Moenie jou bediening beperk nie—Oorkom gevoelens van onbekwaamheid
1. Waarom huiwer party om ’n Bybelstudie aan te bied?
1 Huiwer jy om ’n Bybelstudie aan te bied omdat jy nie seker is dat jy ’n doeltreffende Bybelstudie kan hou nie? In die verlede het getroue knegte, soos Moses en Jeremia, soms onbekwaam gevoel vir hulle toewysings (Eks. 3:10, 11; 4:10; Jer. 1:4-6). Hierdie gevoelens is dus nie ongewoon nie. Hoe kan dit oorkom word?
2. Waarom moet ons nie tevrede wees om ons bediening tot die predikingswerk van deur tot deur te beperk en die Bybelstudiewerk aan ander oor te laat nie?
2 Ons moet onthou dat Jehovah ons nooit vra om iets te doen wat bo ons vermoë is nie (Ps. 103:14). Ons kán dus ons opdrag uitvoer om ‘dissipels te maak’ en ‘hulle te leer’ (Matt. 28:19, 20). Dit is nie ’n voorreg wat Jehovah slegs aan die mees ervare of die talentvolste onder ons gegee het nie (1 Kor. 1:26, 27). Ons moet dus nie tevrede wees om ons bediening tot die predikingswerk van deur tot deur te beperk en die Bybelstudiewerk aan ander oor te laat nie.
3. Hoe het Jehovah ons vir die Bybelstudiewerk bekwaam gemaak?
3 Jehovah maak ons bekwaam: Ons bekwaamheid om dissipels te maak, kom van Jehovah (2 Kor. 3:5). Deur middel van sy organisasie het hy ons Bybelwaarhede geleer wat selfs die geleerdste mense in hierdie wêreld nie ken nie (1 Kor. 2:7, 8). Hy het ’n verslag bewaar van die onderrigmetodes van die Groot Onderrigter, Jesus, sodat ons dit kan navolg, en hy gee ons voortgesette opleiding deur middel van die gemeente. Daarbenewens het Jehovah dit nie aan ons oorgelaat om ons eie leerplan saam te stel om die Bybel aan ander te leer nie. Hy het hulpmiddele voorsien, soos die Leer Bybel-boek, wat die waarheid op ’n logiese en maklik verstaanbare manier uiteensit. Om ’n Bybelstudie te hou, is dalk makliker as wat ons dink.
4. Waarom kan ons vol vertroue wees dat Jehovah ons sal help?
4 Moses en Jeremia het hulle toewysings met Jehovah se hulp uitgevoer (Eks. 4:11, 12; Jer. 1:7, 8). Ons kan Jehovah ook vra om ons te help. Wanneer ons ’n Bybelstudie hou, leer ons iemand immers die waarheid omtrent Jehovah, en dit is welbehaaglik in God se oë (1 Joh. 3:22). Stel jou dit dus ten doel om deel te neem aan die Bybelstudiewerk, ’n baie aangename en lonende aspek van die bediening.