Van ons lesers
Bloedverkope Ek wil net my waardering uitspreek vir die artikels oor die verkoop en gebruik van bloed en bloedprodukte (22 Oktober 1990). Ek het nie besef dat dit so ’n reusebedryf is nie. Hoe verhoog hierdie inligting tog ons waardering vir ons Skepper, wat sy volk beskerm deur ’n verbod op die gebruik van bloed in te stel!
R. L., Verenigde State
Ouers gaan uit mekaar Die artikel “Jongmense vra . . . My ouers gaan uit mekaar—Wat moet ek doen?” (22 Augustus 1990) het ’n situasie bespreek soortgelyk aan dié waarmee ek as ouer sowat ses jaar gelede te kampe gehad het. Die deel wat sê: “As jy woede en wraaksug voed, kan dit jou persoonlikheid geleidelik vergiftig”, het my regtig diep getref. My kinders het die afgelope ses jaar sulke gevoelens bly koester. Daarom het ek aan hulle ’n eksemplaar van hierdie artikel gestuur, asook ’n brief wat verduidelik hoeveel ek vir hulle omgee. Ek is oortuig dat dit goeie vrugte sal afwerp.
E. B., Verenigde State
Wanneer kanker geheim gehou word Ek wil net vir julle sê hoe uiters bemoedigend ek die verhaal van Rie Kinosjita gevind het (22 Oktober 1990). Haar vasbeslotenheid om God te dien met al haar krag wat sy nog het, het my terdeë aangespoor. Aangesien ek baie goeie gesondheid geniet, het dit my aangemoedig om my Saterdae en aande beter te benut vir die predikingswerk. As ek te moeg voel, dink ek aan Rie—en weg is ek!
T. F., Kanada
Trane het oor my wange gerol toe ek van Rie se onwrikbare geloof gelees het. Haar opgewekte gees en volharding in die voltydse diens, ondanks haar ernstige siekte, het ’n groot indruk op my gemaak.
M. H., Japan
Geestelike vordering Baie, baie dankie vir die artikel “Jongmense vra . . . Hoe kan ek geestelike vordering maak?” (22 September 1990). Dit bevat soveel goeie wenke wat ek kan toepas. Ek het die artikel al twee keer deurgelees. Ek het ook ’n lys van my geestelike doelwitte gemaak (soos julle aan die hand gegee het), en ek gaan dit teen my muur hang.
G. K., Verenigde State
Danksy julle artikel probeer ek nou elke dag die Bybel 15 minute lank lees. Dikwels lees ek baie langer. Ek het al so baie geleer; dit is verbasend!
T. L. P., Kanada
Ophoping van vullis Ek het die artikel “Die ophoping van vullis—Sal ons daaronder begrawe word?” (22 September 1990) baie geniet. Min mense besef hoeveel afval daar daagliks gestort word en hoe gevaarlik dit vir die planeet is. Baie dankie vir julle insiggewende artikel.
B. S., Brasilië
Waarom God goddeloosheid toelaat Julle het in die verlede hierdie onderwerp al dikwels en op talle maniere bespreek. Maar die artikel in die nommer van 8 Oktober 1990 is ’n meesterstuk. Alles, van die tekenwerk tot die inleiding, is pragtig!
G. H., Verenigde State
Die artikel het my gehelp om nog meer oortuig te wees van die redes waarom goddeloosheid bestaan en van die hoop wat ek vir die toekoms koester. Dít het my verhouding met Jehovah hegter gemaak.
J. H., Verenigde State
Jaguar Ek is 14 jaar oud en ek skryf net om te sê hoeveel ek die artikel “Die skuwe oerwoudkat” (22 Augustus 1990) waardeer het. Ek het altyd daarvan gedroom om ’n jaguar te sien. Julle het my gehelp om een te sien. Julle beskrywing het die onderwerp laat lewe, en dit het gevoel of ek werklik daar is.
M. C., Frankryk