Jongmense vra . . .

Hoe kan ek grimering reg gebruik?

“WIL jy nie ’n bietjie grimering aansit nie?” Nina was verbaas toe haar moeder haar dit vra. Twee jaar tevore het sy haar toestemming geweier om grimering te dra. Maar met hierdie spesiale geleentheid, ’n bruilof wat hulle sou bywoon, het haar ma besluit dat die tyd aangebreek het vir Nina om die vroulike kunsie van grimering te leer. “Ek was ’n bietjie senuagtig”, vertel Nina. “Ek het nie geweet hoe om dit reg te gebruik nie. Mams het toe vir my ’n bietjie lipstiffie en blosser aangesit.”

Miskien dink jou ouers ook dat dit gepas sal wees vir jou om grimering te dra.a As grimering reg—en matig—gebruik word, kan dit jou voorkoms verbeter. Maar as dit verkeerd gebruik word, het dit net mooi die teenoorgestelde effek. “Party meisies gebruik grimering en dit lyk mooi”, sê een tienerseun. “Maar sommige meisies plak die goed dik aan, en dit laat hulle verskriklik lyk.”

“As hulle ’n kleur dra wat te helder is, en dis rêrig, rêrig skel”, voeg ’n tienermeisie by, “laat dit hulle net soos hansworse lyk!” Hoe kan jy grimering so gebruik dat dit jou voorkoms sal verbeter—nie afbreuk daaraan sal doen nie?

Riglyne uit God se Woord

Grimeermiddels is nie iets nuuts nie. Opgrawers het onder Israelitiese ruïnes komme en palette gevind wat ’n verbasend moderne doel gedien het. Hulle “is gebruik om kleure te meng vir die gesig” van Israelitiese vroue. Volgens The Biblical Archaeologist, Februarie 1955, “was die gebruik van . . . skoonheidsmiddels” selfs in Bybelse tye “baie algemeen”.—Esegiël 23:40.

Vandag bestee die skoonheidsbedryf net in die Verenigde State van Amerika jaarliks sowat vyfduisendmiljoen rand aan reklame. Hulle gebruik beeldskone modelle om reklame te maak vir die nuutste “voorkoms”, wat wissel van die “natuurlike” tot die bisarre. Hulle beweer dat jy ook so kan lyk deur net ’n reeks skoonheidsmiddels te koop. Maar min meisies slaag daarin om soos skoonheidsmodelle te lyk. En selfs wanneer hulle daarin slaag, kan die nuwe “voorkoms” uit die mode raak nog voordat die eerste buisie lipstiffie opgebruik is.

Die Bybel help jou om nie deur die modewinde meegesleur te word nie. Ons lees: “Word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is” (Romeine 12:2). Sommige Christinne in Bybelse tye was miskien ook geneig om die swierige klere en uitspattige haarkapsels te dra wat destyds gewild was. Maar die apostel Paulus se raad was: “So ook moet die vroue hulle versier met behoorlike kleding, gepaard met beskeidenheid en ingetoënheid, nie met vlegsels of goud of pêrels of kosbare klere nie.”—1 Timotheüs 2:9.

Paulus se raad beteken nie dat jy nie aantreklik mag lyk nie. Dit beteken net dat jou voorkoms ‘behoorlik’, of gepas, moet wees, nie opsigtig nie; beskeie en oordeelkundig, nie bisar of volgens ’n modegier nie. Die Griekse woord vir “beskeidenheid” bevat die gedagte om ‘eerbied vir die opinie van ander’ te hê, en jy moet veral die opinie van jou ouers respekteer. Kom ons kyk hoe dit op die dra van grimering van toepassing kan wees.

Voor jy begin grimeer

Grimering is veronderstel om jou uiterlike te verfraai, nie om ’n masker of ’n mombakkies te wees nie. Daarom het dit sin om in die eerste plek na jou natuurlike voorkoms en algemene gesondheid om te sien. As jy ’n gebalanseerde dieet volg en genoeg rus en gereelde oefening kry, kan dit dus baie meer doen om jou aantreklikheid te verhoog as enige grimering.

Skoonheidskundige Jane Parks-McKay raai jong meisies ook aan “om met die basiese stappe te begin—naamlik, gereelde en behoorlike velsorg. . . . Baie mense is geneig om hulle vel te verwaarloos . . . [en dan] hulle onaantreklik met grimering te bedek in die hoop dat dit hulle mooi sal maak.”

Grimering werk die beste op ’n goed versorgde vel. Die boek A Lifetime of Beauty verduidelik: “Die reiniging van die vel kan vergelyk word met die voorbereiding van ’n muur vir ’n nuwe laag verf: al is die kleur hoe mooi, die verfwerk sal slordig lyk as daar bo-oor stof en growwe plekke geverf word. ’n Vel wat nie behoorlik gereinig is nie, sal dof en skilferig lyk.”

’n Grimeerder het Ontwaak! meegedeel: “In die oggend kan ’n meisie haar gesig met ’n goeie gesigreiniger skoonmaak. Daarna kan sy ’n verfrisser en ’n goeie vogmiddel gebruik.”

Ontleed jou behoeftes

Bestudeer nou jou gesig en ontleed jou bates en laste. Is jy bedeeld met gevoelvolle oë, ’n redelik mooi vel, of ’n egalige gesonde kleur? Dan sal jy waarskynlik min of geen grimering nodig hê nie. Miskien is jou vel egter baie vetterig—iets wat algemeen is gedurende die tienderjare—en tot aknee geneig. Of jy kan ’n gelaatstrek (soos jou wangbene) hê wat jy graag wil beklemtoon. ’n Oordeelkundige gebruik van grimering kan dalk help.

In Bybelse tye het sommige vroue swart verf gebruik om die indruk van ‘groter oë’ te skep (Jeremia 4:30). Vandag word oogskadu, asook potlood- en vloeibare oogomlyners vir ’n soortgelyke effek gebruik. Onderlaagrome en vloeirome kan velvlekke verbloem. ’n Blosser kan jou wangbene beklemtoon.

Maar sê nou jy het raad nodig oor hoe om jou grimering te kies of aan te wend? Daar is boeke in openbare biblioteke beskikbaar wat jou kan help. Maar jy wil miskien ook jou moeder of ’n ouer vriendin raadpleeg. ’n Tienermeisie met die naam Tina vertel: “Mams het my winkel toe geneem en ’n verkoopdame by die kosmetiekafdeling gevra om vas te stel watter kleure ek moet gebruik.” Skoonheidskundiges in goeie winkels kan ’n mens raad gee oor watter kleure die beste by jou velskakering pas en oor die beste manier om grimering aan te wend. Maar aangesien dit hulle werk is om produkte aan jou te verkoop, moet jy versigtig wees dat jy nie produkte koop wat jy nie werklik nodig het nie. En vanweë die unieke eise van jou Christelike lewenswyse, wil jy seker maak dat jy nie kleure koop wat miskien mooi saam met formele aanddrag sal gaan maar wat onvanpas vir die skool of Christelike bedrywighede sal wees nie.

Grimeerwenke

Grimeerstyle verskil van land tot land. Maar ’n paar algemene beginsels kan genoem word:

Hou jou veltipe in gedagte. Aangesien die meeste tienderjariges ’n vetterige vel het, sal jy bes moontlik by grimeermiddels wil bly wat water, en nie olie nie, as basis het. Hulle stryk ligter aan en sal jou gevolglik ’n natuurliker voorkoms gee. Baie meen ook dat vetterige grimering aknee vererger.

Lees etikette. Vergelyk die bestanddele van die goedkoop soorte met dié van duur handelsname. Miskien lê die enigste werklike verskil in die prys en verpakking. As jy allergiese reaksies met sekere grimeerbestanddele ondervind, is dit veral noodsaaklik dat jy die etikette lees.

Gebruik helder beligting. As daar nie genoeg lig is nie, kan jy te veel grimering aanwend. Probeer om jou naby ’n venster te grimeer sodat jy kan sien hoe dit in natuurlike lig lyk, want grimering wat by fluoorbeligting aangewend is, kan in sonlig skel lyk.

Gebruik grimering spaarsaam. Te veel van selfs ’n goeie ding kan skadelik wees. (Vergelyk Spreuke 24:13; 25:27.) As jou gesig as ’t ware “grimeersel!” skreeu, dan het jy te veel aan of dra jy kleure wat te skerp is. Oordadige grimering laat jou goedkoop lyk en kan selfs die verkeerde indruk oor jou sedelike beginsels skep. (Vergelyk Esegiël 23:36-42.) Bly dus by skakerings wat sag en nie te helder is nie. Bemeester die grimeertegniek sodat die blos nie soos ’n verfstreep oor jou gesig lê of jou oogskadu jou soos ’n wasbeer laat lyk nie.

Maak jou gesig deeglik skoon. Die boek A Lifetime of Beauty sê: “Moet nooit saans gaan slaap sonder om elke greintjie grimering te verwyder nie . . . As jy ’n gewoonte daarvan maak om met ’n laag stof, grimeringoorblyfsels en dooie vel aan jou gesig te gaan slaap, sal dit jou vel dof en grys laat.” Een huidspesialis beweer selfs dat “jy jou aan infeksie en irritasie blootstel as jy nie elke aand voor jy gaan slaap alle grimering verwyder nie”. Gebruik ’n kosmetiekoplosmiddel, soos ’n koelroom, om jou gesig skoon te maak.

“Die skoonheid is nietigheid”, sê Spreuke 31:30, en selfs grimering wat kunstig aangewend is, kan nie ’n negatiewe gesindheid of ’n oppervlakkige gees verberg nie. Die Bybel vermaan ons: “Julle skoonheid moenie bestaan in uiterlike dinge . . . nie. Nee, julle skoonheid moet dié van die innerlike mens wees: blywende beskeidenheid en kalmte van gees. Dit het by God groot waarde.”—1 Petrus 3:3, 4, NAV.

[Voetnoot]

[Venster op bladsy 20]

Gevare in skoonheidsmiddels

Verbruikerskampvegter Elaine Brumberg berig: “Baie chemikalieë en kosmetiekbestanddele kan deur die vel dring en in die liggaam opgeneem word.” Van die bestanddele wat algemeen gebruik word, is vermoedelik kankerverwekkende stowwe.

Dit is bekend dat ander bestanddele (gewoonlik reuk- en preserveermiddels) allergiese reaksies kan veroorsaak wat wissel van ’n gejeuk tot ’n genies. Sommige vervaardigers beweer weliswaar dat hulle produkte hipoallergenies of “vir allergieë getoets” is. Maar hoe jy op ’n produk sal reageer, kan alleenlik bepaal word deur ervaring en deur die etikette goed te bestudeer.

Nog ’n algemene gevaar is bakteriologiese besmetting. Maskara kan die teelaarde vir mikroörganismes word wat deur die maskarastafie van die ooglid of vingers af daarnatoe oorgedra word. Dit kan ooginfeksies veroorsaak as die maskarastafie die oog krap. Besmetting is veral ’n probleem in winkelmonsters waarin tientalle mense hulle vingers gedruk het. Van die deskundiges beveel dus aan dat jy nie winkelmonsters op jou gesig moet toets nie.

[Prent op bladsy 18]

Jou moeder kan jou dalk die kuns van grimering leer