Maak goed gebruik van ouer tydskrifte
Aangesien ouer tydskrifte van geen nut is vir enigeen as dit weggebêre of weggegooi word nie, moet ons dit probeer versprei. ’n Enkele tydskrif kan iemand se belangstelling in die waarheid prikkel en hom beweeg om die naam van Jehovah te begin aanroep (Rom. 10:13, 14). Hieronder is ’n paar wenke oor hoe ons ouer tydskrifte goed kan gebruik.
As jy preek in gebied wat nie dikwels gedek word nie, kan jy miskien ’n tydskrif op ’n onopsigtelike plek laat as niemand tuis is nie.
Wanneer jy openbare getuieniswerk doen op plekke waar mense wag, soos by bushaltes of treinstasies, kan jy mense vra of hulle iets wil hê om te lees en hulle dan van die ouer nommers van die tydskrifte wys.
As jy wasserye, verpleeginrigtings, klinieke of soortgelyke plekke in julle gemeente se gebied besoek, kan jy ’n paar ouer eksemplare in die wagkamer los. Dit is gewoonlik goed om die toestemming van die persoon in beheer te verkry as hy of sy daar is. As jy sien dat daar reeds tydskrifte is, moet jy nie nog daar los nie.
Wanneer jy voorberei om herbesoeke te doen, kan jy dink oor waarin elkeen van hulle belangstel. Het hy ’n gesin? Hou hy daarvan om te reis? Is dit vir hom lekker om tuin te maak? Kyk deur ouer tydskrifte om te sien of daar dalk ’n artikel is wat hy sal geniet, en wys dit vir hom wanneer jy hom weer besoek.
Wanneer jy ’n belangstellende weer by die huis vind nadat jy hom etlike kere probeer kontak het, kan jy vir hom van die ouer tydskrifte wys wat hy misgeloop het.