Verbeter jou vaardighede in die bediening—Hoe om ’n gesprek te begin om informeel te getuig

Waarom dit belangrik is: Wanneer ons aan die huis-tot-huis-bediening deelneem, vind ons dikwels dat baie mense nie tuis is nie. Maar ons sal dalk met hulle in aanraking kom wanneer ons publieke vervoer gebruik, in ’n dokter se spreekkamer wag, gedurende ons teetyd by die werk, tydens ons pouse by die skool, ensovoorts. Dit is Jehovah se wil dat almal ’n geleentheid moet kry om die Koninkryksboodskap te hoor (1 Tim. 2:3, 4). Om te getuig, moet ons dikwels die inisiatief neem om ’n gesprek te begin.

Hoe om dit te doen:

Wees selektief. Lyk dit asof die persoon vriendelik is en bereid is om te gesels? Is die omstandighede gepas vir ’n ontspanne gesprek? Party verkondigers maak eers oogkontak met die persoon en glimlag dan. As die persoon terugglimlag, probeer hulle ’n gesprek aanknoop.
Doen ’n kort, stille gebed as jy nie die moed het om te praat nie.—Neh. 2:4; Hand. 4:29.
Begin die gesprek met ’n eenvoudige opmerking deur dalk net te groet. Jesus het nie sy gesprek met die Samaritaanse vrou begin deur oor die Koninkryk te praat nie (Joh. 4:7). Soms kan ’n mens ’n gesprek begin deur die ander persoon te prys en byvoorbeeld te sê: “Jou kinders is so goedgemanierd!” Nog ’n manier is deur ’n vraag te vra, soos byvoorbeeld: “Het jy gisteraand daardie nuusberig gesien?”
Wanneer die gesprek aan die gang is, kan jy soek na ’n geleentheid om oor die goeie nuus te praat, maar moenie haastig wees nie. Laat die gesprek natuurlik ontwikkel. Dalk kan jy iets sê wat die persoon se nuuskierigheid wek en hom moontlik beweeg om jou ’n vraag te vra. Byvoorbeeld, as die gesprek oor die gesinslewe handel, kan jy sê: “Ek het betroubare raad gevind oor die grootmaak van kinders.” As julle praat oor ’n nuusberig, kan jy sê: “Ek het dit onlangs geniet om vir ’n verandering goeie nuus te lees.” Moenie ontmoedig voel as die gesprek eindig voordat jy ’n getuienis kon gee nie.
Hou traktate by jou wat jy vir iemand kan gee wat belangstelling toon.

Wenk vir die maand:

Probeer om elke week ten minste een gesprek te begin met die doel om informeel te getuig.