Die rooi bekoorder met ’n vrolike lied

Is jy al ooit deur ’n rooi bekoorder met ’n vrolike lied wakker gemaak? As jy in Noord-Amerika woon, word jy moontlik op so ’n heerlike manier uit jou slaap gewek omdat een van die gewildste sangvoëls—die kardinaal—in daardie deel van die wêreld nesmaak. Die mannetjie baken sy gebied met ’n helder fluit af. En wat ’n onvermoeibare en begaafde sanger is hy tog nie! “Na berig word, het een mannetjie al 28 liedjies gesing wat uit verskillende sillabiese kombinasies saamgestel is”, sê The International Wildlife Encyclopedia.

Hierdie pragtige voël is ongeveer twintig sentimeter lank, uitgevat in helderrooi vere met ’n kenmerkende swart “borslap” om sy snawel. Die wyfie dra egter ’n dowwe bruin verejas. Sy behoort tot een van die betreklik min spesies waarvan die wyfies kan sing.

Ongeag waar jy woon, wanneer jy weer die melodieuse wysie van ’n sangvoël hoor, moet jy jou hemelse Skepper dank vir sy buitengewone wysheid en vermoë. Sangvoëls is een van sy gawes van kleur en vrolikheid.—Psalm 148:7-10.