Werk—’n Seën of ’n vloek?
“Vir ’n mens is daar niks beters nie as dat hy . . . die goeie . . . sien weens sy harde werk.”—Prediker 2:24.
“UITGEPUT aan die einde van die werksdag.” In ’n onlangse opname het 1 uit 3 werknemers gesê dat hulle baie dikwels so voel. Dit is beslis nie verbasend in ’n milieu waar mense aan spanning ly nie; hulle werk langer en neem meer werk huis toe—terwyl hulle werkgewers selde hulle waardering uitspreek.
Die koms van massaproduksie het baie werkers laat voel asof hulle maar net ratjies in ’n ontsaglike, onpersoonlike masjien is. Inspirasie en kreatiwiteit word dikwels onderdruk. Dit beïnvloed natuurlik mense se gesindheid teenoor werk. Motivering om persoonlike belangstelling in jou werk te toon, kan maklik afneem. Die begeerte om ’n voortreflike vakman te wees, kan geblus word. Hierdie gevolge kan veroorsaak dat ’n persoon ’n teësin in die werk self kry en kan hom sy werk laat haat.
Ons moet ons gesindheid ondersoek
Ons kan weliswaar nie altyd ons omstandighede verander nie. Maar stem jy nie saam dat ons ons gesindheid kan verander nie? As jy vind dat jy tot ’n mate deur negatiewe gesindhede teenoor werk beïnvloed is, sal dit verstandig wees om God se beskouing en beginsels in hierdie verband te ondersoek (Prediker 5:18). Baie het gevind dat so ’n ondersoek hulle ’n mate van geluk en tevredenheid in hulle werk gegee het.
God is die Voortreflikste Werker. God is ’n werker. Dalk het ons nog nie so aan hom gedink nie, maar dit is hoe hy hom aan die begin van die Bybel uitbeeld. Die Genesisverslag begin met Jehovah se skepping van die hemel en die aarde (Genesis 1:1). Dink aan die verskeidenheid rolle wat God aangeneem het toe hy begin skep het—ontwerper, organiseerder, ingenieur, kunstenaar, grondstofdeskundige, projekontwikkelaar, chemikus, bioloog, dierkundige, programmeerder, taalkundige, om maar net ’n paar te noem.—Spreuke 8:12, 22-31.
Wat was die gehalte van God se werk? Die Bybelverslag sê dat dit “goed”, “baie goed”, was (Genesis 1:4, 31). Ja, die skepping “maak die heerlikheid van God bekend”, en ook ons moet hom loof!—Psalm 19:1; 148:1.
God se werk het egter nie opgehou met die skepping van die fisiese hemel en aarde en die eerste mensepaar nie. Jehovah se Seun, Jesus Christus, het gesê: “My Vader het tot nou toe aangehou werk” (Johannes 5:17). Ja, Jehovah hou aan werk deur vir sy skepsele te sorg, sy skepping te onderhou en sy getroue aanbidders te red (Nehemia 9:6; Psalm 36:6; 145:15, 16). Hy gebruik selfs mense, “God se medewerkers”, om sekere take te help verrig.—1 Korintiërs 3:9.
Werk kan ’n seën wees. Sê die Bybel nie dat werk ’n vloek is nie? Dit lyk dalk of Genesis 3:17-19 te kenne gee dat God Adam en Eva vir hulle opstand gestraf het deur werk as ’n las op hulle te plaas. Toe God daardie eerste mense veroordeel het, het hy vir Adam gesê: “In die sweet van jou aangesig sal jy brood eet totdat jy na die grond terugkeer.” Was dit ’n algemene veroordeling van werk?
Nee. Maar weens Adam en Eva se ontrouheid sou die Edeniese Paradys nie daar en dan uitgebrei word nie. Die grond is deur God vervloek. Slegs met geswoeg en gesweet sou iemand uit die grond ’n bestaan kon maak.—Romeine 8:20, 21.
Die Bybel beskryf werk nie as ’n vloek nie, maar as ’n seën wat hoog op prys gestel moet word. Soos hierbo genoem is, is God self ’n harde werker. Jehovah het die mens na sy beeld geskep en hulle die vermoë en gesag gegee om vir sy aardse skepping te sorg (Genesis 1:26, 28; 2:15). Daardie werkstoewysing is gegee voordat God die woorde in Genesis 3:19 uitgespreek het. As werk ’n vloek en ’n euwel was, sou Jehovah mense nooit aangemoedig het om dit te doen nie. Noag en sy gesin het voor en ná die Vloed baie werk gehad. In die Christelike tydperk is Jesus se dissipels ook aangespoor om te werk.—1 Tessalonisense 4:11.
Nogtans weet ons almal dat werk deesdae moeilik kan wees. Spanning, gevare, verveeldheid, teleurstelling, mededinging, bedrog en onregverdigheid is net sommige van die “dorings en dissels” wat nou daarmee gepaardgaan. Maar werk op sigself is nie ’n vloek nie. In Prediker 3:13 noem die Bybel werk en die vrugte daarvan ’n gawe van God.—Sien die venster “Bied werkverwante spanning die hoof”.
Jy kan God met jou werk verheerlik. Gehalte en voortreflikheid by die werk is nog altyd geprys. Gehalte is ’n belangrike aspek van ’n Bybelse beskouing van werk. God self doen voortreflike werk. Hy het ons talente en vermoëns gegee en wil hê dat ons ons vaardighede vir ’n goeie doel moet gebruik. Toe die tabernakel in eertydse Israel gemaak is, het Jehovah byvoorbeeld mense soos Besaleël en Oholiab met wysheid, begrip en kennis vervul, wat hulle in staat gestel het om spesifieke kunstige en praktiese take te verrig (Eksodus 31:1-11). Dit wys dat God ’n besondere belangstelling getoon het in die uitvoering, vakmanskap, ontwerp en ander besonderhede van hulle werk.
Dit kan ’n groot invloed hê op ons beskouing van persoonlike vermoëns en werksgewoontes. Dit help ons om dié dinge in sekere sin as gawes van God te sien, wat nie as vanselfsprekend aangeneem moet word nie. Christene word dus gemaan om hulle werk te doen asof God self hulle werk beoordeel: “Wat julle ook al doen, doen dit met julle hele siel soos vir Jehovah en nie vir mense nie” (Kolossense 3:23). God se knegte word beveel om goeie werk te doen, wat die Christelike boodskap vir medewerkers en ander aantrekliker maak.—Sien die venster “Die toepassing van Bybelbeginsels by die werk”.
In die lig hiervan sal dit verstandig van ons wees om ons af te vra of ons werk van goeie gehalte lewer en vlytig is. Sal God gelukkig wees met ons werk? Is ons heeltemal tevrede met die manier waarop ons ons toegewese take uitvoer? Indien nie, is daar ruimte vir verbetering.—Spreuke 10:4; 22:29.
Handhaaf ’n balans tussen werk en geestelikheid. Hoewel harde werk prysenswaardig is, is daar nog ’n belangrike faktor wat ons kan help om bevrediging in ons werk en in die lewe te vind. Dit is geestelikheid. Koning Salomo, wat hard gewerk het en al die rykdom en geriewe geniet het wat die lewe kon bied, het tot dié slotsom gekom: “Vrees die ware God en onderhou sy gebooie. Want dit is die hele verpligting van die mens.”—Prediker 12:13.
Dit is duidelik dat ons God se wil in ag moet neem in alles wat ons doen. Tree ons in ooreenstemming met sy wil op, of dalk in stryd daarmee? Probeer ons God behaag, of probeer ons net onsself behaag? As ons nie God se wil doen nie, sal ons uiteindelik die pyn ervaar wat met wanhoop, eensaamheid en ’n gevoel van leegheid gepaardgaan.
Steven Berglas het voorgestel dat beroepsmense wat aan uitbranding ly, ‘iets vind waaroor hulle geesdriftig voel en dit ’n deel van hulle lewe maak’. Niks is verdiensteliker as om die Een te dien wat ons die vaardighede en vermoëns gegee het om betekenisvolle werk te doen nie. Om werk te doen wat ons Skepper behaag, sal ons nie onvergenoegd laat voel nie. Vir Jesus was die werk wat Jehovah hom gegee het, net so heilsaam, bevredigend en verkwikkend soos voedsel (Johannes 4:34; 5:36). En onthou dat God, die Voortreflikste Werker, ons nooi om sy “medewerkers” te word.—1 Korintiërs 3:9.
Wanneer ons God aanbid en geestelik groei, berei dit ons voor vir lonende werk en verantwoordelikheid. Aangesien ons werk dikwels met baie druk, konflikte en eise gepaardgaan, kan ons diepgewortelde geloof en geestelikheid ons van broodnodige krag voorsien wanneer ons daarna strewe om beter werkers of werkgewers te wees. Daarenteen kan die werklikhede van die lewe in hierdie goddelose wêreld ons bewus maak van gebiede waarop ons in ons geloof moet groei.—1 Korintiërs 16:13, 14.
Wanneer werk ’n seën sal wees
Diegene wat nou hard werk om God te dien, kan uitsien na die tyd wanneer hy die Paradys sal herstel en daar wêreldwyd bevredigende werk sal wees. Jesaja, ’n profeet van Jehovah, het aangaande die lewe in daardie tyd voorspel: “Hulle sal beslis huise bou en dit bewoon; en hulle sal beslis wingerde plant en die vrug daarvan eet. Hulle sal nie bou sodat iemand anders dit bewoon nie; hulle sal nie plant sodat iemand anders dit eet nie. . . . Die werk van hulle eie hande sal my uitverkorenes ten volle benut.”—Jesaja 65:21-23.
Wat ’n seën sal werk dan wees! Mag jy, deur te leer wat God se wil vir jou is en in ooreenstemming daarmee op te tree, onder die geseëndes van Jehovah wees en altyd ‘die goeie sien vir al jou harde werk’.—Prediker 3:13.
[Lokteks op bladsy 8]
God is die Voortreflikste Werker: Genesis 1:1, 4, 31; Johannes 5:17
[Lokteks op bladsy 8]
Werk kan ’n seën wees: Genesis 1:28; 2:15; 1 Tessalonisense 4:11
[Lokteks op bladsy 8]
Jy kan God met jou werk verheerlik: Eksodus 31:1-11; Kolossense 3:23
[Lokteks op bladsy 8]
Handhaaf ’n balans tussen werk en geestelikheid: Prediker 12:13; 1 Korintiërs 3:9
[Venster/Prent op bladsy 6]
BIED WERKVERWANTE SPANNING DIE HOOF
Mediese deskundiges het werkverwante spanning as ’n beroepsrisiko geklassifiseer. Dit kan maagsere en depressie veroorsaak en selfs tot selfmoord lei. Die Japannese het ’n woord daarvoor—karosji, “sterfte weens oorwerktheid”.
Verskeie werkverwante faktore kan tot spanning bydra. Dit sluit in ’n verandering in werksure of -toestande, probleme met toesig, ’n verandering in verantwoordelikhede of die aard van die werk, aftrede en afdanking. Sommige probeer hierdie spanning ontvlug deur van werk of omgewing te verander. Ander probeer hierdie spanning onderdruk en vind dan dat dit oorloop na ander lewensterreine, meestal die gesin. Party mense ly selfs emosioneel daaronder en word depressief en wanhopig.
Christene is goed toegerus om werkverwante spanning die hoof te bied. Die Bybel voorsien baie grondbeginsels wat ons deur moeilike tye kan help en ’n positiewe uitwerking op ons geestelike en emosionele welsyn kan hê. Jesus het byvoorbeeld gesê: “Moet julle . . . nooit kwel oor die volgende dag nie, want die volgende dag sal sy eie sorge hê. Elke dag het genoeg van sy eie kwaad.” Hier word ons aangemoedig om ons op vandag se probleme toe te spits, nie môre s’n nie. Dit sal verhoed dat ons ons probleme uit verband ruk, wat net meer spanning veroorsaak.—Matteus 6:25-34.
Dit is noodsaaklik dat Christene op God se krag staatmaak, nie hulle eie nie. Wanneer ons voel dat ons breekpunt bereik, kan God ons harte met vrede en vreugde vervul en ons die wysheid gee om enige ontbering die hoof te bied. “Hou aan om krag te verkry in die Here en in die mag van sy sterkte”, het die apostel Paulus geskryf.—Efesiërs 6:10; Filippense 4:7.
Laastens kan selfs spanningsvolle omstandighede positiewe resultate oplewer. Beproewinge kan maak dat ons ons tot Jehovah wend deur hom te soek en op hom te vertrou. Dit kan ons ook aanspoor om voort te gaan om ’n Christelike persoonlikheid aan te kweek, sowel as die vermoë om onder druk te volhard. Paulus vermaan ons: “Laat ons ons verheug terwyl ons in verdrukkinge is, aangesien ons weet dat verdrukking volharding voortbring; volharding weer ’n goedgekeurde toestand; die goedgekeurde toestand weer hoop.”—Romeine 5:3, 4.
Selfs spanning kan dus eerder tot geestelike groei aanleiding gee as tot wanhoop en droefheid.
[Venster/Prent op bladsy 7]
DIE TOEPASSING VAN BYBELBEGINSELS BY DIE WERK
’n Christen se gesindheid en optrede by die werk kan die Bybelboodskap vir medewerkers en ander aantreklik maak. Volgens die apostel Paulus se vermaning in sy brief aan Titus moet diegene wat in ’n soortgelyke situasie as werknemers is, “in alles aan hulle [toesighouers] onderdanig wees en vir hulle welbehaaglik wees en nie teëpraat nie, nie diefstal pleeg nie, maar goeie trou ten volle aan die dag lê, sodat hulle die leer van ons Redder, God, in alles kan versier”.—Titus 2:9, 10.
Kyk byvoorbeeld na wat ’n sakeman aan die wêreldhoofkwartier van Jehovah se Getuies geskryf het: “Ek skryf om toestemming te vra om Jehovah se Getuies in diens te neem. Ek wil hulle in diens neem omdat ek met sekerheid weet dat hulle eerlik, opreg en betroubaar is en my nie sal kul nie. Die enigste mense wat ek werklik vertrou, is Jehovah se Getuies. Help my asseblief.”
Kyle is ’n Christen wat by ’n privaat skool as ’n ontvangsdame werk. As gevolg van ’n misverstand het ’n medewerker haar voor ’n paar leerlinge gevloek. “Ek moes oppas dat ek nie Jehovah se naam oneer aandoen nie”, vertel Kyle. Gedurende die volgende vyf dae het Kyle gedink oor hoe sy Bybelbeginsels kon toepas. Een vind ons in Romeine 12:18: “Wees, indien moontlik, sover dit van julle afhang, vreedsaam teenoor alle mense.” Sy het vir haar medewerker ’n e-pos gestuur en om verskoning gevra vir die spanning tussen hulle. Kyle het haar medewerker genooi om ná werk te bly sodat hulle kan gesels en die misverstand uit die weg kan ruim. Nadat hulle dit gedoen het, het Kyle se medewerker afgekoel en erken dat Kyle se benadering verstandig was. Sy het vir Kyle gesê: “Dit moet iets met jou godsdiens te doen hê”, en sy het haar ’n vriendelike drukkie gegee toe hulle totsiens sê. Tot watter slotsom het Kyle gekom? “Ons sal nooit ’n fout maak as ons Bybelbeginsels toepas nie.”
[Prent op bladsy 4, 5]
Baie werkers voel asof hulle maar net ratjies in ’n onpersoonlike masjien is
[Erkenning]
Japan Information Center, Consulate General of Japan in NY
[Foto-erkenning op bladsy 8]
Aardbol: NASA photo