Verbeter jou vaardighede in die bediening—Lê die grondslag vir ’n herbesoek

Waarom dit belangrik is: Wanneer ons iemand vind wat belangstelling toon, wil ons teruggaan wanneer die persoon by die huis sal wees sodat ons die saadjie van waarheid wat ons geplant het, kan natgooi (1 Kor. 3:6). Dit behels dikwels dat ons, voordat ons gaan, die grondslag lê vir ’n herbesoek deur uit te vind wanneer ons kan terugkom. Dit is ook goed om ’n vraag te vra wat ons tydens die volgende besoek sal bespreek. Dit sal die huisbewoner laat uitsien na ons volgende besoek, en as die vraag beantwoord word in die publikasie wat ons by hom gelaat het, sal hy meer geneig wees om dit te lees. As ons die grondslag lê vir die volgende gesprek, sal dit ook makliker wees om terug te gaan omdat die onderwerp reeds gekies is en omdat die huisbewoner sal weet wat om te verwag. Wanneer ons hom weer sien, kan ons sê dat ons teruggekom het om die vraag te beantwoord wat ons tydens die vorige besoek gevra het en dan die gesprek voortsit.

Hoe om dit te doen:

Wanneer jy jou aanbieding vir die huis-tot-huis-bediening voorberei, moet jy ook ’n vraag voorberei wat jy tydens die volgende besoek kan beantwoord. Dit kan gebaseer wees op ’n onderwerp wat in die lektuur bespreek word wat jy daardie dag aanbied, of dit kan ’n vraag wees wat beantwoord word in een van ons studiepublikasies, wat jy vir die huisbewoner kan wys as jy teruggaan.
Wanneer jy ’n gesprek beëindig met iemand wat belangstelling toon, moet jy vir hom sê dat jy graag weer met hom wil praat en dan die vraag vra wat jy voorberei het. In party gebiede is mense baie besig en is hulle dalk huiwerig om ’n afspraak met jou te maak. As dit die geval is, kan jy sê: “Is jy gewoonlik dié tyd by die huis? [Wag vir ’n antwoord.] Ek sal jou graag volgende week kortliks wil besoek om hierdie vraag te beantwoord . . . As jy te besig is wanneer ek terugkom, kan jy net vir my sê.”
As jy vir die huisbewoner sê dat jy op ’n sekere tyd sal terugkom, moet jy jou afspraak nakom (Matt. 5:37). Aan die einde van die herbesoek moet jy die grondslag lê vir die volgende besoek.

Wenk vir die maand:

Wanneer jy jou aanbieding voorberei, moet jy ook ’n vraag voorberei wat jy tydens die volgende besoek kan beantwoord. Sê vir die verkondigers saam met wie jy werk watter vraag jy voorberei het.