Van ons lesers

Rosekrans Ek skryf na aanleiding van julle artikel oor die rosekrans (“Die Bybelse beskouing”, 8 Junie 1990). Op grond van die eensydige beskouing van twee “voormalige nonne” maak julle die gevolgtrekking dat God nie wil hê dat ons Hom deur sy Moeder, Maria, moet nader nie. Die Katolieke leerstelling dat Maria ’n tussenganger vir Christus is, bestaan reeds lank en is goed gevestig. Iemand wat hierdie feit in twyfel trek sonder om al die beskikbare inligting te ondersoek, begaan ’n ernstige fout. Kry die feite!

M. E. M., Verenigde State

Ons kan goed begryp waarom party Katolieke lesers moontlik so kan voel. Ons artikel is nietemin deeglik nagevors en het erkende bronne geraadpleeg, met inbegrip van die “New Catholic Encyclopedia”. En hoewel die opmerkings van die voormalige nonne wat aangehaal is, insiggewend is, het die artikel sy gevolgtrekkings op die getuienis van die Bybel self gegrond. Eeue van kerktradisie verander nie die feit dat die Bybel eenvoudig nie die rol van “tussenganger” aan Maria toeskryf nie. Inteendeel, Jesus self het gesê: “Niemand kan na die Vader kom behalwe deur my nie” (Johannes 14:6, Katolieke “Jerusalem Bible”).—RED.

Teleskoop ’n Artikel getiteld “Buitengewone teleskoop onthul die son se geheime” het in die nommer van 8 Maart 1990 verskyn. Ek het dit vir my wetenskaponderwyser gewys en hy was ingenome daarmee. Twee dae later het die onderwyser fotokopieë van die artikel aan almal in die klas uitgedeel, en ons het die hele artikel behandel. Hy is van plan om die artikel in al sy wetenskapklasse te gebruik.

A. V. A., Verenigde State

Grimering Op skool dra byna al die meisies in my klas grimering, hoewel party van hulle maar net 13 jaar oud is. Ek wou ook probeer om dit te gebruik, maar my ouers het nie van die idee gehou nie. Nadat ek julle artikel gelees het (22 Mei 1990), besef ek nou dat ’n mens mooi kan lyk sonder grimering. Ek dink dis puik dat julle artikels publiseer wat spesiaal met jongmense in gedagte geskryf is.

D. C., Duitsland

Dankie vir julle artikel oor die behoorlike gebruik van grimering (22 Junie 1990). Ek word nie toegelaat om grimering te gebruik nie omdat ek maar 11 is. Maar ek het uit julle artikel geleer dat ek, wanneer ek oud genoeg is om grimering te gebruik, dit spaarsaam sal gebruik; wanneer ek ouer word en meer grimering nodig het, sal ek meer gebruik.

S. D., Verenigde State

Menseheerskappy Julle reeks “Menseheerskappy in die weegskaal” verwar my. Wat is die nut daarvan om verskillende vorme van menslike regering te ontleed en te beoordeel wanneer alle regeringsvorme onder Satan se volgehoue inmenging gebuk gaan? Hoe kan ’n mens besluit waar Satan se marionette-toutjies eindig en waar die mens se onbevoegdheid begin?

A. P., Verenigde State

ataniese inmenging het ongetwyfeld bygedra tot die mens se onvermoë om homself te regeer. Menseheerskappy onafhanklik van God sou nietemin selfs sonder Satan se bemoeiing misluk het. Jeremia 10:23 sê dat dit “nie aan ’n man [toebehoort] om te loop en sy voetstappe te rig nie”. Ons reeks is daarop gemik om die waarheid van hierdie woorde uit te beeld.—RED.

Crack-verslawing Dankie vir julle lewensgetroue artikels oor crack (22 Julie 1990). Ek het elke bekende dwelm verkoop behalwe heroïen, en ek was 11 jaar lank ’n dwelmgebruiker. My vrou was ’n gebruiker sowel as ’n dwelmhandelaar. Terwyl sy 27 maande gevangenisstraf uitgedien het, het sy die Bybel saam met Jehovah se Getuies begin studeer en is sy gedoop. Deur die Bybel te bestudeer, en met Jehovah se hulp, het ek ook die gebruik van dwelms heeltemal gestaak.

C. V., Colombia

Om die gebruik van verslawende dwelms te staak is moeilik, en sommige mense moes professionele hulp kry om dit te kon doen. Wanneer ’n mens egter die waarhede van die Bybel leer, kan dit ’n kragtige hulp wees om jouself van verslawing te bevry.—RED.