Alle lyding sal binnekort eindig!

Jy het waarskynlik al op die een of ander tydstip in jou lewe gevra: ‘Waarom al die lyding?’ Die mensegesin gaan al duisende jare lank gebuk onder verskriklike lyding weens oorloë, armoede, rampe, misdaad, ongeregtigheid, siekte en die dood. In die afgelope honderd jaar was daar meer lyding as ooit tevore. Sal dit ooit eindig?

Die vertroostende antwoord is ja, en binnekort ook! God se Woord, die Bybel, sê: “Die goddelose sal daar nie meer wees nie . . . Maar die sagmoediges sal die aarde besit, en hulle sal hulle inderdaad verlustig in die oorvloed van vrede.” Hoe lank sal dit duur? “Die regverdiges sal die aarde besit, en hulle sal vir ewig daarop woon.”—Psalm 37:10, 11, 29.

Nadat God goddeloosheid en lyding uit die weg geruim het, sal die aarde in ’n paradys omskep word. Dan sal mense vir ewig in volmaakte gesondheid en geluk kan lewe. God se Woord voorspel: “[God] sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie.”—Openbaring 21:4.

In daardie nuwe wêreld sal selfs die dooies tot lewe opgewek word om ook daardie seëninge te geniet: “Daar [sal] ’n opstanding van die regverdiges sowel as die onregverdiges . . . wees” (Handelinge 24:15). Om dié rede kon Jesus Christus vir ’n berouvolle kwaaddoener wat geloof in hom gestel het, sê: “Jy sal saam met my in die Paradys wees.”—Lukas 23:43.

Waarom het lyding ontstaan?

Waarom het God toegelaat dat lyding ontstaan as dit sy voorneme was dat mense so ’n wonderlike toekoms moet geniet? Waarom het hy toegelaat dat dit so lank voortduur?

Toe God Adam en Eva geskep het, het Hy hulle ’n volmaakte liggaam en verstand gegee. Hy het hulle in ’n paradystuin geplaas en hulle bevredigende werk gegee om te doen. Die Bybel sê: “God [het] alles gesien wat hy gemaak het, en kyk! dit was baie goed” (Genesis 1:31). As hulle gehoorsaam aan God was, sou hulle volmaakte kinders voortgebring het, en die hele aarde sou ’n paradys geword het, waar mense vir ewig in vrede en geluk sou lewe.

God het aan Adam en Eva die wonderlike gawe van wilsvryheid gegee as deel van die menslike samestelling. Hulle moes nie robotte wees wat nie vir hulleself kon dink nie. Maar hulle voortgesette geluk het daarvan afgehang dat hulle hulle wilsvryheid reg gebruik—deur God se wette te gehoorsaam. Soos God sê: “Ek, Jehovah, is jou God, die Een wat jou leer om jouself te bevoordeel, die Een wat jou laat loop op die weg wat jy moet bewandel” (Jesaja 48:17). Die misbruik van wilsvryheid sou rampspoedige gevolge hê, aangesien mense nie geskep is om suksesvol te wees as hulle onafhanklik van God is nie. Die Bybel sê: “Aan die mens [behoort] sy weg . . . nie. Dit behoort nie aan die mens wat loop om sy voetstappe te rig nie.”—Jeremia 10:23.

Ongelukkig het ons eerste ouers gedink dat hulle onafhanklik van God kon wees en nog steeds suksesvol kon wees. Maar toe hulle God se heerskappy verwerp, het hy nie langer hulle volmaakte lewe onderhou nie. Hulle het dus begin agteruitgaan totdat hulle uiteindelik oud geword en gesterf het. Ooreenkomstig die wette van genetika het ons daardie onvolmaaktheid en die dood geërf.—Romeine 5:12.

Die vernaamste geskil—soewereiniteit

Waarom het God Adam en Eva nie vernietig en weer begin met ’n ander mensepaar nie? Omdat God se universele soewereiniteit, dit wil sê sy reg om te regeer, betwis is. Die vraag was: Wie het die reg om te regeer, en wie se manier van regeer is reg? By uitbreiding: Kon mense beter vaar as hulle nie deur God regeer word nie? Deur hulle genoeg tyd toe te laat om met algehele vryheid te eksperimenteer, sou God eens en vir altyd bewys of hulle beter sou vaar onder sý heerskappy of hulle eie. Die tyd wat toegelaat is, moes lank genoeg wees vir mense om allerhande politieke, maatskaplike, ekonomiese en godsdiensstelsels op die proef te stel sonder God se leiding.

Wat was die gevolg? Duisende jare van mensegeskiedenis sê vir ons dat daar net al hoe meer lyding was. In die afgelope eeu het die mensegesin die ergste lyding tot nog toe ervaar. Miljoene is gedurende die Slagting vermoor. Meer as 100 miljoen is in oorloë doodgemaak. Misdaad en geweld vier hoogty. Dwelmmisbruik het epidemiese afmetings aangeneem. Seksueel oordraagbare siektes versprei nog steeds. Tienmiljoene mense sterf jaarliks weens honger en siektes. Die gesinslewe en sedelike waardes het oral agteruitgaan. Geen menseregering het die oplossings vir hierdie probleme nie. Nie een van hulle kon ’n einde aan veroudering, siekte en die dood maak nie.

Die mens se toestand is net soos die Bybel vir ons tyd voorspel het. God se Woord identifiseer ons tydperk as “die laaste dae” van hierdie stelsel van dinge wanneer “kritieke tye . . . wat moeilik is om deur te kom”, hier sal wees. En net soos die Bybel gesê het, het ‘goddelose mense en bedrieërs voortgegaan van kwaad tot erger’.—2 Timoteus 3:1-5, 13.

Die einde van lyding is op hande

Al die getuienis toon dat ons die einde nader van die mens se tragiese eksperiment met onafhanklikheid van God. Dit is duidelik dat menseheerskappy sonder God nooit suksesvol kan wees nie. Slegs God se heerskappy kan vrede, geluk, volmaakte gesondheid en die ewige lewe bring. Jehovah gaan goddeloosheid en lyding dus nie veel langer duld nie. God sal binnekort in menseaangeleenthede ingryp deur hierdie hele onbevredigende stelsel van dinge te vernietig.

Bybelprofesie sê: “In die dae van dié konings [menseregerings wat vandag heers] sal die God van die hemel ’n koninkryk [in die hemel] oprig wat nooit vernietig sal word nie. . . . Dit sal al hierdie koninkryke [huidige regerings] verbrysel en daar ’n einde aan maak, en self sal dit tot onbepaalde tye bly staan” (Daniël 2:44). Die regverdiging van Jehovah se soewereiniteit, oftewel sy reg om te regeer, deur sy hemelse Koninkryk is die grondleer van die Bybel. Jesus het ’n vername aspek van die teken van “die laaste dae” voorspel en gesê: “Hierdie goeie nuus van die koninkryk sal in die hele bewoonde aarde verkondig word as ’n getuienis vir al die nasies; en dan sal die einde kom.”—Matteus 24:14.

Wie sal behoue bly wanneer die einde kom? Die Bybel antwoord: “Die regskapenes sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word” (Spreuke 2:21, 22). Die regskapenes is dié wat leer wat Jehovah se wil is en dit doen. Jesus Christus het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3). Ja, “die wêreld gaan verby . . . , maar hy wat die wil van God doen, bly vir ewig”.—1 Johannes 2:17.

Tensy anders aangedui, kom Skrifaanhalings uit die Nuwe Wêreld-vertaling van die Heilige Skrif.