Wanneer Vigs geen bedreiging is nie

Op die aand van 3 Oktober 1984 is jong Kyle Bork sewe weke te vroeg gebore. Sy longetjies was te swak om normaal te funksioneer, en hy is dus na die Kinderhospitaal van Orange County, 56 kilometer daarvandaan, oorgeplaas, waar daar toerusting beskikbaar was om babas te behandel wat in so ’n bedenklike toestand is.

Die dokter het verduidelik dat Kyle se bloed deur ’n bloedoortapping aangevul moes word; anders sou hy na alle waarskynlikheid sterf. Hoewel dit vir die ouers baie moeilik was, het hulle gebly by hulle Bybelse besluit om nie toe te laat dat hulle baba ’n bloedoortapping kry nie (Genesis 9:4, 5; Levitikus 17:10-14; Handelinge 15:28, 29). Die dokter was simpatiek en tegemoetkomend. Maar hy het gesê dat hy ’n hofbevel sou kry en bloed sou toedien indien die toestand absoluut kritiek sou raak.

Verbasend genoeg het Kyle se toestand bly verbeter, en teen die negende dag is hy van die asemhalingstoestel afgehaal. Twee dae later het die ouers hom huis toe geneem en, soos julle op die foto kan sien, het hy ’n gelukkige, gesonde kind geword. Maar dit is nie die einde van die verhaal nie.

Verlede jaar het ’n televisienuusuitsending uit Los Angeles berig dat ’n paar van die kinders wat ongeveer dieselfde tyd as Kyle in die Kinderhospitaal van Orange County was Vigs gekry het weens oortappings met besmette bloed. Die hospitaal het probeer om met die gesinne van ongeveer 3000 kinders in aanraking te kom sodat hulle vir die Vigs-virus getoets kon word.

Kyle se ouers het die hospitaal onmiddellik gebel om seker te maak dat hy nie sonder hulle medewete ’n bloedoortapping gekry het nie. Die hospitaal het hulle kort daarna teruggebel en hulle verseker dat hy geen bloed ontvang het nie en dus nie gevaar geloop het om Vigs te kry nie. “Ons het letterlik op ons knieë gegaan en Jehovah gedank”, het die ouers verduidelik, “omdat hy ons sy regverdige wette gegee het en die krag om ons onkreukbaarheid ondanks so ’n toets te handhaaf.”