Van ons lesers
Ouers se regte As ’n dokter wil ek graag my mening uitspreek oor die artikel “Dokters het probeer om ons dogter weg te vat” (22 Oktober 1989). Al wat hierdie artikel sal doen, is om wedersydse misverstand te vererger en konfrontasie te veroorsaak.
In sommige gevalle is bloed die enigste logiese en gepaste terapie, en ’n dokter [in Frankryk] is moreel en wetlik verplig om dit toe te dien. Getuies moet gevolglik nie ontsteld wees as ’n dokter (1) ’n hofbevel vir bloedbehandeling kry of (2) besluit om die pasiënt glad nie te behandel nie. Dokters vra dat Jehovah se Getuies die gevolge van hulle keuse moet aanvaar; dat hulle hulself nie martelaars moet maak nie, maar hulle standpunt baie duidelik stel. Byvoorbeeld: “Ek weier bloed omdat ek God se wet wil gehoorsaam (nie omdat ek bang is vir Vigs of hepatitis nie).” Dokters vra dat hulle konsekwent en op ’n verantwoordelike wyse moet optree, en nie moet probeer moraliseer nie.
J. L. P., M.D., Frankryk
Jehovah se Getuies waardeer die harde werk en toegewydheid van dokters. Ons doen ons bes om met hulle saam te werk en vra net dat hulle ons vasbeslotenheid op grond van die Bybel om ons van ‘bloed te onthou’ respekteer (Handelinge 15:29). Jehovah se Getuies is bereid om die gevolge van hierdie godsdiensstandpunt te dra. Daar is egter genoegsame bewys dat bloedoortappings talle dodelike risiko’s insluit, en daar is alternatiewe vorme van mediese behandeling wat ’n mens nie aan daardie risiko’s blootstel nie. Indien ’n dokter onwillig is om in hierdie opsig saam te werk, is hy onder verpligting om dit aan sy pasiënte duidelik te stel. In die betrokke geval het die dokter ingestem om sy pasiënt se wense te respekteer, maar het toe sy woord gebreek. Die ouers het dus gemeen dat hulle drastiese stappe moes doen. Tog het die artikel ouers nie aangemoedig om mediese sorg te weerhou nie. Dit het ouers eerder aangemoedig om “hulle dokter meer spesifiek uit te vra oor wat hy of sy onder bepaalde omstandighede sal doen”. Deur te toon dat daar dikwels effektiewe nie-bloedbehandelings is, het die artikel ook beklemtoon dat die Bybelse verbod op die inname van bloed redelik is, selfs uit ’n mediese standpunt.—RED.
Modelwerk Ek het die artikel “Jongmense vra . . . Wat van modelwerk en skoonheidswedstryde?” (8 Januarie 1990) waardeer. Dit het my werklik laat besef watter slaggate daarby betrokke is. Ek besef nou dat dit ons geestelike skoonheid is wat tel, hetsy ons fisiese skoonheid het of nie.
S. W., Engeland
Byeenkomste in Pole Baie dankie dat julle my (in my geestesoog) na die byeenkomste in Pole geneem het (22 Desember 1989). Terwyl ek die artikel gelees het, het trane van vreugde oor my wange gestroom. Soms laat die sorge van die lewe ons Jehovah se groot liefde uit die oog verloor. Hoe wonderlik is dit tog om sulke liefde onder ware Christene te sien!
K. D., Verenigde State
Weerspannige broers/susters Baie dankie vir die artikel “Jongmense vra . . . Hoe kon hulle dit aan my doen?” (8 November 1989). Ek het ook ’n ouer broer wat Jehovah se organisasie verlaat het. Ek dink baie keer aan die hartseer en pyn wat dit my ouers sowel as vir my veroorsaak het. Julle artikel was so bemoedigend. Ek besef nou dat, hoewel my ouers moontlik in ’n mate te kort geskiet het, my broer nie op hulle opleiding gereageer het nie.
L. R., Verenigde State
Fobieë Ek hou ’n eksemplaar van die wonderlike artikel oor fobieë (8 Februarie 1987) byderhand. Ek kry al jare lank paniekaanvalle. Maar ek word altyd bemoedig en versterk wanneer ek die paragrawe oor volharding en gebed tot Jehovah weer lees.
M. B., Verenigde State