Sieke-besoeke—Hoe jy kan help
’N VRIENDIN is in die hospitaal opgeneem, en jy wil haar graag besoek. Wat moet jy sê en doen? Wat kan jy saamneem? Wat sal veral nuttig wees? En is daar dinge wat jy nie moet sê of doen nie?
Jy wil hê jou besoek moet die moeite werd wees, nie net ’n “Hallo”, ’n ongemaklike “Hoe gaan dit?” en dan ’n vinnige “Tot siens”, met miskien ’n “Word gou gesond” om dit af te rond, nie. Hoe gaan jy dus te werk?
’n Woordjie van raad om mee te begin: Lê goeie oordeel aan die dag wat die tyd van jou besoek betref. Jy kan die pasiënt of haar gesin vra wat die beste tyd sal wees, soos wanneer sy nie besig sal wees met ander besoekers of naasbestaandes nie. Dit is waarskynlik beter om die pasiënt die aand voor ’n operasie te besoek wanneer sy uit gemoedelike afleidende geselsery kan voordeel trek, pleks van onmiddellik na die operasie, wanneer sy dalk half bedwelmd of in pyn is.
Woorde aan en van die verstandiges
Kom ons dink aan die uitdrukking ‘gemoedelike geselsery’. Jy moet verwag om die inisiatief gedurende die besoek te neem, en hou die gesprek redelik opgeruimd. Die persoon in die hospitaalbed behoort haar nie daaroor te bekommer om die goeie gasvrou vir jou te wees nie. Jy kan daardie las op ’n gemaklike manier en met ’n vriendelike gesindheid op jou neem. Maar wat moet jy sê en nie sê nie?
Moenie met ’n somber of ernstige gesig kom nie, al lyk dit of die pasiënt se toestand nie goed is nie. “’n Vrolike hart bevorder die genesing”, sê die wyse skrywer van Spreuke, “maar ’n verslae gees laat die gebeente uitdroog” (Spreuke 17:22). Onthou dus dat dit jou verantwoordelikheid is om die gesprek bemoedigend en aangenaam te hou.—Spreuke 25:11; vergelyk Jesaja 41:13.
Die jongste nuus van die pasiënt se gesin of gemeente kan interessant en opbouend wees, veral as jy goeie nuus het. Moet ook nie vergeet watter uitwerking ’n bietjie humor op genesing het nie; soek na geleenthede om die pasiënt te laat glimlag of lag. In hierdie opsig is balans noodsaaklik. Jy besoek die pasiënt om opregte besorgdheid en simpatie te toon, nie om ’n grapmaker of hofnar te wees nie.
Die pasiënt het ook vertroue nodig. Wees dus versigtig om nie negatiewe dinge van die dokter of die hospitaal te sê nie. Dit is gewoonlik die beste om nie die pasiënt se toestand of probleem te vergelyk met iets wat jy dalk persoonlik gehad het of met ander wat ’n soortgelyke probleem gehad het nie, tensy die resultaat gunstig was. Elkeen is verskillend, en elke pasiënt se situasie is uniek.—Spreuke 18:13.
’n Laaste opmerking oor julle gesprek: Het jy al die uitputtende ondervinding gehad om by iemand te wees wie se woorde uitkom soos masjiengeweerkoeëls, soos die strome water wat oor die Iguaçú-valle stort? Dit het jou uitgeput, nie waar nie? Moet tog asseblief nie so wees wanneer jy jou vriendin of familielid wat in die hospitaal is, besoek nie. Terwyl julle gesprek vrolik en bemoedigend moet wees, moet jy die hoeveelheid en tempo daarvan beheers. Jy hoef nie senuagtig te voel, asof jy elke sekonde met woorde moet vul nie. ’n Rukkie van stilte saam kan haar ook opbeur. Ja, wees versigtig dat jy nie tot die pasiënt se uitputting bydra deur ’n eindelose stroom besoekers wat ’n selfs eindeloser stroom woorde aan haar opdwing nie.
Hoe lank moet jy kuier?
In sekere dele van die wêreld woon ’n gesin feitlik saam met die pasiënt in die hospitaal. Daar word dalk van hulle verwag om die persoon te bad en kos te voorsien, en gevolglik sal so ’n besoek dalk verleng moet word. Maar in die meeste hospitale is besoekure beperk sodat die pasiënt nie ooreis word nie en die hospitaalpersoneel hulle werk kan doen. In die meeste gevalle moet jou besoek dus op die meeste ’n uur duur as jy ’n familielid of ’n baie intieme vriend van die pasiënt is, en ’n halfuur as jy net ’n kennis is. Sê nou die pasiënt vra jou om langer te bly? Dit kan steeds goed wees om jou besoek te beperk, want sy is dalk moeg en kan dalk nie helder dink nie. Jy moet natuurlik jou eie diskresie gebruik, maar die hoofpunt is, moenie langer bly as wat jy welkom is nie.
Daardie raad moet veral beklemtoon word as dit lyk asof die pasiënt alreeds meer besoekers het as wat goed is vir hom of vir die hospitaalroetine. Dit is in werklikheid beter om ’n aantal kort besoeke te doen en dit toon jou besorgdheid meer as een lang besoek. Onthou ook dat takt nodig is as dit lyk asof die pasiënt familielede het wat jou miskien ietwat vyandiggesind is of selfs nie van jou teenwoordigheid hou nie.—Vergelyk Spreuke 25:17.
Jou praktiese hulp
’n Ander soort voorbereiding sal help, selfs voordat jy jou besoek aflê. Is daar iets nuttigs wat jy kan saamneem? Wat van iets nuuts om te lees? Miskien het jy daardie dag nog die jongste nommer van ’n tydskrif wat die pasiënt ook geniet in die pos ontvang. Die pasiënt waardeer dalk jou bereidwilligheid om jou kosbare nuwe nommer te deel. Jy kan selfs aanbied om ’n artikel of twee wat jy besonder interessant gevind het vir haar te lees.
Watter ander dinge kan jy saamneem? ’n Klein herinnering soos blomme of vrugte kan die dag ophelder. Nog iets wat die pasiënt kan opbeur, is haar gunsteling-lekkergoed of selfs ’n bietjie tuisgemaakte kos—as dit toegelaat word. Jy kan by die gesin verneem na sodanige voedselitems of die verpleegsters vra voordat jy dit selfs in die kamer inneem.
Jy kan ook die dokter of die verpleegsters vra of daar enigiets anders is wat jy vir die pasiënt kan bring of wat jy vir haar kan doen wat hulle las ligter of haar gemakliker sal maak. Hulle sal jou hulp dalk verwelkom.
Wil jy op ander maniere help? Vra die pasiënt oor praktiese dingetjies. Wie haal of neem haar pos vir haar? Kan jy aanbied om haar huis of woonstel op te pas, en miskien selfs ’n paar vriende kry om jou te help om dit skoon te maak voordat die pasiënt terugkeer huis toe? Moet iemand sneeu van die sypaadjie afskep, die plante natgooi of stappe doen sodat dit lyk asof daar in die huis gewoon word en dit sodoende nie inbrekers lok nie? Is sy bekommerd oor die versorging van ’n troeteldier? Die pasiënt kan dalk aan hierdie en ander dinge dink, maar sy sal dit nie vir jou sê nie, tensy jy haar vra. Jou vriendelike navrae sal ook nuttig wees omdat dit sal beklemtoon dat jy werklik omgee.
Dit is gepas om iets te sê oor betaamlike dekorum terwyl jy die hospitaal besoek. Dit klink dalk vreemd, maar die manier waarop jy aantrek en optree, kan ’n uitwerking hê op die manier waarop die hospitaalpersoneel die pasiënt behandel. Hulle sal dalk heel beïndruk wees as hulle sien dat ’n pasiënt besoekers ontvang wat goed versorg is. Wanneer die personeel sien dat etlike sulke deftige besoekers na die welstand van die pasiënt verneem, kan hulle tot die gevolgtrekking kom dat hierdie pasiënt ’n gerespekteerde persoon moet wees, wat sy natuurlik is. Die Bybel sê dat ons ons moet versier ‘soos dit mense betaam wat die godsvrug bely’ en deurdat jy dit doen, kan jy die personeel aanmoedig om die pasiënt ook so te behandel.—1 Timotheüs 2:9, 10.
As daar ’n ernstige probleem is
Die pasiënt wat jy besoek, kan soms ’n ernstige probleem hê wat kommunikasie met die hospitaalpersoneel betref. ’n Goeie vraag om gereed te hê, sonder om inbreuk te maak op die pasiënt se privaatheid, is: “Hoe dink die dokter vaar jy?” As dinge nie goed gaan nie, en jy die verantwoordelike familielid of bedienaar is, kan jy miskien help. Ter wille van die pasiënt se welstand moet jy dalk die inisiatief neem om meer inligting van die hospitaalpersoneel te kry. Of miskien kan jy aanbied om die gesin te vergesel, as hulle om die een of ander rede dalk huiwerig is om met die dokter te praat.
As dit die geval is, is die hoofsaak om in gedagte te hou om nie geïntimideer te raak deur die hospitaalomgewing of -personeel nie. Die pasiënt kan selfs in ’n waakeenheid wees en omring wees deur allerhande masjiene en mense wat baie siek is. Die personeel kom dalk druk besig of miskien bruusk voor. Dit is die neiging om skrikkerig te wees om hulle te steur, wat nog te sê van enigiets wat soos ’n uitdaging kan lyk. Maar as jy werklik die pasiënt se voorspraak is, verdien jy (en sy) duidelike antwoorde en alternatiewe. Jy moenie moed opgee voor jou taak volbring is nie. Jy moet versigtig wees om nie ’n oorlas te wees nie, maar onthou dat selfs Jesus in ’n illustrasie beklemtoon het dat dit soms nodig is om aan te hou vra om die versorging of inligting te kry waarop jy geregtig is.—Lukas 18:1-6.
Kyk terug op jou besoek
Nadat jy jou besoek afgelê het, en in ’n vrolike stemming vertrek het, kan jy hersien wat jy gesê en gedoen het. Sulke nadenke kan jou help om te sien hoe jou volgende besoek, aan hierdie pasiënt of aan ’n ander, selfs doeltreffender en bevredigender kan wees.
Alles in ag genome, daar is baie wat jy met ’n hospitaalbesoek kan uitrig. Hou voorbereiding en ’n begeerte om te help in gedagte. Deur die geleentheid te benut kan jy die meeste daarvan maak en “’n vriend [wees] wat sterker aanhang as ’n [vleeslike] broer”.—Spreuke 18:24.
[Venster op bladsy 10]
Jou nuttige besoek aan ’n pasiënt
1. Wees voorbereid.
2. Neem die toestand van die pasiënt in ag. Moenie te lank bly nie.
3. Trek gepas aan.
4. Neem die leiding in geselsery, maar beperk jou woorde.
5. Wees behulpsaam in wat jy saamneem of aanbied om te doen.
6. Wees hartlik en opbouend.
7. Gaan terug vir nog ’n kort besoek.