Hou aan om as ’n bedienaar vordering te maak
1. Watter voorbeelde uit die eerste eeu toon dat ons as bedienaars vordering moet maak?
1 Christene moet as bedienaars vordering maak. Dit is waarom Jesus sy volgelinge progressiewe opleiding in die predikingswerk gegee het (Luk. 9:1-5; 10:1-11). Dit is ook waarom Aquila en Priscilla Apollos by hulle geneem het en “die weg van God met groter juistheid vir hom uitgelê” het (Hand. 18:24-26). Paulus het die ervare evangeliedienaar Timoteus om dieselfde rede aangespoor om voort te gaan om hom toe te lê op sy onderrigting sodat sy vooruitgang “vir almal duidelik kan wees” (1 Tim. 4:13-15). Ongeag hoe lank ons al ’n verkondiger van die goeie nuus is, ons moet aanhou om ons vaardighede in die predikingswerk te verbeter.
2. Hoe kan ons by ander leer?
2 Leer by ander: Een manier waarop ons ons vaardighede kan verbeter, is deur by ander te leer (Spr. 27:17). Daarom moet ons aandag skenk wanneer medeverkondigers hulle aanbieding doen. Vra bekwame verkondigers vir spesifieke wenke, en luister aandagtig na wat hulle sê (Spr. 1:5). Is jy onseker oor hoe om ’n herbesoek te doen, ’n Bybelstudie te begin of aan ’n ander aspek van die bediening deel te neem? Neem die inisiatief, en vra jou groepopsiener of ’n ervare verkondiger om jou op te lei. Onthou ook dat Jehovah se heilige gees ons kan help om ons vaardighede te verbeter, en bid dus gereeld daarvoor.—Luk. 11:13.
3. Hoe moet ons reageer as iemand ons ’n wenk gee, al het ons dalk nie daarvoor gevra nie?
3 Moenie aanstoot neem as iemand jou ’n wenk gee oor hoe jy in die bediening kan verbeter nie, selfs al het jy nie daarvoor gevra nie (Pred. 7:9). Soos Apollos, moet ons die hulp met nederigheid en dankbaarheid aanvaar. Dit sal toon dat ons wys is.—Spr. 12:15.
4. Watter kragtige rede het Jesus gegee waarom ons as evangeliedienaars vordering moet maak?
4 Vordering verheerlik God: Jesus het sy volgelinge deur middel van ’n illustrasie aangespoor om as bedienaars vordering te maak. Hy het homself met ’n wingerdstok vergelyk, en sy gesalfde volgelinge met die lote. Hy het gesê dat die Vader elke loot wat vrug dra, skoonmaak “sodat dit meer vrug kan dra” (Joh. 15:2). Net soos die eienaar van ’n wingerd wil hê dat die lote van sy wingerdstokke meer druiwe moet dra, wil Jehovah hê dat ons moet aanhou om te verbeter wat ons vermoë betref om “die vrug van die lippe” voort te bring (Heb. 13:15). Wat is die bevredigende resultaat wanneer ons as ’n evangeliedienaar vordering maak? Jesus gee ons die antwoord: “My Vader word hierin verheerlik, dat julle veel vrug bly dra.”—Joh. 15:8.