Jy kan ’n onderrigter wees!
1. Watter groot voorreg kan elke Koninkryksverkondiger geniet?
1 Een van die bevredigendste aspekte van die bediening is om iemand die waarheid te leer. Om te sien hoe hy op die Koninkryksboodskap reageer en hom te help om nader aan die Soewerein van die heelal te kom, is ’n onvergeetlike ondervinding (Jak. 4:8). Dit behoort elke Koninkryksverkondiger se doelwit te wees om iemand wat na die waarheid honger, te leer en te sien hoe daardie persoon belangrike veranderinge in sy persoonlikheid, beskouing en gedrag aanbring.—Matt. 28:19, 20.
2. Waarom huiwer sommige dalk om ’n Bybelstudie te hou, en wat sal hulle help om hierdie probleem te oorkom?
2 Vertrou op Jehovah: In die verlede was daar getroue knegte wat gevoel het dat hulle nie bevoeg is om hulle toewysing te vervul nie. Vertroue op Jehovah God het dit vir Moses, Jeremia, Amos en ander gewone mense moontlik gemaak om hulle eie gevoelens van onsekerheid of minderwaardigheid te oorkom en om belangrike toewysings uit te voer (Eks. 4:10-12; Jer. 1:6, 7; Amos 7:14, 15). Die apostel Paulus het ook “vrymoedigheid bymekaargeskraap”, of is volgens die letterlike betekenis “uitgesproke gemaak”. Hoe? Hy het gesê dat dit “deur middel van ons God” was (1 Tess. 2:2, vtn. in NW). Ja, almal van ons kan op Jehovah vertrou om die hulp, wysheid en krag te voorsien wat ons nodig het om produktiewe Bybelstudies te hou.—Jes. 41:10; 1 Kor. 1:26, 27; 1 Pet. 4:11.
3, 4. Watter opleiding is beskikbaar om ons te help om God se Woord aan ander te leer?
3 Aanvaar opleiding: Ons Grootse Onderrigter, Jehovah God, voorsien opleiding deur middel van ’n gereelde program van geestelike onderrigting sodat ons volkome bevoeg kan word as onderrigters (Jes. 54:13; 2 Tim. 3:16, 17). Aanvaar hierdie onderrigting deur ten volle gebruik te maak van geleenthede om jou begrip van die Skrif te verbreed en jou vermoë te verbeter om Bybelwaarhede aan ander te leer. Hoewel ons hierdie opleiding hoofsaaklik by die Teokratiese Bedieningskool en Diensvergadering kry, word ons by alle gemeentelike vergaderinge opgelei om ander uit God se Woord te leer.
4 Strewe daarna om eenvoudige maniere te vind om selfs diep geestelike waarhede aan ander te leer. Die Bedieningskool-boek, bladsy 227, verduidelik: “Jy moet jou onderwerp goed verstaan voordat jy dit vir ander verstaanbaar kan maak.” As ons by vergaderinge kommentaar lewer, help dit ons om hoofgedagtes in ons verstand vas te lê sodat ons dit in die toekoms kan gebruik. Berei dus goed voor, en jy sal meer vertroue in jou onderrigvermoë hê.
5. Watter bykomende opleiding het ons in die gemeente om ons te help om vooruitgang te maak as onderrigters?
5 Van die begin af het Christenbedienaars ongetwyfeld by mekaar geleer terwyl hulle die dissipelmaakwerk gedoen het (Luk. 10:1). Indien moontlik kan jy ervare verkondigers, insluitende pioniers, ouer manne en reisende opsieners, in die Bybelstudiewerk vergesel. Let op hoe hulle eenvoudige illustrasies en ander onderrigmiddels wat in ons studiepublikasies gevind word, gebruik om skriftuurlike waarhede te verduidelik. Vra hulle vir wenke oor hoe jy ’n beter onderrigter kan word (Spr. 1:5; 27:17). Hou in gedagte dat God die ware Bron van al hierdie opleiding is.—2 Kor. 3:5.
6. Wat is noodsaaklik om ’n onderrigter van God se Woord te word?
6 Vertrou op Jehovah, en vind baat by die opleiding wat hy voorsien. Maak jou vordering ’n saak van gebed (Ps. 25:4, 5). Jy kan ook die vreugde smaak om iemand te help om, soos jy, ’n onderrigter van God se Woord te word!