Toon besorgdheid teenoor enkelouers

MIN mense het meer verpligtinge wat eise aan hulle tyd en energie stel as enkelouers. Hulle kom voor tallose uitdagings te staan. Hulle moet al die verantwoordelikhede nakom wat met die grootmaak van ’n gesin gepaardgaan. Buiten hulle sekulêre werk, moet hulle inkopies doen, kos maak, skoon maak en na die kinders omsien. Dan moet hulle ook gesondheidsorg, vermaak en emosionele ondersteuning aan die kinders voorsien en, indien enigsins moontlik, ’n paar kosbare oomblikke vir hulleself vind.

Hoewel enkelouergesinne vandag ’n al hoe groter en opvallender deel van die samelewing uitmaak, kan hulle maklik oor die hoof gesien word. Een ma het openlik erken: “Voordat ek ’n enkelouer geword het, was ek nie werklik bewus van hulle nie.” Wat kan jy doen om besorgdheid teenoor enkelouers te toon? Waarom moet jy oor hulle besorg wees? Kom ons bespreek drie redes waarom ons aan hulle behoeftes aandag moet skenk.

Redes om besorgdheid te toon

Baie enkelouers wil hulp hê. ’n Weduwee wat 41 jaar oud is en twee kinders het, het gesê: “Daar is tye wanneer ek nie seker is wat om te doen nie, en ek voel oorweldig deur al my verantwoordelikhede.” Wanneer hulle man gesterf of hulle verlaat het, of wanneer hulle ander ongunstige omstandighede moet verduur, laat dit baie enkelouers soos een ma voel. Sy het gesê: “Ons smeek om verligting, en ons het dit dringend nodig!”

Dit dra tot jou eie vreugde by. Het jy al ooit iemand ’n vrag help dra wat te swaar was vir een persoon? Indien wel, het jy waarskynlik ’n gevoel van bevrediging ervaar in die wete dat jy iemand op ’n praktiese wyse gehelp het. Enkelouers dra eweneens ’n vrag wat soms te swaar kan wees vir een persoon. Wanneer jy in hulle behoeftes voorsien deur ’n helpende hand te verleen, sal jy vind hoe waar die woorde van Psalm 41:1 is: “Gelukkig is elkeen wat ag gee op die geringe.”

Dit behaag God. Jakobus 1:27 sê: “Die vorm van aanbidding wat vanuit die standpunt van ons God en Vader rein en onbesmet is, is dit: om na wese en weduwees in hulle verdrukking om te sien.” Dit sluit in om na enkelouers om te sien.a Hebreërs 13:16 sê: “Moet . . . nie vergeet om goed te doen en mededeelsaam te wees nie, want sulke offerandes is vir God welbehaaglik.”

Kom ons bespreek nou, in die lig van hierdie drie redes, waarom ons besorgdheid teenoor enkelouers moet toon, wat jy kan doen om te help en hoe jy seker kan wees dat jou hulp prakties sal wees.

Onderskei hulle behoeftes

Dit lyk dalk logies om vir ’n enkelouer te vra: “Hoe kan ek help?” Maar realisties gesproke lei dit selde daartoe dat iemand vir jou sê wat hy of sy werklik nodig het. Soos ons vroeër gesien het, beveel Psalm 41:1 aan dat ons “ag gee op die geringe”. Een naslaanwerk verduidelik dat die Hebreeuse woord wat hier gebruik word, kan verwys na “die proses om ’n komplekse reeks gedagtes te oordink, wat tot ’n verstandige handelswyse lei”.

Om dus uit te vind wat die beste manier is waarop jy kan help, moet jy ernstig nadink oor die uitdagings waarvoor ’n enkelouer te staan kom. Wees opmerksaam, en moenie die situasie net oppervlakkig waarneem nie. Vra jou af: ‘Watter hulp sou ek wou hê as ek in daardie situasie was?’ Baie enkelouers sal natuurlik vir jou sê dat jy, ongeag hoe hard jy probeer, nooit ten volle kan verstaan hoe dit is om ’n enkelouer te wees tensy jy self een is nie. Maar as jy jou bes doen om hulle omstandighede te verstaan, sal jy in ’n beter posisie wees om op enkelouers ‘ag te gee’, of besorgdheid teenoor hulle te toon.

Volg God se volmaakte voorbeeld na

Wanneer dit daarby kom om na enkelouers om te sien, doen niemand dit op ’n liefdevoller en doeltreffender wyse as Jehovah God nie. Baie tekste beklemtoon die bedagsaamheid en besorgdheid wat Jehovah God teenoor weduwees, vaderlose seuns en, gevolglik enkelouers, toon. As ons die wyse ondersoek waarop God in die behoeftes van hierdie geringes voorsien, kan ons baie leer oor hoe om hulp te gee wat werklik nuttig en prakties is. Kom ons kyk na vier sleutelfaktore.

Bied ’n luisterende oor

In die Wet wat Jehovah vir eertydse Israel gegee het, het hy gesê dat hy ‘sekerlik die geroep sal hoor’ van die minderbevoorregte (Eksodus 22:22, 23). Hoe kan jy hierdie uitstekende voorbeeld navolg? Enkelouers is dikwels baie eensaam omdat hulle geen ander volwassene het om mee te praat nie. “Wanneer die kinders bed toe gaan, kan ek soms nie ophou huil nie”, het ’n enkelouer gekla. “Die eensaamheid is partykeer te erg om te verduur.” Kan jy jou, indien gepas, beskikbaar stel om ‘die geroep te hoor’ van ’n enkelouer wat moontlik ’n behoefte daaraan het om oor sy of haar gevoelens te praat? As jy onder gepaste omstandighede ’n luisterende oor bied, kan dit hom of haar baie help om die uitdagings van enkelouerskap die hoof te bied.

Gee aanmoediging

Jehovah het manne geïnspireer om heilige liedere, of psalms, te skryf wat die Israeliete by geleenthede vir aanbidding gesing het. Dink net hoe dit Israelitiese weduwees en vaderlose seuns moes aangemoedig het wanneer hulle die goddelik geïnspireerde woorde gesing het wat hulle daaraan herinner het dat Jehovah vir hulle “’n vader” en “’n regter” is en dat hy vir hulle verligting sal verskaf (Psalm 68:5; 146:9). Ons kan ook aanmoediging gee wat ’n enkelouer dalk jare lank sal onthou. Selfs ná 20 jaar onthou Ruth, ’n enkelouer, nog die keer toe ’n ervare pa vir haar gesê het: “Jy maak jou twee seuns regtig goed groot. Hou so aan.” Ruth vertel: “Sy woorde het ’n groot indruk op my gemaak.” Ja, “vriendelike woorde is goeie medisyne” en kan ’n enkelouer meer aanmoedig as wat ons dalk ooit sal weet (Spreuke 15:4, Contemporary English Version). Kan jy aan spesifieke, opregte woorde van lof dink wat jy vir ’n enkelouer kan sê?

Bied materiële hulp wanneer nodig

Jehovah se Wet vir eertydse Israel het reëlings ingesluit waarvolgens weduwees en vaderlose seuns die nodige kos op ’n waardige wyse kon verkry. Danksy dié voorsienings het hierdie geringes genoeg gehad om ‘te eet en versadig te word’ (Deuteronomium 24:19-21; 26:12, 13). Ons kan ook op ’n taktvolle en waardige wyse materiële hulp bied aan ’n enkelouergesin wat dit nodig het. Kan jy dalk kos of ’n sak kruideniersware by hulle huis aflewer? Het jy klere wat ’n enkelouer of die kinders kan gebruik? Of kan jy finansiële hulp verleen sodat ’n enkelouer dinge kan koop wat die gesin nodig het?

Voorsien assosiasie

Jehovah het beveel dat weduwees en vaderlose seuns by die nasie se jaarlikse feeste ingesluit moet word, waar hulle assosiasie met mede-Israeliete kon geniet. Trouens, daar is vir hulle gesê: “[Julle] moet vrolik wees” (Deuteronomium 16:10-15). Christene word vandag eweneens vermaan om “gasvry teenoor mekaar” te wees en geleenthede vir vreugdevolle assosiasie te voorsien (1 Petrus 4:9). Nooi dus gerus ’n enkelouergesin oor vir ’n ete. Dit hoef nie ’n groot ete te wees nie. ‘’n Paar dinge is nodig, of net een’, het Jesus gesê toe hy assosiasie by die huis van vriende geniet het.—Lukas 10:42.

Jou besorgdheid sal waardeer word

Kathleen, ’n enkelouer wat drie kinders grootgemaak het, sê dat sy nooit hierdie wyse raad sal vergeet nie: “Verwag niks; waardeer alles.” Soos Kathleen, besef baie enkelouers dat dit hulle verantwoordelikheid is om hulle kinders groot te maak. Hulle verwag dus nie dat ander vir hulle moet doen wat hulle self moet doen nie. Nietemin waardeer hulle ongetwyfeld enige hulp wat hulle ontvang. Jy kan tot hulle welsyn en jou eie vreugde bydra deur besorgdheid teenoor enkelouers te toon in die vertroue dat Jehovah God “jou sal beloon vir wat jy gedoen het”.—Spreuke 19:17, New Century Version.

[Voetnoot]

[Prent op bladsy 24]

Wanneer laas het jy ’n enkelouergesin vir ’n ete oorgenooi? Doen dit gerus so gou moontlik