteenlopende kulture en godsdienste verkondig (Kol. 1:23). Hoewel die boodskap dieselfde was—God se Koninkryk—het hulle hulle benadering by die gehoor aangepas. Byvoorbeeld, toe Petrus met Jode gepraat het wat ’n diep respek vir die Skrif gehad het, het hy begin deur die profeet Joël aan te haal (Hand. 2:14-17). Let op hoe Paulus daarenteen met Grieke geredeneer het soos opgeteken in Handelinge 17:22-31. Vandag respekteer mense in party gebiede die Skrif, en ons kan vryelik van die Bybel gebruik maak wanneer ons van huis tot huis gaan. Maar ons sal dalk meer oordeelkundig te werk moet gaan wanneer ons met mense praat wat nie in die Bybel of in godsdiens belangstel nie of wat aan ’n nie-Christelike godsdiens behoort.
2. Hoe kan ons die lektuuraanbod gebruik om mense te help wat respek het vir die Bybel sowel as mense wat nie daarin belangstel nie?
2 Gebruik die lektuuraanbod op doeltreffende wyse: Die lektuuraanbiedings vir hierdie diensjaar sal elke twee maande verander en sal tydskrifte, traktate en brosjures insluit. Al stel mense in ons gebied oor die algemeen nie in die Bybel belang nie, sal ons nog steeds iets kan aanbied waarin hulle wel belangstel. Ons lees dalk nie ’n teks of verwys nie regstreeks na die Bybel tydens die eerste besoek nie, maar ons sal wel teruggaan waar belangstelling getoon word met die doel om die huisbewoner te help om geloof in die Skepper en sy geïnspireerde Woord op te bou. Maar as ons preek waar mense wel respek het vir die Bybel, kan ons lektuur en ’n benadering gebruik wat hierdie feit in ag neem. Trouens, ons kan die Leer Bybel-boek of die brosjure Luister na God en lewe vir ewig te eniger tyd aanbied, ongeag wat die aanbod vir die maand is. Wat belangrik is, is dat ons ’n benadering gebruik wat werk.
3. In watter opsig is die hart van mense in ons gebied soos grond?
3 Berei die grond voor: ’n Persoon se hart is baie soos grond (Luk. 8:15). Party soorte grond het meer voorbereiding nodig voordat saadjies van Bybelwaarheid kan wortelskiet en groei. Eerste-eeuse evangeliedienaars het saadjies van Bybelwaarheid met welslae in alle soorte grond geplant, en dit het vir hulle tevredenheid en vreugde meegebring (Hand. 13:48, 52). Ons kan soortgelyke sukses behaal deur aandag te skenk aan ons benadering.