Verwelkom hulle!
1. Watter geleentheid bied ons ’n uitstekende kans om ’n getuienis te gee, en waarom?
1 Geen ander geleentheid bied ons ’n beter kans om ’n getuienis te lewer as die jaarlikse Gedenkmaal nie. Dink hieraan: Hierdie jaar verwag ons dat meer as tienmiljoen besoekers die Gedenkmaal sal bywoon en sal leer oor die twee grootste liefdeblyke wat deur die losprys geopenbaar is (Joh. 3:16; 15:13). Hulle sal leer omtrent die seëninge wat hulle kan geniet danksy Jehovah se gawe (Jes. 65:21-23). Die spreker is egter nie die enigste persoon wat by hierdie geleentheid ’n getuienis sal gee nie. Almal wat dit bywoon, sal die geleentheid hê om ’n kragtige getuienis te gee deur die besoekers hartlik te verwelkom.—Rom. 15:7.
2. Hoe kan ons besoekers hartlik verwelkom?
2 Neem gerus die inisiatief om jou aan ander voor te stel in plaas daarvan om net ’n sitplek te vind en stilletjies te wag vir die program om te begin. Besoekers is dalk senuweeagtig en onseker oor wat om te verwag. As ons hartlik glimlag en hulle vriendelik groet, sal dit help om hulle op hulle gemak te laat voel. Om uit te vind of iemand daar is omdat hy ’n uitnodiging ontvang het, kan jy hom vra of dit die eerste keer is wat hy een van ons vergaderinge bywoon en of hy iemand in die gemeente ken. Miskien kan jy hom nooi om langs jou te sit en jou Bybel en liedereboek met hom deel. As die Koninkryksaal gebruik word, kan jy hom dalk ’n kort toer gee. Ná die toespraak kan jy aanbied om sy vrae te beantwoord. As jou gemeente die saal gou moet verlaat sodat ’n ander gemeente dit kan gebruik, kan jy sê: “Ek sal graag wil hoor wat jy van die program gedink het. Is daar ’n manier waarop ek jou kan kontak?” Reël dan om die belangstelling verder te ontwikkel. Veral ouer manne moet gereed wees om onbedrywige verkondigers wat teenwoordig is, aan te moedig.
3. Waarom is dit belangrik dat ons die inisiatief neem om besoekers by die Gedenkmaal te verwelkom?
3 Vir baie besoekers sal dit die eerste keer wees wat hulle die vreugde, vrede en eenheid ervaar van die geestelike paradys wat ons as Jehovah se volk geniet (Ps. 29:11; Jes. 11:6-9; 65:13, 14). Watter indruk sal dit by besoekers laat? Baie sal daarvan afhang of ons die inisiatief neem om hulle te verwelkom.