Ons is nooit alleen nie

1-2. (a) Hoekom kan ons sê dat ons nooit moeilike tye alleen deurmaak nie? (b) Wat sal ons in hierdie artikel bespreek?

WANNEER ons moeilike tye deurmaak, voel ons dalk asof ons stoksielalleen in ’n klein bootjie op ’n stormagtige see is. Maar ons is nie alleen nie. Ons liefdevolle hemelse Vader sien nie net die moeilike tye wat ons deurmaak nie, maar hy belowe ook om ons te help om dit te hanteer. Jehovah gee hierdie liefdevolle versekering aan sy lojale knegte: “Ek sal jou help.” – Jes. 41:10.

² Hierdie artikel sal bespreek hoe Jehovah ons help (1) deur ons te lei, (2) deur vir ons te sorg, (3) deur ons te beskerm en (4) deur ons te vertroos. Jehovah verseker ons dat hy ons nooit sal vergeet nie, maak nie saak watter uitdagings ons in die lewe het nie. Hy sal ons nooit verlaat nie. So ons is nooit alleen nie.

JEHOVAH LEI ONS

3-4. Hoe lei Jehovah ons? (Psalm 48:14)

³ Lees Psalm 48:14. Jehovah verwag nie dat ons onsself moet lei nie. Hoe lei hy vandag sy lojale aanbidders? Een manier hoe hy dit doen, is deur middel van die blaaie van die Bybel (Ps. 119:105). Deur middel van sy geïnspireerde Woord help Jehovah ons om besluite te maak en eienskappe te ontwikkel wat ons help om nou gelukkiger te wees en om in die toekoms die ewige lewe te kry.a Byvoorbeeld, hy leer ons om ander te vergewe en nie vir hulle kwaad te bly nie, om eerlik te wees in alles wat ons doen en om ander intens uit die hart lief te hê (Ps. 37:8; Heb. 13:18; 1 Pet. 1:22). Wanneer ons sulke goddelike eienskappe openbaar, word ons beter ouers, huweliksmaats en vriende.

⁴ En Jehovah het in sy Woord ondervindinge van werklike mense ingesluit wat probleme en gevoelens net soos ons s’n gehad het (1 Kor. 10:13; Jak. 5:17). Wanneer ons hierdie ware verhale lees en die lesse wat ons leer, toepas, vind ons op ten minste twee maniere daarby baat. Eerstens, ons besef dat ons nie alleen is nie – ander het soortgelyke situasies deurgemaak en dit suksesvol verduur (1 Pet. 5:9). En tweedens, ons leer hoe om ons moeilike tye te verduur. – Rom. 15:4.

5. Wie gebruik Jehovah om ons te lei op die pad na die lewe?

⁵ Jehovah het ook gereël dat medegelowiges ons lei.b Byvoorbeeld, kringopsieners besoek gemeentes gereeld om ons aan te moedig. Hulle toesprake versterk ons geloof en help ons om ons kosbare eenheid te behou (Hand. 15:40–16:5). Gemeentelike ouermanne stel ook opreg belang in elke verkondiger (1 Pet. 5:​2, 3). Ouers lei hulle kinders geestelik en help hulle om goeie denkvermoë en gesonde persoonlike gewoontes te ontwikkel (Spr. 22:6). En volwasse Christenvroue help jonger susters deur ’n goeie voorbeeld te stel, praktiese raad te gee en hulle liefdevol aan te moedig. – Tit. 2:​3-5.

6. Wat moet ons doen om by Jehovah se leiding baat te vind?

⁶ Jehovah het sy deel gedoen deur ons die leiding te gee wat ons nodig het. Hoe kan ons wys dat ons waardeer wat hy vir ons gedoen het? Spreuke 3:​5, 6 sê: “Vertrou op Jehovah met jou hele hart, en moenie op jou eie begrip staatmaak nie.” Wanneer ons dit doen, sal “hy [ons] paaie gelykmaak”; dit wil sê, hy sal ons help om baie probleme te vermy en om ’n gelukkige lewe te hê. Ons is baie dankbaar dat Jehovah ons liefdevolle, persoonlike raad gee! – Ps. 32:8.

JEHOVAH SORG VIR ONS

7. Wat is party maniere hoe Jehovah vir ons sorg? (Filippense 4:19)

⁷ Lees Filippense 4:19. Jehovah lei ons nie net nie, maar hy help ons ook terwyl ons hard werk vir die kos en die klere wat ons nodig het, sowel as ’n plek om te bly (Matt. 6:33; 2 Tess. 3:12). Al is dit normaal om bekommerd te wees oor ons fisiese behoeftes, moedig Jehovah ons aan om nie te bekommerd te wees oor sulke dinge nie. (Sien studienota vir Matteus 6:25 in die Engelse Studiebybel.) Hoekom nie? Omdat ons Vader nooit sy getroue aanbidders in hulle tyd van nood in die steek sal laat nie (Matt. 6:8; Heb. 13:5). Ons kan hom heeltemal vertrou wanneer hy sê dat hy vir ons sal sorg.

8. Wat het Jehovah vir Dawid gedoen?

⁸ Dink aan die manier hoe Jehovah Dawid gehelp het. Gedurende die moeilike jare toe Dawid ’n vlugteling was, het Jehovah vir hom en sy manne gegee wat hulle nodig gehad het om te oorleef. Toe Dawid nagedink het oor Jehovah se liefdevolle sorg oor die jare het hy geskryf: “Ek was eens jonk en nou is ek oud, maar ek het nog nooit gesien dat ’n regverdige verlaat word of dat sy kinders na brood soek nie” (Ps. 37:25). Jy het ook waarskynlik gedurende jou eie leeftyd gesien hoe Jehovah liefdevol sorg vir sy toegewyde knegte.

9. Hoe sorg Jehovah vandag vir sy volk wanneer daar rampe is? (Sien ook prente.)

⁹ Jehovah sorg ook vir sy volk wanneer daar rampe is. Byvoorbeeld, toe daar in die eerste eeu ’n hongersnood was, het Christene van verskillende lande bydraes gestuur vir hulle broers en susters wat dit nodig gehad het (Hand. 11:​27-30; Rom. 15:​25, 26). Vandag is God se volk net so vrygewig. Wanneer daar ’n ramp is, beweeg Jehovah sy volk liefdevol om noodsaaklike dinge soos kos, water, klere en medikasie te voorsien aan dié wat in die geaffekteerde gebiede bly. Konstruksiespanne herstel beskadigde huise en Koninkryksale. En Jehovah se knegte is vinnig om emosionele en geestelike ondersteuning te voorsien aan dié wat hulle huise of hulle geliefdes verloor het.c

10-11. Wat leer jy uit Boris se ondervinding?

¹⁰ Jehovah sorg ook oorvloedig vir dié wat hom nog nie dien nie. Net so soek ons ook na geleenthede om liefdevol te wees teenoor dié wat nie dieselfde oortuigings as ons het nie (Gal. 6:10). Dit lei dikwels tot ’n goeie getuienis. Kyk na die ondervinding van Boris, ’n skoolhoof wat in Oekraïne bly. Al is Boris nie een van Jehovah se Getuies nie, was hy altyd vriendelik teenoor sy Getuie-studente en het hy gewys dat hy hulle oortuigings respekteer. Toe Boris besluit het om die oorlogsone waar hy bly te verlaat en na ’n veiliger deel van die land te gaan, het ons broers hom gehelp. Later het Boris die Herdenking van Christus se dood bygewoon. Toe hy oor sy ondervinding nagedink het, het Boris gesê: “Die Getuies was baie liefdevol teenoor my en het mooi na my gekyk. Ek is dankbaar teenoor Jehovah se Getuies.”

¹¹ Ons kan ook ons genadige hemelse Vader navolg deur liefde te betoon aan dié wat dit nodig het, of hulle nou dieselfde oortuigings as ons het of nie (Luk. 6:​31, 36). Ons hoop dat die liefde wat ons aan mense betoon, daartoe sal lei dat hulle dissipels van Christus word (1 Pet. 2:12). Maar of hulle nou kies om Jehovah te dien of nie, ons sal gelukkig wees omdat dit “’n mens gelukkiger [maak] om te gee”. – Hand. 20:35.

JEHOVAH BESKERM ONS

12. Hoe belowe Jehovah om sy volk as ’n groep te beskerm? (Psalm 91:​1, 2, 14)

¹² Lees Psalm 91:​1, 2, 14. Jehovah belowe om ons vandag geestelik te beskerm. Hy sal Satan nooit toelaat om sy volk te keer om Hom te aanbid op die manier wat Hy goedkeur nie (Joh. 17:15). En wanneer “die groot verdrukking” begin, kan ons die volle vertroue hê dat Jehovah sy beloftes sal vervul om sy volk nie net geestelik nie maar ook fisies te beskerm. – Op. 7:​9, 14.

13. Hoe beskerm Jehovah ons as individue?

¹³ Hoe beskerm Jehovah ons as individue? Deur middel van die Bybel help Jehovah ons om te onderskei wat reg en wat verkeerd is (Heb. 5:14). Wanneer ons volgens die beginsels in God se Woord lewe, beskerm ons onsself geestelik sowel as fisies (Ps. 91:4). En Jehovah beskerm ons deur middel van die gemeente (Jes. 32:​1, 2). Wanneer ons ons omring met dié wat vir Jehovah lief is en wat volgens sy beginsels lewe, word ons aangemoedig en versterk om slegte invloede te weerstaan. – Spr. 13:20.

14. (a) Hoekom beskerm Jehovah ons nie teen al die moeilike dinge wat ons deurmaak nie? (b) Waarvan verseker Psalm 9:10 ons? (Sien ook voetnoot.)

¹⁴ Soms het Jehovah sy aanbidders in die verlede fisies beskerm. Maar hy het dit nie altyd gedoen nie. Soms tref “onverwagse gebeure” ons (Pred. 9:11). En Jehovah het toegelaat dat sy knegte regdeur die geskiedenis vervolg en selfs doodgemaak word om Satan ’n leuenaar te bewys (Job 2:​4-6; Matt. 23:34). Dit is vandag ook die geval. Al verwyder Jehovah dalk nie die moeilike dinge wat ons deurmaak nie, kan ons seker wees dat hy nooit dié wat hom liefhet, sal verlaat nie.d – Ps. 9:10.

JEHOVAH VERTROOS ONS

15. Hoe word ons vertroos deur middel van gebed, God se Woord en mede-Christene? (2 Korintiërs 1:​3, 4)

¹⁵ Lees 2 Korintiërs 1:​3, 4. Soms is ons hartseer, angstig of ontsteld. Dalk gaan jy nou deur ’n moeilike situasie wat jou alleen laat voel. Verstaan enige iemand hoe jy voel? Jehovah verstaan. Hy voel nie net ons pyn nie, maar hy “vertroos ons wanneer ons deur moeilike tye gaan”. Hoe? Wanneer ons Jehovah in gebed smeek om ons te help, gee hy ons “die vrede van God, wat alle denke oortref” (Fil. 4:​6, 7). Ons word ook vertroos wanneer ons Jehovah se woorde aan ons in die Bybel lees. Die geïnspireerde woorde van liefde, wysheid en hoop in daardie skat kan ons beter laat voel. Ons word ook vertroos by ons vergaderinge waar ons aanmoedigende dinge uit die Bybel leer en waar ons saam met ons broers en susters is wat vir ons lief is.

16. Wat leer jy uit die ondervinding van Nathan en Priscilla?

¹⁶ Om te sien hoe Jehovah ons deur middel van sy Woord vertroos en aanmoedig, kyk na die ondervinding van Nathan en Priscilla, wat in die Verenigde State bly. ’n Paar jaar gelede het hulle besluit om te trek na ’n plek waar daar meer Koninkryksverkondigers nodig was. “Ons het vertrou dat Jehovah ons pogings sou seën,” sê Nathan. Maar nadat hulle in hulle nuwe toewysing aangekom het, het hulle onverwagse gesondheidsprobleme en geldprobleme gehad. Die paartjie moes uiteindelik teruggaan huis toe, waar hulle nog steeds finansieel gesukkel het. “Ek het gewonder hoekom God ons nie geseën het op die manier wat ons gedink het hy sou nie,” sê Nathan. “Ek het selfs begin wonder of ek iets verkeerds gedoen het.” Maar later het Nathan en Priscilla besef dat God hulle nie in hulle tyd van nood verlaat het nie. “Gedurende daardie moeilike tye het die Bybel soos ’n wyse vriend geword wat ons aanmoedig en lei,” sê Nathan. “Omdat ons gefokus het op hoe Jehovah ons gehelp het om daardie moeilike tyd te verduur eerder as op die moeilike tyd self, het dit ons voorberei om toekomstige uitdagings met geloof te hanteer.”

17. Hoe is ’n suster met die naam Helga vertroos? (Sien ook prent.)

¹⁷ Ons broers en susters kan ons verder vertroos. Hoe so? Kyk na die voorbeeld van Helga, wat in Hongarye woon. Sy het jare lank verskillende uitdagings gehad wat haar angstig en waardeloos laat voel het. Maar wanneer sy terugkyk, kan sy sien hoe Jehovah haar deur middel van die gemeente vertroos het. Sy skryf: “Jehovah het my nog altyd gehelp wanneer hy gesien het dat my krag min is omdat ek sekulêr gewerk het, vir my siek kind gesorg het en ander probleme gehad het. Daar was nie ’n dag gedurende die laaste 30 jaar dat hy nie sy belofte gehou het om my te vertroos nie. Hy versterk my dikwels deur die liefdevolle en aanmoedigende woorde van ander. Iemand het my dikwels geprys of vir my ’n kaartjie of ’n boodskap gestuur wanneer ek dit die nodigste gehad het.”

18. Hoe kan ons ander vertroos?

¹⁸ Ons het die voorreg om ons God na te volg deur ander te vertroos. Hoe kan ons dit doen? Ons kan geduldig na hulle luister, hulle vertroos en hulle op praktiese maniere help (Spr. 3:27). Ons doen ons bes om almal wat ly, insluitende dié wat God nog nie dien nie, te vertroos. Wanneer ander mense hartseer, siek of angstig is, besoek ons hulle, luister ons na hulle en deel ons aanmoedigende verse uit die Bybel met hulle. Wanneer ons Jehovah, “die God van alle vertroosting,” navolg, help ons dalk nie net ons medegelowiges om moeilike tye te verduur nie, maar ook om ongelowiges se harte teenoor ware aanbidding te versag. – Matt. 5:16.

JEHOVAH IS ALTYD DAAR VIR ONS

19. Wat doen Jehovah vir ons, en hoe kan ons hom navolg?

¹⁹ Jehovah is baie besorg oor almal wat hom liefhet. Hy verlaat ons nie wanneer ons moeilike tye ondervind nie. Net soos ’n ouer liefdevol vir ’n kind sorg, sorg Jehovah vir sy getroue aanbidders. Hy lei ons, sorg vir ons, beskerm ons en vertroos ons. Ons volg ons liefdevolle hemelse Vader na wanneer ons ander gedurende hulle moeilike tye ondersteun en aanmoedig. Al sal ons uitdagings en hartseer tye ondervind, kan ons oortuig wees dat Jehovah met ons is. Ja, hy het belowe: “Moenie bang wees nie, want ek is met jou” (Jes. 41:10). So ons kan die volle vertroue hê dat ons nooit alleen is nie!