Jongmense vra . . .

Hoe kan ek my enkelouer help?

“’n Enkelouer kan met ’n jongleur [juggler] vergelyk word. Nadat jy ses maande lank geoefen het, kan jy uiteindelik vier balle gelyktydig in die lug gooi en vang. Maar sodra jy dit kan doen, gooi iemand ’n nuwe bal na jou toe!”—’n Enkelouer.

’N ENKELOUER se taak is uitputtend, dikwels meedoënloos. En as jou ma ’n enkelouer is, besef jy ongetwyfeld dat sy ’n bietjie hulp sal verwelkom.a Maar as jy ’n tiener is, kom jy te staan voor wat een skrywer “die spanningsvolste en kwetsbaarste tyd van die lewe” genoem het. Dit lyk dalk asof dit reeds moeilik genoeg is om die probleme wat gepaard gaan met die jeug die hoof te bied.

Soos die enkelouer wat in die begin aangehaal is, voel jou ma dalk nietemin van tyd tot tyd oorweldig terwyl sy probeer om ’n ma en ’n pa vir jou te wees. Jehovah verwag weliswaar nie die onmoontlike van enigeen nie. Soos een Bybelbeginsel sê: “As . . . iemand gee volgens wat hy het, neem God die gawe aan. Hy verwag nie van hom wat hy nie het nie” (2 Korinthiërs 8:12, NAV). Maar sy voel dalk steeds dat sy onder groot druk verkeer. Moet jy haar verknorsing eenvoudig ignoreer, of is daar goeie rede waarom jy haar moet probeer help?

‘Betaal ’n gepaste vergoeding’

In 1 Petrus 3:8 word Christene meegedeel: “En eindelik, wees almal eensgesind, medelydend.” Behoort medelye met jou ouer jou dus nie ten minste aan te spoor om haar te help nie? Dit is inderdaad “aangenaam in God se oë” dat jong Christene ‘’n gepaste vergoeding aan hulle ouers bly betaal’.—1 Timotheüs 5:4, NW.

Terwyl hierdie teks ongetwyfeld daarna verwys dat jy ’n enkelouer finansieel moet help, leer dit wel ’n belangrike beginsel: Ons is meer aan ons ouers verskuldig as wat ons ooit kan terugbetaal. En wanneer hulle hulp nodig het, is dit ons plig en voorreg om hulle te probeer vergoed. Party jeugdiges sal byvoorbeeld ’n deel van, of al hulle verdienstes uit deeltydse werk gebruik om huishoudelike rekeninge te help betaal. Dit toon ware dankbaarheid en waardering!

Finansiële hulp is egter net een manier om “’n gepaste vergoeding” aan jou ouer te betaal. Dit is nie dat jy jou afwesige ouer se plek moet probeer inneem nie—dit sal onmoontlik wees—en jy hoef jouself ook nie emosioneel uit te put en te dink dat jy die volle verantwoordelikheid het vir alles wat in jou huishouding aangaan nie. Dit is steeds jou ma se taak as ouer. (Vergelyk Spreuke 31:27.) Maar daar is talle praktiese maniere waarop jy kan toon dat jy ’n ware aanwins vir jou ma is as sy ’n enkelouer is.

Gehoorsaamheid maak haar las ligter

Een manier is eenvoudig om die bevel in Kolossense 3:20 te volg: “Kinders, julle moet julle ouers in alles gehoorsaam wees, want dit is die Here welbehaaglik.” Jy ken die woorde van hierdie teks dalk uit jou kop uit. Maar versuim jy soms om daarop ag te slaan?

Een enkelouer met ’n tienerseun werk lang ure om vir haar gesin te voorsien. Maar sy sê met ’n sug: “My seun maak die lewe moeiliker wanneer hy ongehoorsaam aan my is.” Haar seun sê daarop: “Ek is die enigste man in die huis. Ek is groter as my ma, en daarom is dit soms baie moeilik vir my om haar as die gesinshoof te gehoorsaam en te respekteer.”

Nòg jou fisiese grootte nòg jou geslag verskoon jou van Jehovah se bevel: “Verwerp die onderwysing van jou moeder nie” (Spreuke 6:20). Jou ma is deur God gemagtig om wette, of huisreëls, te maak. Jy is respek en gehoorsaamheid aan haar verskuldig. As jy ’n seun is, noem Ma jou dalk liefderyk die man in die huis. Maar sy is die hoof van die huis! En deur haar te gehoorsaam—en nie elke keer met haar te stry as sy jou vra om iets te doen nie—maak jy haar las ligter en dra jy by tot vrede in jou gesin.

Help met huiswerk

Nog ’n manier om jou ouer se las ligter te maak, is om met huiswerk te help—nie om te wag totdat jy gesoebat word om dit te doen nie. ‘Maar Ma vra my nie om enigiets te doen nie’, sê jy. Dit is verbasend genoeg dikwels die geval. Soos Carol V. Murdock skryf: “Enkelma of Enkelpa steier deur die voorhuis met ’n bondel wasgoed wat groot genoeg is om die sterkste knieë te laat knak—en drie kinders se oë verlaat nie vir ’n oomblik die televisieskerm nie.”—Single Parents Are People, Too!

Waarom verwag baie enkelouers so min van hulle kinders? Een enkelma redeneer: “Ek wil nie hê my dogter moet enige pret mis omdat ek moet werk nie. Ek is bang dat sy my daarvoor sal kwalik neem.” ’n Ander een het gesê: “Jy wil vir die afwesigheid van die ander ouer vergoed deur dit vir die kinders maklik te maak.” Sulke gevoelens word dalk hoofsaaklik deur jou ouer se ongegronde skuldgevoelens veroorsaak. Sy voel dalk skuldig omdat haar werk haar daarvan weerhou om by jou te wees. Of sy voel dalk skuldig oor haar mislukte huwelik en meen dat dit haar skuld is dat jy in ’n enkelouerhuis moet woon.

Volgens dr. Richard A. Gardner, skrywer van The Boys and Girls Book About Divorce, buit party jeugdiges die situasie uit. Hulle dring aan op bejammering en weier om met huiswerk te help. Dit herinner ons egter aan die gevoellose gesindheid wat die godsdiensleiers in Jesus se dag aan die dag gelê het. Jesus het van hulle gesê: “Want hulle bind pakke saam wat swaar en moeilik is om te dra, en sit dit op die skouers van die mense, maar self wil hulle dit nie met hulle vinger verroer nie.”—Mattheüs 23:4.

Lê ’n ander gesindheid aan die dag. Weerhou jou daarvan om jou ma se las swaarder te maak; moenie jouself van huiswerk verskoon nie.

Neem die inisiatief

Dit beteken dalk dat jy moet doen wat gedoen moet word sonder dat jy gevra word. Kyk hoe jong Tony sy ma se las ligter maak. Hy sê: “My ma werk in ’n hospitaal, en haar uniform moet gestryk word. Daarom stryk ek dit vir haar.” Maar is dit nie ’n vrou se werk nie? “Party dink so”, sê Tony. “Maar dit help my ma en daarom doen ek dit.”

Buiten om praktiese hulp aan te bied, kan jy baie doen om jou ma op te beur deur bloot jou dank te betuig. Een enkelouer het geskryf: “Ek vind dikwels dat ek ná ’n baie uitputtende dag by die werk regtig bedruk of geïrriteerd is wanneer ek tuis kom—en dan is dit juis die dag wat my dogter besluit het om die tafel te dek en die aandete gereed te maak.” Sy voeg by: “My seun sit sy arms om my en gee my ’n drukkie en sê: ‘Jy is die beste Mams in die wêreld.’” Hoe voel sy oor sulke bedagsame dade? Sy sê voorts: “My hele gemoedstemming word weer beter.”

‘Gaan voort om in die waarheid te wandel’

“Ek het geen groter rede tot dankbaarheid as dit nie, dat ek hoor dat my kinders voortgaan om in die waarheid te wandel” (3 Johannes 4, NW). Die apostel Johannes het hier van sy geestelike kinders gepraat. As jou ma ’n Christen is, voel sy ongetwyfeld dieselfde teenoor jou; sy wil hê dat jy in die waarheid moet wandel. Met daardie doel voor oë reël sy dalk om ’n gereelde gesinsbybelstudie met jou te hou.

Ná ’n uitputtende dag se werk is dit dalk nie maklik vir haar om daardie studie te hou nie. En as jy ontegemoetkomend is of kla, kan die gesinstudie vir almal ’n beproewing wees. Wees dus tegemoetkomend! Wees gereed om te studeer wanneer die bepaalde tyd aanbreek. Berei jou lesse voor. Jou samewerking is dalk net die aanmoediging wat jou ouer nodig het om daardie studie gereeld te hou. Wanneer jy Christenvergaderinge bywoon en aan die predikingswerk van huis-tot-huis deelneem sonder om aangepor te word, toon jy ook dat jy in die waarheid wandel (Mattheüs 24:14; Hebreërs 10:24, 25). Op hierdie manier verseker jy jou ma dat haar pogings nie tevergeefs is nie!

Die voordele

Spreuke 3:27 sê: “Hou ’n weldaad nie terug van hom aan wie dit toekom as dit in jou mag is om dit te doen nie.” Jy is ongetwyfeld sulke bedagsaamheid aan jou ouer verskuldig. En wanneer jy dit betoon, behaag jy nie net haar nie maar Jehovah God self. Nog ’n voordeel: Jou ouer sal meer geneig voel om jou te help wanneer jy hulp nodig het.

Laastens, dit bou goeie eienskappe om ander te help. Soos een skrywer gesê het: “Jongmense het geleenthede nodig om te voel dat hulle ander help en aan ander gee. Wanneer hulle nie een van hierdie dinge ondervind nie, kan hulle nie hulle eie krag en deursettingsvermoë ontdek nie, ’n ontdekking [wat spruit] uit die wete dat jy ’n goeie mens is wat ander help.” Soos Jesus self gesê het: “Dit is saliger om te gee as om te ontvang” (Handelinge 20:35). En jy kan groot vreugde ervaar as jy genoeg omgee om jou enkelouer te help.

[Voetnoot]

[Prente op bladsy 19]

’n Lui of onverskillige jeugdige plaas druk op sy ouer se lewe . . . Een wat met die huiswerk help, maak haar las ligter