Jongmense vra . . .

Wanneer sal my ouers my toelaat om grimering te dra?

Ontwaak!: Hoe oud moet ’n meisie wees voor sy toegelaat word om grimering te dra?

Juliea: Ek sou sê 13 jaar oud.

Ontwaak!: Hoekom?

Julie: Ek weet nie.

Ontwaak!: Is twaalf dan te jonk?

Julie: Ja.

Ontwaak!: Maar 13 is oud genoeg?

Julie: Ja.

Sallie: Ek dink ’n meisie moet toegelaat word om dit te dra as sy weet hoe om haar behoorlik te grimeer, en as sy haar nie so opmaak dat sy soos ’n lid van rockgroep of so iets lyk nie.

John: Ek dink hulle moet dit net dra as hulle nie goed lyk daarsonder nie.

Gloria: Ja, grimering verbeter jou natuurlike voorkoms.

Larry: Maar hoekom sou iemand op 13 haar ‘natuurlike voorkoms’ wil ‘verbeter’? Ek bedoel, hulle het dit nog nie nodig nie! Ek dink meisies moet so om en by 18 wees voordat hulle grimering begin gebruik.

IN DIE Verenigde State bestee tieners jaarliks oor die dertienmiljard rand aan skoonheids- en grimeringsmiddels. Dit is dan heel verstaanbaar as jy meen dat jy ook die reg het om lipstiffie, ’n blosser of oogskadu te gebruik as jy wil. Maar jou ouers sien die saak miskien heeltemal anders.

“Toe ek 13 was, het ek my ma gevra of ek dit kon aansit”, vertel die 17-jarige Nina. “Sy het gesê: ‘Nina, jy het dit nie nou nodig nie.’” Jong Shelly het ’n soortgelyke reaksie van haar ouers gekry. “Ek het toestemming gevra toe ek ongeveer 13 was, en hulle antwoord was dat ek dit nie mag dra voor ek 15 is nie. Ek het gesê: ‘Hoekom nie?’”

Grimering—waarom dit belangrik is vir meisies

Daar bestaan selfs onder tienderjariges uiteenlopende opinies oor hierdie onderwerp, soos die inleidende dialoog toon. Dit is dan geen wonder as jy en jou ouers nie oor die saak kan saamstem nie! Maar as jy ’n volstrekte nee van jou ouers kry, kan dit onredelik streng lyk. “Jy kyk na die meisies by die skool”, vertel ’n jong vrou met die naam Monica, “en hulle almal dra dit.” Jy wonder miskien ook hoekom jou ma dit dan kan dra maar jy nie! Boonop word jy ouer, en jou voorkoms is vir jou belangriker as ooit tevore.

Puberteit het veranderinge in jou lengte, gewig, en figuur veroorsaak. Soos die boek The Secret of a Good Life With Your Teenager opmerk: “Hierdie veranderinge maak dat [jeugdiges] hulle meer as ooit tevore oor hulle aantreklikheid bekommer . . . Hulle is ook begaan daaroor dat hulle seksuele identiteit bevestig moet word. Hulle wil vroulik of manlik bevind word.” Of soos een skrywer dit stel: Jy wil “aan ’n eie styl begin bou . . . [wat] uitdrukking gee aan die jy waarvan jy die meeste hou en waarmee jy op jou grootste gemak voel”.—Changing Bodies, Changing Lives, deur Ruth Bell.

Vir baie meisies is grimering een manier om daardie eie styl te skep en om vrouliker of aantrekliker te voel. “Wanneer ek grimering aan het, het ek meer selfvertroue”, verduidelik een tienermeisie. Nina, wat vroeër aangehaal is, voeg by: “Daar is hope mooi meisies, en ek voel beter as ek grimering aanhet.”

Vir ’n meisie is dit ook ’n soort deurgangsrite na volwassenheid as sy grimering dra. Soos een tiener dit gestel het: “Jy wil nie meer as ’n kind beskou word nie.” Sommige hoop dat ’n meer volwasse voorkoms vir hulle groter aansien sal verwerf—of selfs ouer seuns se aandag sal trek. Ander dra weer grimering net om by hulle portuurs te pas. Diane sê: “Hoe ouer jy lyk, hoe meer respek het die ander jonges vir jou.”

Maar baie tienermeisies wil om bloot praktiese redes grimering dra: om onegalige velskakering, ’n lelike gelaatskleur of ’n litteken te verbloem, om aantreklike gelaatstrekke te beklemtoon of om die aandag weg te trek van gelaatstrekke wat nie so aantreklik is nie. Selfs dan kan dit baie maklik ’n familietwis laat ontvlam as ’n tiener toestemming vra om grimering te dra. Waarom reageer ouers dikwels so negatief?

Waarom hulle moontlik nee sal sê

Ouers vind dit weliswaar soms moeilik om hulle te vereenselwig met die feit dat hulle kinders groot word. Van hulle kan dus geneig wees om die leisels ’n bietjie te styf vas te hou. Die meeste ouers wil nietemin maar net die beste vir hulle kinders hê. Dit is waarom die Bybel vermaan: “Kinders, neem die opvoeding wat ’n vader julle gee, ter harte; slaan daarop ag, sodat julle kan leer wat insig is” (Spreuke 4:1, NAV). Jou ouers vind dit miskien moeilik om hulle gevoelens in woorde uit te druk. (“My ouers wou my nie toelaat om maskara te dra nie”, vertel een tienermeisie, “maar hulle het nie vir my gesê hoekom nie.”) Tien teen een het hulle goeie redes vir hulle bedenkinge oor die saak.

Jy beskou dit miskien as ’n soort reg om grimering te dra, iets wat jou outomaties toekom wanneer jy die een of ander “wonderouderdom”, soos 13, bereik. Maar soos rubriekskrywer Elizabeth Winship aantoon: “Daar bestaan geen reël wat die presiese ouderdom bepaal waarop grimering geoorloof is nie. Dit hang van die tradisies van die gesin en gemeenskap af.” Miskien dink jou ouers dat die mense in die gemeenskap of julle mede-Christene jou skeef sal aankyk as jy op jou ouderdom grimering gebruik. Indien jou ouers Jehovah se Getuies is, sal hulle veral hieroor besorg wees, want hulle wil nie hê dat jou persoonsversorging aan jou Christelike bediening afbreuk moet doen nie.—2 Korinthiërs 6:3.

Jou ouers kan ook meen dat dit op hierdie tydstip in jou lewe eenvoudig onnodig en onvanpas vir jou is om grimering te dra. Jeugdigheid het, per slot van rekening, sy eie sieraad, ’n skoonheid wat baie kortstondig is (Psalm 90:10; Spreuke 20:29). Hulle redeneer dalk: ‘Waarom moet sy iets doen wat haar jeugdige voorkoms sal verbloem of verander?’

Jou ouers weet miskien ook uit persoonlike ondervinding hoe misleidend “die begeerlikhede van die jonkheid” kan wees (2 Timotheüs 2:22). Hulle vrees dalk selfs dat jy ook van die foute sal begaan wat hulle in hulle jong dae begaan het, en hulle wil jou beskerm. Een tienermeisie vertel: “Mams het grimering begin dra toe sy nog baie jonk was. Sy het baie wild geword en altyd minirokke en swaar grimering gedra. Sy wou nie hê ek moet so wees nie.”

Dit wil nie sê dat jy ’n slegte meisie sal word net omdat jy ’n bietjie lipstiffie aansmeer nie. Maar hulle kan tereg vrees dat jy, omdat jy grimering gebruik, aan druk blootgestel sal word waarvoor jy nie gereed is nie. Skrywer Ruth Bell haal ’n vader van twee tienermeisies soos volg aan: “Dit is opwindend om te sien hoe kinders volwassenes word. . . . Maar wanneer ek na hulle kyk en my ou dogtertjies sien, wanneer ek vir myself sê: ‘Dis my kinders daardie en hulle word groot en hulle sal met die wêreld daarbuite te doen kry sonder dat ek daar is om hulle te beskerm’, dis wanneer ek emosioneel raak. . . . Hierdie wêreld is wild en hulle kan seerkry.”

Dit is een ding om soos ’n volwassene te lyk. Maar om soos ’n volwassene op te tree en die druk van volwassenes te hanteer kan ’n heeltemal ander ding wees. Is jy regtig gereed daarvoor om die aandag te hanteer van ouer tienerseuns—of selfs ouer mans—wat geprikkel kan word as jou grimering jou ouer laat lyk as wat jy werklik is?—Vergelyk Genesis 34:1, 2.

Maak die beste van die saak

Maar jy dink dalk dat jy tog gereed is om grimering te gebruik, en miskien is jy. Wat moet jy doen? Een tienermeisie het gebieg: “Ek het dit eenvoudig begin dra. Ek het ’n klein bietjie oogskadu aangesit, en Mams het gedink dit lyk goed.” Maar dit is ’n waagstuk om grimering sonder toestemming te begin dra! Spreuke 13:10 waarsku: “Vermetelheid gee net getwis af.” Soos een meisie erken het: “Ek het geweet my ouers sal kwaad word as ek sommer ewe skielik uitkom met grimering aan.” Wat kan jy dan doen? Daardie Bybelvers vervolg: “Maar by die wat hulle laat raai [of, “saam beraadslaag”, NW], is wysheid.”

Ja, kies ’n “regte tyd” om die aangeleentheid met jou ouers te bespreek (Spreuke 25:11, NAV). Verduidelik op ’n kalm manier hoe jy hierdie saak sien. Verduidelik waarom dit vir jou belangrik is, en sê kortliks wat jy eintlik in gedagte het. Verseker hulle dat jy nie soos ’n opgesmukte modepop wil lyk nie, en dat jy hulle opinie en oordeel waardeer. Miskien sal hulle van gedagte verander of jou ten minste tegemoetkom.

Aan die ander kant kan hulle tereg besluit dat jy eenvoudig nog nie gereed is vir grimering nie. Maar dit is nog nie die einde van die wêreld nie. Doen onder die omstandighede wat jy kan om die beste van jou voorkoms te maak. Behoorlike velversorging kan byvoorbeeld baie velprobleme uitskakel. “As jou vel vol puisies is, lei die aandag daarvan weg deur . . . iets aan te trek wat jou pragtig laat lyk—enigiets om die aandag af te wend van dít wat negatief is.” Dit is die raad van skoonheidskundige Jane Parks-McKay. ’n Goeie postuur, goed versorgde naels, skoon, blink hare—dit alles kan help om jou op jou beste te laat lyk met of sonder grimering!

Maar sê nou jou ouers gee jou toestemming om grimering te begin gebruik? Wat dan? ’n Toekomstige artikel sal die behoorlike gebruik daarvan bespreek.

[Voetnoot]

[Prent op bladsy 23]

“Sy dra grimering. Wanneer kan ek?”